A Área de Normalización Lingüística da Universidade de Vigo e mais o Servizo de Normalización Lingüística do Concello de Pontevedra presentan a segunda edición do programa Falamos, que nesta ocasión se desenvolverá na modalidade presencial. A iniciativa está deseñada para crear novos espazos de uso para o galego no campus de Pontevedra, e o alumnado pode inscribirse en calquera das seguintes actividades: club de lectura, club de cociña, teatro e voluntariado lingüístico. Podes ampliar información premendo aquí.
16/09/2021. DINAMIZACIóN
16/09/2021. DINAMIZACIóN
As comisións de normalización lingüística das facultades de Ciencias, Enfermaría, Farmacia, Medicina e Odontoloxía, Óptica, Psicoloxía e Veterinaria da USC, co apoio do Servizo de Normalización Lingüística, convocan o VI Concurso de subtitulación de vídeos TED de ciencias da saúde ao galego. O obxectivo é contribuír á creación de contidos divulgativos en galego sobre ciencias da saúde. O certame inclúe dúas modalidades, unha dirixida a membros da comunidade universitaria da USC que non pertenzan á comunidade TED (modalidade A) e outra destinada a membros da comunidade TED (modalidade B). Ata o vindeiro 15 de novembro, os participantes deben realizar a tradución ao galego e a subtitulación dun vídeo TED da área de saúde segundo as instrucións que se lles fornecerán. Repartirase un único premio (de 300 euros) entre os participantes alleos á USC, e outros catro premios (de 300, 250, 200 e 150 euros) entre os membros da comunidade universitaria.
14/09/2021. EMPREGO
O Concello de Ames convoca unha bolsa para realizar prácticas no seu Servizo de Normalización Lingüística. Poden presentarse todas aquelas persoas que teñan o título de grao en Lingua e Literatura Galegas, posúan coñecementos sobre o manexo de procesadores de texto e teñan o carné de conducir. A duración da bolsa será dun ano. O prazo para presentar as solicitudes remata o 24 de setembro, ás 14:00 horas. Para ampliar información, preme aquí.
14/09/2021. OUTRAS
A Secretaría Xeral de Política Lingüística da Xunta de Galicia convoca probas para a obtención dos certificados de lingua galega (niveis Celga 2, 3 e 4). As probas realizaranse en Santiago de Compostela e en Ponferrada. As datas definitivas de realización das probas podes consultalas no DOG do 27 de outubro de 2021. O prazo de presentación de solicitudes é de 15 días hábiles, contados a partir do día seguinte ao da publicación desta convocatoria.
09/09/2021. DINAMIZACIóN
O Servizo de Normalización Lingüística do Concello do Grove está a organizar o programa "Bicos con lingua. Unidade didáctica", que se desenvolverá durante os meses de setembro e outubro de 2021 e que ten como obxectivo dinamizar o uso da lingua galega entre a mocidade. O programa inclúe diferentes accións de carácter lúdico e didáctico, como a presentación da obra "Bicos con lingua" (de Talía Teatro), a difusión dunha unidade didáctica sobre esta mesma obra teatral entre o profesorado de Lingua Galega dos institutos de secundaria do concello, a organización dun certame de TikTok para poñer en valor a variedade dialectal falada no Grove, ou a impartición entre o alumnado da ESO da charla "Xeliña fala galego. Un modelo de escritora monolingüe", a cargo da profesora Patricia Arias Chachero. Para ampliar información, preme aquí.
09/09/2021. CURSOS E CONGRESOS
A Comisión de Normalización Lingüística da Facultade de Ciencias da Comunicación da USC organiza un obradoiro de podcast, dirixido a toda a comunidade universitaria e deseñado para fomentar a creación de contidos dixitais no noso idioma. O curso, de 15 horas de duración, será impartido por Ana González Liste, Cibrán Tenreiro, Duarte Romero e Miguel Rodríguez, coñecidos creadores de contidos dixitais en galego. As sesións terán lugar os días 27 e 30 de setembro; e 4, 7 e 14 de outubro de 2021. O prazo de inscrición remata o vindeiro 22 de setembro. Podes ampliar información sobre os contidos e os trámites da matrícula, premendo aquí.
