O Instituto de Ganadería de Montaña, centro mixto do Consejo Superior de Investigaciones Científicas (CSIC) e da Universidade de León, difunde no seu web o Calendario científico escolar 2020, unha iniciativa dirixida ao alumnado de primaria e ESO que recolle en cada día do ano un aniversario científico ou tecnolóxico (nacementos de investigadores e investigadoras de renome, avances científicos, curiosidades...). Ademais do calendario, tamén está accesible para descarga unha guía didáctica con orientacións e actividades adaptadas aos diferentes niveis educativos. Estes materiais están dispoñibles en castelán, galego, éuscaro, catalán e asturiano.
14/01/2020. OUTRAS
14/01/2020. DINAMIZACIóN
A Secretaría Xeral de Política Lingüística presenta o programa Lingua rodada, deseñado para fomentar o uso do galego entre o alumnado, promovendo unha imaxe positiva do idioma a través da creación audiovisual. O programa está dirixido a alumnado de centros públicos que curse ensinanzas de educación secundaria (ESO, 1º de bacharelato, formación profesional básica e ciclos formativos de grao medio) e especiais de grao medio. A acción principal consistirá na celebración dun certame de creación de vídeo-relatos que se desenvolverá en tres fases. O alumnado participante na obra gañadora poderá realizar a gravación do seu vídeo-relato cun equipo de profesionais do audiovisual, durante unha convivencia de dous días no rural galego. Así mesmo, terá a oportunidade de asistir á presentación da súa obra na XVII edición do Festival de Cans. O prazo de inscrición neste programa remata o 3 de febreiro de 2020. Podes ampliar información sobre a iniciativa premendo aquí.
10/01/2020. EMPREGO
O Concello de Pontedeume publicou no BOP da Coruña do 27 de decembro a súa oferta de emprego público para 2019. Ofrece unha praza de persoal laboral de técnico/a de normalización lingüística, grupo 2, nivel 20 (acceso libre). No BOP de Ourense da mesma data podes consultar tamén a oferta de emprego público da Deputación. Nela inclúese unha praza de tradutor/a de lingua galega (A1), que se cubrirá polo sistema de oposición libre. Por último, o 31 de decembro, no BOP da Coruña publícase a oferta do Concello de Miño. Recolle unha vacante de persoal laboral fixo, ocupada temporalmente, grupo A1, nivel 20.
27/12/2019. OUTRAS
O Instituto Nacional de Estadística (INE) fixo públicos os datos sobre a produción editorial de libros en 2018, unha estatística de periodicidade anual que elabora o INE para facilitar información sobre o número e as características dos libros e folletos editados en España. No ano 2018 editáronse en galego 1.144 títulos (o 1,8% do total de títulos editados no Estado), rompendo a tendencia á baixa que se viña experimentado nos dous últimos anos (consultar datos de edición en galego no conxunto do Estado en anos anteriores). No que respecta aos datos da edición en Galicia, o número total de títulos editados incrementouse un 6,7% con respecto ao 2017. En concreto, en 2018 editáronse en Galicia 1.998 títulos, o 45% deles en galego. No web do INE podes consultar tanto os datos completos da produción editorial de 2018 coma os resultados de anos anteriores. Tamén tes ao teu dispor un resumo coas cifras máis salientables de 2018.
27/12/2019. OUTRAS
O Portal das Palabras, proxecto promovido pola Real Academia Galega e a Fundación Barrié, anuncia que o termo elixido como Palabra do Ano 2019 por votación popular (tras recibir o 51% dos votos emitidos) foi sentidiño. A palabra elixida deriva de “sentido” e, en concreto, fai alusión á cuarta acepción que o dicionario da RAG recolle para este termo: "capacidade mental de actuar de maneira razoable e correcta". Neste caso o sufixo derivativo -iño engade o matiz de "calidade de sensato", convertendo “sentidiño” en equivalente de “sentido común”, que o mesmo dicionario da RAG define como “calidade ou capacidade de xulgar e actuar cabalmente, bo xuízo”. Podes ampliar información sobre esta nova premendo aquí.
27/12/2019. OUTRAS
A Área de Normalización Lingüística (ANL) da Universidade de Vigo publica o manual Na universidade onde queiras pero coa lingua, onde se ofrecen pautas lingüísticas para o emprego correcto do galego, tanto no que respecta aos usos orais coma escritos. Trátase do terceiro manual destas características que publica a ANL, introducindo cuestións que non foran tratadas nos dous anteriores (Na universidade en galego sen dúbida e Na universidade en galego con seguridade), e incidindo naquelas cuestións ortográficas, fonéticas, morfolóxicas e léxicas nas que se detectan máis eivas nos textos universitarios revisados. Podes completar esta nova premendo aquí.
