O encontro "A arquitectura desde Madrid" reúne desde onte a 14 dos máis relevantes arquitectos madrileños e a máis dun centenar de estudantes e profesionais galegos en Santiago de Compostela co obxectivo de divulgar a arquitectura madrileña actual e estabelecer novos lazos culturais e canles de diálogo que permitan mellorar a formación dos arquitectos galegos.
Os coordinadores das xornadas salientan o feito de que estos encontros permiten aos propios arquitectos analizar diante dos seu colegas de profesión as súas obras e ideas, para reflexionar de xeito colectivo sobre eles e para dialogar. Neste senso, Ruiz destacou o productivo que resultou nestas xornadas poder escoitar a xeracións consagradas da arquitectura madrileña, como José Antonio Corrales e Juan Navarro Baldeweg, xunto a xeracións máis novas, como Cristina Díaz e Efrén García ou Javier Soto e Álvaro Maroto.
Gabriel Ruiz foi o encargado de comezar a sesión de hoxe facendo un extenso repaso da historia da arquitectura madrileña desde os seus orixes até a actualidade. Ruiz destacou que a identidade da arquitectura madrileña está en continuo proceso de fortes transformacións e definición, a medida que a cidade se converte nunha metrópole internacional. Sen embargo, sinala, "a cerrazón da Guerra Civil e o réxime posterior provocou a elaboración dunha arquitectura particular, de carácter local, que foi a base do que hoxe é a arquitectura madrileña". Cristina Díaz e Efrén García, Carlos Puente e José Antonio Corrales completan a sesión de hoxe antes de rematar cun amplo debate.
Estas xornadas non son un acto illado senón que continúan o traballo que nos últimos meses realiza o Consello da Cultura Galega abordando a arquitectura que se desenvolve en distintos focos de especial significación na Península. Os primeiros encontros centráronse na arquitectura en Lisboa, en Cataluña e no País Vasco e Navarra. Nesta cuarta edición, a elección foi Madrid. O obxectivo final é ofrecer desde a Comunidade unha ampla ollada sobre as diferentes arquitecturas peninsulares e estabelecer o característico e o diferente de cada unha.
