Novas da lingua

Rexistros5011 a 5040 de 5145
  1. Inicio
  2. CDSG-CCG
  3. Novas da lingua
27/09/2005. CURSOS E CONGRESOS

Cursos de lingua e cultura galegas na Universitat de Barcelona

A Sección de Filoloxía Galega e Portuguesa da Universitat de Barcelona fai pública a convocatoria de cursos de lingua e cultura galegas para o ano académico 2005-2006. A oferta formativa está destinada a maiores de 17 anos, sexan ou non alumnos/as desta universidade, e contempla diferentes niveis e tipos de cursos (galego oral, iniciación á lingua galega, perfeccionamento da lingua galega e extensión cultural).

O prazo de inscrición é do 26 de setembro ao 11 de outubro de 2005.

Se desexa máis información, prema aquí.
05/10/2005. CURSOS E CONGRESOS

Encontro de asesores lingüísticos na Universidade Complutense

A Universidade Complutense de Madrid (UCM), o grupo de investigación LEETHI e a asociación profesional Unión de Correctores (UniCo) organizan o I Encontro “Asesores lingüísticos na sociedade de hoxe”, onde se debaterá, entre outras cousas, sobre a situación do asesor lingüístico ou sobre as propostas para a viabilidade profesional do corrector. Como representante galego intervirá Antón Lado, fundador de Reverso Servizos Lingüísticos.

As sesións, de acceso libre, terán lugar os vindeiros días 14 e 15 de outubro, no Paraninfo da Facultade de Filoloxía da UCM.
23/09/2005. INVESTIGACIóN

O Consello de Europa avalía a política lingüística no Estado español

O Consello de Europa acaba de facer público un informe onde se avalía o grao de cumprimento da Carta Europea das Linguas Rexionais e Minorizadas por parte do Goberno español, que aprobou este documento en 1992 e posteriormente ratificouno en 2001.

No que respecta á promoción e protección da lingua galega, entre as consideracións que fai o Consello de Europa destaca a recomendación de que se promovan modelos educativos onde prime o uso do galego como lingua vehicular, que se respecten os dereitos lingüísticos dos cidadáns no ámbito da xustiza ou que se dobren os esforzos para a protección do galego estremeiro.

Se o desexa, pode consultar o informe completo.
20/09/2005. CURSOS E CONGRESOS

Oferta formativa de lingua galega para a Universidade de Vigo

A Área de Normalización Lingüística da Universidade de Vigo presenta a oferta formativa de lingua galega para o primeiro cuadrimestre do curso 2005-2006, que inclúe diferentes cursos (tanto na modalidade virtual como presencial) destinados a mellorar a competencia lingüística da comunidade universitaria.

O prazo para realizar a preinscrición remata o vindeiro 3 de outubro. Se desexa máis información, prema aquí.

16/09/2005. DINAMIZACIóN

Proposta de cooperación para a dinamización lingüística no ámbito local

A iniciativa da Concellería de Xuventude e Normalización Lingüística do Concello de Betanzos, o vindeiro luns, día 19 de setembro, celebrarase unha xuntanza de traballo na que participarán os técnicos/as de normalización lingüística e concelleiros responsables desta área, dos Concellos de Abegondo, Arteixo, Cambre, Cedeira, Culleredo, Fene, Melide, Mugardos, Oleiros e Pontedeume.

Nesta reunión, na que tamén participará Margarida Vázquez, deputada provincial responsable de normalización lingüística, estudaranse diferentes vías de cooperación entre os concellos co ánimo de optimizar recursos humanos, técnicos e económicos.
Se desexa máis información, prema aquí.

16/09/2005. OUTRAS

Nova secretaria xeral de Política Lingüística

En virtude do acordo acadado no Consello da Xunta de Galicia de onte, 15 de setembro, a lingüista e profesora da Universidade de Santiago María Sol López Martínez será a secretaria xeral de Política Lingüística.

A nova secretaria xeral contará cunha comisión de asesoramento integrada por Alberte Ansede, Manuel Portas, Håkan Casares e Xosé González.
05/09/2011. EMPREGO

O Centro de Linguas da Universidade da Coruña busca colaboradores/as docentes

O Centro da Linguas da Universidade da Coruña, dirixido polo profesor Mauro Fernández, está a elaborar unha relación de colaboradores/as docentes para o ensino de diferentes linguas estranxeiras a partir deste mesmo outono, así como para impartir galego para estranxeiros nun futuro próximo.