08/09/2021. OUTRAS
O Álbum de Galicia, colección dixital de biobibliografías do Consello da Cultura Galega, acaba de incorporar a entrada de Xoán Manuel Pintos (Pontevedra, 1811 - Vigo, 1876). Xurista de profesión, destacou polo seu activismo cultural e pola súa defensa da lingua galega, e como autor literario (cunha obra poética practicamente monolingüe en galego), está considerado coma o precursor do Rexurdimento Galego. Desde o punto de vista filolóxico, foi tamén un importante lexicógrafo. O texto biográfico que presentamos, asinado por María do Carme Ríos Panisse, está acompañado doutros recursos documentais (bibliografía, galería fotográfica, recursos en liña...), que permiten achegarse desde diferentes ópticas á vida e obra deste autor.
02/09/2021. AXUDAS E PREMIOS
A Asociación Galega de Profesionais da Tradución e da Interpretación (AGPTI) convoca a cuarta edición do Premio Xela Arias, creado para recoñecer o labor de empresas, entidades ou persoas que contribúan á promoción do uso do galego no mercado da tradución e da interpretación. Todas as persoas interesadas en presentar candidaturas teñen de prazo ata o vindeiro 15 de setembro de 2021 para enviar un correo electrónico a info@agpti.org co nome da candidata ou candidato e os motivos polos que se considera que merece o premio. Podes obter máis información sobre esta iniciativa premendo aquí.
27/08/2021. EMPREGO
O Concello de Carballo publica as bases da convocatoria para a provisión (como funcionario de carreira, grupo A1) dunha praza de técnico/a de normalización lingüística. O sistema de selección será o de concurso-oposición. Os/as aspirantes deben estar en posesión do título de licenciatura en Filoloxía Galego-Portuguesa, Filoloxía Galega ou Filoloxía Hispánica (subsección Galego-Portugués), grao en Lingua Galega, ou calquera outra licenciatura/grao da área de Humanidades ou ciencias xurídicas e Sociais, sempre que se acredite o Celga 5. O prazo de presentación de solicitudes será de 20 días naturais, contados a partir do seguinte ao da publicación do anuncio da convocatoria no Boletín Oficial do Estado (BOE).
26/08/2021. INVESTIGACIóN
O Consello da Cultura Galega presenta a publicación «Da fonte máis fonda». Historia do vocabulario e outros escritos sobre o idioma galego, autoría de Aquilino Iglesia Alvariño. A obra inclúe a versión orixinal do texto «A lengua gallega. Historia do seu vocabulario», escrito por Iglesia Alvariño para ser incluído na Historia de Galiza (dirixida por Ramón Otero Pedrayo), pero que permanecía inédito ata o momento; así como outros traballos do mesmo autor sobre a norma, as ideoloxías lingüísticas e a situación xeral do idioma galego. A maiores, o volume contén tres estudos introdutorios de Ramón Villares, Henrique Monteagudo e Rosario Álvarez, que axudan a contextualizar os textos na súa etapa histórica, cultural e sociolingüística.
24/08/2021. INVESTIGACIóN
A Xunta de Galicia presenta o Dicionario galego-ruso, unha obra lexicográfica con preto de 11.000 lemas deseñada como ferramenta de traballo para lingüistas, tradutores/as, docentes e alumnado que está a aprender os idiomas galego ou ruso. Trátase da primeira achega dun proxecto en continua actualización, que conta poder acadar na súa versión final unhas 40.000 entradas. O dicionario inclúe tanto léxico normativo sancionado pola RAG, como outros termos procedentes de obras de referencia da literatura galega. Podes ampliar información sobre esta iniciativa, así como acceder á obra en formato PDF, premendo aquí.
23/08/2021. CURSOS E CONGRESOS
A Consellería de Cultura, Educación e Universidade convoca cursos de linguaxe administrativa galega (niveis medio e superior en liña) e mais cursos preparatorios para a obtención dos certificados de lingua galega (Celga), que se impartirán nas escolas oficiais de idiomas de Galicia no curso 2021/2022. Os cursos de linguaxe administrativa están dirixidos a empregados/as públicos/as das administracións autonómica e local galegas, e da Administración periférica do Estado en Galicia, exceptuando o persoal docente e sanitario. Aos cursos preparatorios dos Celga poderán asistir todas as persoas maiores de dezaseis anos interesadas. O prazo para presentar as solicitudes abranguerá desde o 1 ata o 10 de setembro de 2021, para os cursos do primeiro cuadrimestre; e desde o 4 ata o 14 de xaneiro de 2022, para os cursos do segundo cuadrimestre. Para consultar o texto completo da convocatoria, preme aquí.