26/12/2019. OUTRAS
A Real Academia Galega (RAG) e a Xunta de Galicia presentan a plataforma Galicia Nomeada, unha nova ferramenta dixital que permite a recolleita, xeorreferenciación e difusión da microtoponimia galega de xeito colaborativo e en liña. Ademais da versión de escritorio, tamén están dispoñibles dúas aplicacións para móbiles (unha para Android e outra para IOS). Todos os particulares ou asociacións que desexen colaborar no proxecto poden rexistrarse e facer as súas achegas. Os novos topónimos facilitados polos usuarios/as serán revisados por un equipo de especialistas do Seminario de Onomástica da RAG e, unha vez validados, poderán consultarse a través do web Toponimia de Galicia. Podes ampliar esta nova premendo aquí.
20/12/2019. INVESTIGACIóN
O Consello da Cultura Galega (CCG) presenta a publicación “Textos científicos en galego 1939-1975”, que xa podes consultar e descargar desde o noso web. O CCG, consciente da necesidade de material en lingua galega para traballar contidos científicos no ámbito educativo, iniciou en 2016 o proxecto “Ciencia en Galego”, co ánimo de ofrecerlles aos centros de ensino unha selección dos traballos científicos máis relevantes escritos no noso idioma. O proxecto, dirixido por Francisco Díaz-Fierros, botou a andar naquel momento cunha primeira achega que compilaba os textos científicos do período histórico que vai de 1916 a 1936, e complétase agora con esta segunda compilación que abrangue a época franquista (1939-1975).
20/12/2019. AXUDAS E PREMIOS
A Axencia Galega das Industrias Culturais (Agadic) convoca axudas para o ano 2019 destinadas á creación de obras audiovisuais, en versión orixinal en lingua galega, con decidida vocación artística e cultural. En concreto, subvenciónase a escrita individual de guións en galego, a realización de proxectos de curtametraxes gravadas en versión orixinal galega e a elaboración de proxectos de longametraxes cinematográficas en versión orixinal galega. O prazo para a presentación de solicitudes é dun mes, contado a partir do día seguinte ao da publicación desta convocatoria.
20/12/2019. AXUDAS E PREMIOS
O Concello de Ames entregou o pasado mércores, 18 de decembro de 2019, os galardóns aos gañadores/as da segunda edición do Premio Lingua e Empresa. Nesta ocasión, o xurado decidiu por unanimidade outorgar o premio ex aequo a tres empresas do municipio: Petiscos Gastrobar, Cenlitrosmetrocadrado e Escola de Estudos Musicais Allegro. O Concello de Ames botou a andar o ano pasado este certame co obxectivo de promover o galego na actividade económica e premiar o compromiso das empresas municipais coa nosa lingua. Para ampliar información preme aquí.
19/12/2019. CURSOS E CONGRESOS
A Confederación Intersindical Galega (CIG) e a Asociación Socio-Pedagóxica Galega (AS-PG) organizan a xornada "O galego no ensino. O ensino en galego", que terá lugar o vindeiro 25 de xaneiro de 2020 no IES As Fontiñas, en Santiago de Compostela. Nesta xornada, dirixida aos docentes do ensino non universitario, exporanse os modelos lingüísticos vixentes nos sistemas educativos de Cataluña e o País Vasco, reflexionarase sobre a repercusión do “Decreto do plurilingüismo” na situación actual da lingua galega e poranse en común diferentes experiencias normalizadoras que se están a desenvolver en centros de ensino galegos. O prazo de matrícula remata o 24 de xaneiro de 2020.
18/12/2019. DINAMIZACIóN
A Secretaría Xeral de Política Lingüística e a Dirección Xeral de Educación, Formación Profesional e Innovación Educativa da Xunta de Galicia publican unha nova edición da convocatoria de premios para a animación en galego, no marco do programa “Nós tamén creamos!” 2019-2020. Outorgarase un premio para cada unha das tres categorías que establece o certame: curtas con alumnado de segundo ciclo de educación infantil; curtas con alumnado de primeiro e segundo de educación primaria; curtas con alumnado de terceiro e cuarto de educación primaria. O prazo para presentar a solicitude de participación remata o 20 de xaneiro de 2020. Para consultar as bases completas da convocatoria, preme aquí.
17/12/2019. OUTRAS
A Real Academia Galega (RAG) fai pública a través da súa páxina web a “Declaración da Real Academia Galega verbo dos acordos do Comité de Ministros do Consello de Europa sobre a Carta Europea de Linguas Rexionais e Minoritarias”, onde se congratula dos acordos adoptados polo Comité de Ministros do Consello de Europa e insta ás autoridades do Estado español e, nomeadamente, da Comunidade Autónoma de Galicia, a seguir as recomendacións expresadas no quinto informe do Comité de Expertos deste organismo internacional. A RAG lembra que o Decreto 79/2010 , do 20 de maio, para o plurilingüismo no ensino non universitario de Galicia é totalmente contraditorio cos compromisos adquiridos polo Goberno español ao ratificar a Carta Europea das Linguas Rexionais e Minoritarias, polo que remata o seu comunicado reclamando a necesidade de “que Galicia se dote dun modelo educativo que garanta os dereitos dos galegofalantes e asegure a vitalidade do noso idioma”.
