O primeiro libro de actas do Seminario de Estudos Galegos dá conta do documento fundacional da entidade, constituída na Casa do Castro de Ortoño (hoxe no concello de Ames). Nel, os participantes "acordaron de facer xuntanza na Universidade Galega pra adicarse ao Estudo da Terra". Neste primeiro documento redactan unhas "Constitucións" nas que declaran que "se fai xuntanza con todos os que traballen na cultura galega para potencializar os seus esforzos nunha común laboura. Poden por iso pertencer a il os que nados ou non na Galiza s'adiquen aos devanditos traballos".