23/08/2021. CURSOS E CONGRESOS
A Coordinadora de Traballadores/as de Normalización da Lingua, en colaboración co Concello de Santiago de Compostela e a Secretaría Xeral de Política Lingüística da Xunta de Galicia, organiza o curso "Ferramentas da educación social ao servizo da normalización lingüística", dirixido especialmente a técnicos/as de SNL, a docentes ou responsables de EDNLG e, en xeral, a traballadores/as do ámbito da normalización da lingua. O curso será impartido por Ana González Quinteiro, educadora social no Concello de Pontevedra, e as sesións desenvolveranse presencialmente os días 27 de setembro e 4 de outubro de 2021 en Santiago de Compostela. O prazo de inscrición será entre o 1 e o 19 de setembro de 2021. Podes ampliar información sobre os contidos e mais os trámites de inscrición premendo aquí.
23/08/2021. AXUDAS E PREMIOS
A Deputación de Pontevedra publicou a resolución das axudas aos concellos da provincia para a creación e mantemento de servizos de normalización lingüística, así como para o desenvolvemento de actividades de dinamización e promoción do idioma galego. Podes consultar a listaxe de entidades beneficiarias premendo aquí.
23/08/2021. AXUDAS E PREMIOS
A Consellería de Cultura, Educación e Universidade publica a resolución das axudas para a edición en lingua galega de recursos didácticos curriculares para niveis non universitarios. Podes consultar a listaxe de entidades beneficiarias no DOG do 17 de agosto de 2021.
23/08/2021. AXUDAS E PREMIOS
A Consellería de Cultura, Educación e Universidade publica, no DOG do 13 de agosto de 2021, a listaxe de entidades beneficiarias das axudas dirixidas á tradución para outras linguas de obras publicadas orixinariamente en galego e á tradución para o galego de obras publicadas orixinariamente noutras linguas. Podes consultar o texto completo da resolución premendo aquí.
23/07/2021. INVESTIGACIóN
A investigadora Marta Díaz Ferro presentou na Universidade de Vigo a súa tese de doutoramento sobre a socialización bilingüe infantil nunha escola de Vigo. O estudo, accesible en formato PDF no repositorio institucional da universidade, analiza o impacto da socialización e alfabetización en galego en nenos de 4 e 5 anos procedentes de familias castelanfalantes e bilingües galego-castelán. Entre as súas conclusións Marta Díaz afirma que "o bilingüismo conseguido, na etapa estudada, tenderá a ser aditivo, xa que non se observa que os nenos sufran dunha merma comunicativa por causa do input en galego". A tese contén tamén unha serie de propostas en relación coa vehicularidade do galego no ensino non universitario, confrontando o recollido no Decreto 79/2010 cos resultados da investigación.
23/07/2021. INVESTIGACIóN
O Seminario de Onomástica da Real Academia Galega presenta o estudo "Os nomes dos concellos da provincia da Coruña", autoría de Gonzalo Navaza. Nesta publicación ofrécese un comentario histórico e etimolóxico sobre cada un dos nomes dos 93 concellos coruñeses, indicando os rexistros documentais máis antigos dos que se ten coñecemento, as diferentes evolucións ou alteracións que sufriu o topónimo ao longo do tempo e a explicación sobre o seu significado. Na páxina web da RAG podes consultar tamén a súa colección de traballos sobre onomástica, así como a colección específica Terra Nomeada, na que se compilan estudos toponímicos sobre diferentes concellos galegos.
22/07/2021. EMPREGO
O Concello de Quiroga publica as bases do proceso selectivo para a contratación temporal (ata o 15 de outubro de 2021) dun técnico de normalización lingüística, que desenvolverá o seu traballo na agrupación de concellos de Quiroga e Ribas de Sil. O sistema de selección será o concurso-oposición. Os/as aspirantes deben estar en posesión dalgún dos seguintes graos: Lingua e Literatura Galegas; Estudos de Galego e Español; Galego e Portugués: Estudos lingüísticos e literarios, ou as licenciaturas equivalentes aos ditos graos, ou calquera titulación das áreas de Humanidades ou Ciencias Xurídicas e Sociais (sempre que teñan o Celga 5). O prazo de presentación de solicitudes remata o vindeiro 26 de xullo de 2021. Podes consultar as bases e o modelo de solicitude premendo aquí.
