Mulleres no Álbum de Galicia
Galería biobibliográfica que, de xeito individualizado, proporciona información sobre mulleres galegas ou relacionadas con Galicia, xa finadas. Na súa elaboración, realizada principalmente a través de colaboracións externas e especializadas, os esforzos céntranse en buscar e dar a coñecer referencias das mulleres máis esquecidas pola historia, sen deixar de lado as máis recoñecidas e estudadas. Dáse maior importancia, nestes últimos casos, á visibilización das vertentes menos difundidas das súas traxectorias.A galería renóvase periodicamente ben a través dunha nova entrada, ben con ampliacións ou revisións das xa existentes.
Cada entrada dá conta da singularidade da muller tratada e achega elementos que amosan as relacións e producións das protagonistas. Engádense ligazóns de interese, arquivos fotográficos, pictóricos, sonoros e audiovisuais así como materiais documentais divididos en dúas categorías: «documentos de» e «documentos sobre». Na primeira categoría recóllense producións da muller que se trata. A segunda componse de documentos doutras autorías e relacionados con ela. Algúns destes teñen xa un carácter histórico, outros son de nova creación.