Todas as persoas interesadas deben enviar o seu currículo ao Centro de Linguas desta universidade. Se desexa máis información, prema aquí.
08/09/2005. CURSOS E CONGRESOS

Curso de perfeccionamento en lingua oral para os medios de comunicación

O Departamento de Filoloxía Galega e o Instituto de Lingua Galega da USC organizan este curso de lingua oral que ten como obxectivos ampliar a capacidade do alumnado para empregar os recursos fonéticos, prosódicos e pragmáticos máis axeitados para as diferentes funcións e formatos da comunicación audiovisual.
(Máis información)
29/07/2005. CURSOS E CONGRESOS

IX Encontros para a Normalización Lingüística

Xa está accesible no noso web toda a información referente á novena edición dos Encontros para a Normalización Lingüística, que se celebrarán os días 20 e 21 de outubro de 2005. Consulte o programa provisional e, se o desexa, acceda ao formulario de inscrición en liña.

En breve poderá acceder tamén desde o programa aos resumos das diferentes intervencións, que iremos subindo á rede tan pronto como os relatores nolos vaian facilitando.
26/07/2005. EMPREGO

Bolsas de colaboración en proxectos de investigación do Consello da Cultura Galega

O Consello da Cultura Galega convoca 17 bolsas de colaboración en proxectos de investigación que se están a desenvolver nesta institución.
Os/as licenciados/as en Filoloxía galega poderán presentar a súa solicitude para colaborar nos seguintes proxectos ou seccións: Sección de Lingua (1 bolsa); Proxecto Sarmiento (2 bolsas); Área de publicacións (1 bolsa); Sección de Literatura e Industrias da Edición (1 bolsa); Centro de Documentación Sociolingüística de Galicia (2 bolsas).
No caso do CDSG tamén se convoca unha bolsa para licenciados/as ou diplomados/as en biblioteconomía e documentación.

O prazo de presentación de solicitudes será de corenta días naturais, contados a partir do seguinte ao da publicación desta convocatoria.
26/07/2005. EMPREGO

Convocatoria para a selección de intérpretes-tradutores de galego

Como consecuencia da modificación do Regulamento do Senado para a ampliación do uso das linguas cooficiais, esta cámara convoca un proceso de selección de intérpretes-tradutores de linguas que, xunto co castelán, teñan carácter de oficial nalgunha das Comunidades autónomas.

Os candidatos deberán posuír a licenciatura de Tradución e Interpretación e acreditar especialización na lingua cooficial para a que soliciten ser seleccionados. O prazo de presentación de instancias será desde o día 1 ata o 16 de setembro de 2005.

Se desexa máis información, prema aquí.
22/07/2005. AXUDAS E PREMIOS

Resólvese a concesión de axudas ás asociacións para o fomento da lingua galega

A Consellería de Educación e Ordenación Universitaria publica, no DOG do 22 de xullo, a resolución da concesión de subvencións ás asociacións e institucións privadas sen fin de lucro para fomentar o uso social da lingua galega.

Se desexa consultar o texto completo da resolución, prema aquí.
20/07/2005. AXUDAS E PREMIOS

Axudas para a normalización da lingua galega na Administración local

A Consellería de Xustiza, Interior e Administración Local convoca subvencións destinadas ás entidades locais para a normalización da lingua galega neste ámbito.
O prazo de presentación de solicitudes é de corenta días naturais, contados a partir do seguinte ao da publicación desta convocatoria.
20/07/2005. CURSOS E CONGRESOS

Cursos de linguaxe administrativa galega para o persoal da Administración local

A Consellería de Xustiza, Interior e Administración local convoca cursos de linguaxe administrativa galega (niveis básico, medio e superior) para o persoal da Administración local.

O prazo de presentación de solicitudes é de corenta días naturais, contados a partir do seguinte ao da publicación desta convocatoria.
14/07/2005. INVESTIGACIóN

Preséntase a tradución ao galego de Idioma e poder social, de Rafael Ninyoles

O vindeiro luns, 18 de xullo, ás 20 h, o sociolingüista Rafael Lluis Ninyoles presentará na Coruña (no local de Portas Ártabras, rúa da Sinagoga, 22) a tradución ao galego do seu libro Idioma e poder social. No acto intervirán tamén Mª Pilar García Negro, Francisco Pillado e Goretti Sanmartín Rei.