22/07/2021. OUTRAS
Aníbal Otero Álvarez (1911-1974) foi un filólogo lugués, nado na aldea de Barcia, en Ribeira de Piquín, que traballou como enquisador do Atlas Lingüístico de la Península Ibérica, traballo de campo polo que foi detido (e posteriormente condenado) durante o golpe de estado en España de 1936. Así mesmo, tamén nos deixou como legado numerosas contribucións lexicográficas e etimolóxicas, o seu traballo como compilador de romances e as súas creacións literarias. O perfil biográfico de Aníbal Otero, asinado polo profesor Xosé Afonso Álvarez, está xa accesible no Álbum de Galicia do Consello da Cultura Galega, xunto con outros recursos documentais (bibliografía, galería fotográfica e recursos en liña), que conforman o que quere ser un recoñecemento á vida e obra deste lingüista lugués.
19/07/2021. EMPREGO
A Consellería de Cultura, Educación e Universidade publica o concurso público de once bolsas de formación no Centro Ramón Piñeiro para a Investigación en Humanidades. Os/as beneficiarios/as colaborarán nos seguintes proxectos: Legado científico de Jürgen Untermann, Corpus de referencia do galego actual (Corga), Corpus documentale latinum Gallaeciae (Codolga), Bibliografía informatizada da lingua galega (Bilega), Terminoloxía científico-técnica, Informes de literatura, Recuperación de textos literarios e xornalísticos galegos, Lírica profana galego-portuguesa, Bibliografía de Referencia do Arquivo Galicia Medieval (Birmed), Dimensións da identidade colectiva de Galicia e Legados literarios. O prazo de presentación de solicitudes é dun mes, contado a partir do día seguinte ao da publicación desta convocatoria.
15/07/2021. AXUDAS E PREMIOS
A Consellería de Cultura, Educación e Universidade da Xunta de Galicia publica a resolución das subvencións ás entidades locais para o ano 2021, destinadas á creación, mantemento ou reforzamento dos seus servizos de normalización lingüística; así como ao desenvolvemento de programas de dinamización lingüística. Podes consultar a listaxe de entidades beneficiarias premendo aquí. [Listaxe coas modalidades das axudas]
14/07/2021. AXUDAS E PREMIOS
A Deputación da Coruña publica a resolución definitiva das subvencións a concellos e entidades locais da provincia da Coruña para a creación, mantemento e reforzo dos servizos de normalización lingüística durante o ano 2021. Podes consultar o texto completo da resolución, coa listaxe de entidades beneficiarias, premendo aquí.
07/07/2021. CURSOS E CONGRESOS
A Real Academia Galega, a Deputación Provincial de Pontevedra e o Museo de Pontevedra organizan a sexta edición da Xornada de Onomástica Galega, que terá lugar o 16 de outubro de 2021 no Edificio Castelao do Museo de Pontevedra. Coincidindo coa celebración do Ano Santo Xacobeo, nesta ocasión o fío temático da xornada serán os nomes dos lugares do Camiño de Santiago. As persoas interesadas en asistir teñen de prazo para formalizar a súa inscrición ata o 14 de outubro. As sesións tamén se retransmitirán en directo a través da páxina web da RAG. Para ampliar información, preme aquí.
07/07/2021. AXUDAS E PREMIOS
O xurado da cuarta edición do Premio Luís Porteiro Garea acordou por unanimidade entregar o galardón a Antonio Rigueiro Rodríguez, catedrático no Departamento de Produción Vexetal e Proxectos de Enxeñaría da USC. O xurado salientou, entre outros méritos, o seu labor docente exclusivamente en lingua galega, a súa traxectoria de divulgador científico no noso idioma e a súa participación activa na elaboración e estandarización da terminoloxía galega no seu ámbito de especialidade.