O profesor Ninyoles participará ao día seguinte, 19 de xullo, no
I Curso de Verán sobre Dinamización Lingüística, organizado polo Servizo de Normalización Lingüística da Universidade da Coruña, coa conferencia inaugural “Lingua e sociedade hoxe”.
12/07/2005. AXUDAS E PREMIOS

Resólvense as axudas ao desenvolvemento de guións e á produción audiovisual de novos realizadores

A Consellería de Cultura, Comunicación Social e Turismo, publica, no DOG do 12 de xullo de 2005, a resolución de axudas para o desenvolvemento de guións e para a realización de proxectos de produción audiovisual en lingua galega que incorporen novos realizadores.

Se desexa consultar o texto completo da resolución, prema aquí.
11/07/2005. AXUDAS E PREMIOS

Resólvense as axudas á produción audiovisual en lingua galega

A Consellería de Cultura, Comunicación Social e Turismo publica, no DOG do 8 de xullo de 2005, a resolución de axudas para apoiar o desenvolvemento de proxectos de produción audiovisual, así como a produción audiovisual en lingua galega.

Se desexa máis información, prema aquí.

07/07/2005. AXUDAS E PREMIOS

Axudas para a adquisición de material didáctico en galego

A Consellería de Educación e Ordenación Universitaria publica, no DOG do 7 de xullo, a convocatoria de axudas públicas destinadas a centros de ensino privados para a adquisición de material didáctico en galego.

O prazo se presentación de solicitudes é de 40 días naturais contados a partir do día seguinte ao da publicación desta convocatoria.
05/07/2005. INVESTIGACIóN

Primeira tese sobre a planificación lingüística no ámbito socioeconómico

A investigadora Valentina Formoso presentou onte na Facultade de Filoloxía da Universidade de Santiago a súa Tese de Doutoramento A lingua galega no ámbito empresarial. Usos e representacións sociolingüísticas.

A tese, dirixida polos doutores Carmen Alén Garabato e Manuel González González, achega unha ampla análise sociolingüística do ámbito socieconómico, ao tempo que propón medidas concretas para a planificación e normalización lingüísticas neste eido.

O tribunal outorgou a este traballo a cualificación de Sobresaliente “Cum Laudem”.
04/07/2005. DINAMIZACIóN

O Día das Letras Galegas 2006 estará dedicado a Manuel Lugrís Freire

O Plenario da Real Academia Galega (RAG) acordou, na sesión ordinaria do pasado día 2 de xullo, dedicar o Día das Letras Galegas 2006 a Manuel Lugrís Freire, un dos membros fundadores da RAG e presidente desta institución entre o 28 de abril de 1934 e o 20 de agosto de 1935.

Se desexa máis información sobre a biografía deste destacado persoeiro da cultura galega, prema aquí.
01/07/2005. DINAMIZACIóN

Nova versión do programa Xestora

O programa Xestora é unha ferramenta informática creada no ano 2000 a iniciativa da Concellaría de Relacións Veciñais e Política Lingüística do Concello de Santiago.
Xestora (3.0) engade modelos adaptados á lexislación vixente e contén, entre outras prestacións, un plan de contabilidade adaptado ás asociacións; documentación para a solicitude de subvencións; axuda para efectuar o balance e conta de resultados e os asentos de apertura e peche do ano.

Na edición desta terceira versión colabora a Deputación da Coruña, que xa distribuíu
3 000 exemplares entre as entidades sen ánimo de lucro da provincia.

30/06/2005. LEXISLACIóN

Refórmase o Regulamento do Senado sobre o uso das linguas cooficiais

O Senado aprobou onte o texto que previamente os grupos con representación nesta cámara pactaran para ampliar o uso do galego, éuscaro e catalán na Cámara Alta.
A reforma permitirá o emprego das tres linguas en todas as sesións da Comisión Xeral de Comunidades Autónomas. Así mesmo recóllese que se unha moción, interpelación ou pregunta se presenta, ademais de en castelán, nalgunha das linguas cooficiais do Estado, esta publicarase tamén neste idioma no Boletín Oficial das Cortes Xerais.

Finalmente, as emendas presentadas por CIU e PNV, co apoio do senador do BNG integrado no grupo mixto, non foron aprobadas.
24/06/2005. CURSOS E CONGRESOS

Formación lingüística para o profesorado

O Centro de Formación e Recursos de Santiago está a organizar o curso A nova normativa da lingua galega, que ten como obxectivo difundir os cambios ortográficos e morfolóxicos da última reforma de 2003 entre a comunidade docente.