A Universidade de Santiago de Compostela outorga ese galardón, que ten carácter de distinción, para recoñecer publicamente o traballo de persoas ou colectivos a prol do uso do galego na universidade. Podes ampliar esta información premendo aquí.
A Universidade de Santiago de Compostela outorga ese galardón, que ten carácter de distinción, para recoñecer publicamente o traballo de persoas ou colectivos a prol do uso do galego na universidade. Podes ampliar esta información premendo aquí.
05/07/2021. OUTRAS
O Plenario da Real Academia Galega acordou, na sesión ordinaria do 2 de xullo de 2021, que o autor homenaxeado no Día das Letras Galegas 2022 será Florencio Delgado Gurriarán (Córgomo, Vilamartín de Valdeorras, 1903 – Fair Oaks, California, 1987). Avogado de formación, foi poeta, articulista, tradutor, editor literario e intelectual de referencia no activismo cultural e político do exilio en México. No eido literario, é autor dos poemarios Bebedeira (Editorial Nós, 1934), Galicia infinda (Galaxia, 1963), Cantarenas (Ediciós do Castro, 1981) e O soño do guieiro (Ediciós do Castro, 1986). Así mesmo, a súa estreita colaboración con outros autores galegos no exilio deu como froito colectáneas poéticas como Cancioneiro da loita galega (1943) ou o volume Poesía inglesa e francesa vertida ao galego (1946). Tamén foi un dos fundadores de Vieiros. Revista do Padroado da Cultura Galega de México (1959-1968). En 1981 foi elixido membro correspondente da Real Academia Galega. A través da homenaxe a Delgado Gurriarán, a RAG quere recoñecer o importante labor cultural do exilio republicano en México. Para ampliar esta nova, preme aquí.
05/07/2021. DINAMIZACIóN
A Asociación Socio-Pedagóxica Galega convoca a vixésima edición do concurso de relato oral "Tíralle da lingua", un proxecto dirixido ao alumnado e ao profesorado co obxectivo de incentivar e normalizar o uso oral do idioma galego. Os participantes poderán contar historias en galego, de base popular, de base literaria ou de creación propia. O prazo de inscrición remata o vindeiro 19 de novembro de 2021. A fase final do concurso celebrarase a finais de novembro en Santiago. Podes consultar as bases do concurso premendo aquí.
01/07/2021. EMPREGO
O Parlamento anuncia, no Diario Oficial de Galicia do 30 de xuño de 2021, a convocatoria do proceso selectivo para cubrir dúas prazas da escala técnica de publicacións do corpo superior desta institución. O sistema de selección será o de oposición. Os/as aspirantes deben estar en posesión ou en condicións de obter o título de licenciado/a ou grao en Filoloxía ou o título de licenciado/a ou grao en Tradución, na data de remate do prazo de presentación de solicitudes. O prazo é de 20 días naturais, contados a partir do seguinte ao da publicación da convocatoria.
01/07/2021. DINAMIZACIóN
Como xa é costume por estas datas, o Servizo de Normalización Lingüística do Concello de Vigo organiza unha nova edición do programa No verán... un conto, unha iniciativa dirixida a público infantil e familiar, que ten como obxectivo fomentar o uso do galego no ámbito do lecer durante os meses estivais. O programa inclúe contos, música, poesía, teatro, regueifas... A entrada é libre en todas as actividades. Para ampliar información sobre as datas, horarios e lugares de celebración, preme aquí.
29/06/2021. OUTRAS
A Biblioteca de San Lorenzo de El Escorial acaba de inaugurar o espazo web da súa biblioteca dixital coa publicación en liña dos dous códices das Cantigas de Santa María que custodia Patrimonio Nacional: o Códice Rico e o Códice dos músicos. Coincidindo co aniversario do nacemento de Afonso o Sabio, a comezos deste ano 2021 a Real Academia Galega solicitoulle a Patrimonio Nacional a posta ao dispor do público destes dous códices, xa que dos catro que compoñen a colección das Cantigas de Santa María, eran os que aínda non estaban accesibles en versión dixital. Os outros dous manuscritos son o Códice de Toledo, que custodia a Biblioteca Nacional de España, e o Códice de Florencia, conservado na Biblioteca Nacional Central de Florencia. Se queres saber máis sobre a pegada de Afonso X na historia e cultura galegas, preme aquí.