Esta actividade terá unha duración de 18 horas e desenvolverase ao longo do vindeiro curso 2005-2006. A data límite de inscrición é o 15 de setembro.
23/06/2005. LEXISLACIóN

Recoñécese a oficialidade do galego no Rexistro Civil

En virtude do artigo 3 da Constitución española e do principio de dobre oficialidade contido nos estatutos das comunidades autónomas con lingua propia, as Cortes Xerais veñen de aprobar a Lei 12/2005, do 22 de xuño, pola que se modifica o artigo 23 da Lei do 8 de xuño de 1957, do Rexistro Civil.

Segundo esta modificación, os asentos poderán realizarse agora tanto en castelán como na lingua oficial propia da Comunidade Autónoma na que estea situado o Rexistro Civil. Ademais, nas Comunidades con lingua oficial propia distinta do castelán, as follas dos libros do Rexistro Civil, os impresos, os selos e os sistemas informáticos distribuiranse nas dúas linguas oficiais.
21/06/2005. DINAMIZACIóN

En Cambre, co galego a todas partes

Baixo o lema Co galego a todas partes, o Servizo de Normalización Lingüística do Concello de Cambre está a desenvolver unha campaña de dinamización en diferentes ámbitos sociais.

Esta campaña, que se organiza en varias fases, pretende intervir cada mes nun ámbito específico, coma as farmacias, as piscinas ou as tendas de roupa. Este mes de xuño estase a dedicar á intervención no eido farmacéutico, baixo o lema Contigo o galego goza de boa saúde, e o vindeiro mes de xullo o concello convidará a todas as piscinas municipais a que se “mollen co galego”.
16/06/2005. OUTRAS

O Centro Galego de Bruxelas convídanos a consultar “A Nosa Voz” en liña

A Nosa Voz, voceiro do Centro Galego de Bruxelas, contará a partir de agora cunha edición en PDF que pode descargarse desde o seu web.

Neste número 45, do mes de xuño, ofrécennos, entre outros contidos, un especial dedicado ao Día das Letras Galegas 2005.
14/05/2005. INVESTIGACIóN

Preséntase no CCG o documento máis antigo escrito en galego en Galicia

Henrique Monteagudo, secretario do CCG e director do CDSG, presentou aos medios de comunicación unha reprodución en tamaño real do documento O Foro do bo burgo do Castro Caldelas, dado en Allariz en abril de 1228 e único diploma en romanzo saído da chancelaría de Alfonso IX.

O profesor Monteagudo explicou cales foron as claves que o levaron a seguir a pista deste importante documento, do que xa se coñecía a súa existencia pero se ignoraba a súa transcendental importancia para a historia da lingua galega, ao descubrirse agora que nos atopamos ante o documento máis antigo escrito en galego en Galicia.

O documento orixinal do Foro do bo burgo de Castro Caldelas está custodiado no Arquivo dos Duques de Alba (Madrid). Se o desexa, nos fondos do CDSG pode acceder a unha reprodución en tamaño real.

14/06/2005. LEXISLACIóN

O galego entra na Unión Europea, aínda que sen rango de oficialidade

O Consello de ministros de Asuntos Xerais e Relacións Exteriores da UE aprobou onte, día 13 de xuño, o uso das linguas cooficiais españolas (galego, catalán e éuscaro) nas institucións europeas, aínda que ningunha delas terá o rango de lingua oficial da UE, tal e como reclamaba o goberno español no memorandum presentado o pasado 13 de decembro de 2004.
(Máis información)
13/06/2005. CURSOS E CONGRESOS

Curso de deseño e aplicación de ferramentas de análise sociolingüística

A Coordinadora de Traballadores/as de Normalización da Lingua organiza este curso de formación destinado especialmente a técnicos/as de normalización lingüística e en xeral a todas as persoas interesadas no estudo da sociolingüística galega.

O curso, de 16 horas de duración, desenvolverase os vindeiros días 8 e 15 de xullo na Facultade de Filoloxía da USC. O prazo de preinscrición é do 13 ao 22 de xuño e só unha vez recibida a confirmación de admisión se deberán efectuar os trámites de matrícula.

Se desexa coñecer o programa do curso ou acceder ao formulario de preinscrición en liña, prema aquí.
10/06/2005. INVESTIGACIóN

Dicionario CLUVI inglés-galego

O Seminario de Lingüística Informática da Universidade de Vigo pon á disposición de todos os usuarios da rede Internet o Dicionario CLUVI inglés-galego (CLIG).
O CLIG está elaborado a partir dun corpus representativo de textos ingleses traducidos ao galego, polo que para cada tradución seleccionada o dicionario fornece un exemplo real de uso documentado neste corpus.

Esta primeira versión do CLIG inclúe 5 324 entradas e 7 998 traducións, que se irán completando en vindeiras versións do programa.