17/12/2019. DINAMIZACIóN
O pasado sábado, 14 de decembro de 2019, tivo lugar na Coruña a primeira reunión formal da Comunidade de Creadores de Contido en Galego, unha iniciativa que ten como obxectivo reunir a persoas interesadas na creación de contidos en galego de todo tipo (blogs, podcasts, literatura, artes escénicas, artes gráficas, música, dixital, etc.). Todos/as os/as creadores/as que desexen participar neste foro terán a oportunidade de asistir a xuntanzas mensuais para compartir experiencias e ideas que contribúan a mellorar o traballo que xa se está a facer no ámbito da creación de contidos no noso idioma. A inscrición é libre e gratuíta, só cómpre cubrir este formulario web.
17/12/2019. AXUDAS E PREMIOS
A Cámara de Comercio e o Concello de Santiago de Compostela deron a coñecer os galardoados da vixésima edición dos Premios Manuel Beiras. Os premiados deste ano foron Strelia Electrotecnia, na categoría de empresas que veñen realizando un uso continuado do idioma galego; Numax, na categoría de nova incorporación ao uso do galego; e a Agrupación Folclórica Cantigas e Agarimos, que recibiu unha mención especial polo seu compromiso co idioma galego ao longo dos seus 98 anos de historia. Se precisas máis información, preme aquí.
17/12/2019. DINAMIZACIóN
O Servizo de Normalización Lingüística do Concello de Vigo presenta unha nova edición do programa “No Nadal… un conto”, que se desenvolverá entre o 15 de decembro de 2019 e o 4 de xaneiro de 2020 en diferentes lugares do concello. A iniciativa, que ten como obxectivo crear espazos de lecer en galego para o público familiar e infantil, inclúe obradoiros de ilustración, contadas, música e xogos, entre outras actividades. O acceso é libre e gratuíto, agás naquelas actividades que se organizan no Verbum e no Auditorio do Concello, para as que cómpre invitación.
13/12/2019. AXUDAS E PREMIOS
A Secretaría Xeral de Medios da Xunta de Galicia publica a resolución da convocatoria de subvencións para o ano 2019 destinadas a empresas que realizan publicacións periódicas escritas integramente en galego. Podes consultar a listaxe de empresas beneficiarias premendo aquí.
12/12/2019. LEXISLACIóN
O Consello de Europa publica o quinto Informe de seguimento do cumprimento da Carta Europea de Linguas Rexionais e Minoritarias, avaliación periódica que elabora o Comité de Expertos para analizar o grao de cumprimento dos compromisos que o Goberno español asumiu ao ratificar este tratado internacional. No que respecta ao galego en Galicia, o Comité de Expertos sinala a diminución de falantes e a perda da transmisión xeracional e, como xa fixera en informes anteriores, volve recomendar que de xeito inmediato se eliminen as limitacións para o ensino en galego en todos os niveis educativos, se modifique a Lei Orgánica do Poder Xudicial para garantir o uso do galego nos procedementos xudiciais, cando unha das partes o solicite, e se incremente o uso do galego na Administración do Estado en Galicia. Con respecto ao galego exterior, recoméndase con urxencia incluír o nome de “galego-asturiano” no Estatuto de Autonomía de Asturias, desenvolver unha política estruturada para a protección deste idioma na rexión do Eo-Navia, adoptar medidas para protexer o galego en Castela e León e actuar tamén de xeito inmediato para protexer a fala/galego en Estremadura. Se queres consultar os informes de seguimento de períodos anteriores (así como os correspondentes informes estatais), preme aquí.
11/12/2019. INVESTIGACIóN
O Instituto da Lingua Galega (ILG) presenta LEDIGAL, un novo recurso web que permite coñecer a variación sociolingüística no léxico dispoñible do galego, entendendo por léxico dispoñible aquel que se presenta na mente dos falantes de xeito inmediato e natural cando se trata de determinado ámbito temático. Tomando como base o traballo Léxico dispoñible do galego (2014), realizado por Belén López Meirama e María Álvarez de la Granja a partir de datos obtidos de 800 estudantes de segundo de bacharelato durante o curso 2008-2009, o ILG elaborou esta aplicación que che permitirá correlacionar os lemas e as variantes concretas escritas polas/polos estudantes con diferentes variables sociais e sociolingüísticas (lingua inicial, lingua habitual, nivel sociocultural, etc.). Para coñecer máis sobre o proxecto, preme aquí.
10/12/2019. AXUDAS E PREMIOS
O Parlamento de Galicia, a Secretaría Xeral de Política Lingüística e o Foro Enrique Peinador entregaron onte, 9 de decembro, na sede do Parlamento galego os XXVI Premios de Publicidade en Galego. Nesta edición, na categoría de radio resultou galardoada a campaña “Benvidos Novos Larseiros!”, elaborada pola axencia BAP Conde para a empresa Larsa. Nas categorías de televisión e de prensa escrita, o traballo gañador foi “Martín Códax, Fillo do Atlántico”, da axencia &Rosás para Martín Códax. O anuncio “Queixos HOXE”, da axencia Pío García Audiovisuais S.L. para a Cooperativa HOXE, recibiu o premio na categoría de Internet. Por último, na categoría de centro educativo resultou gañador o traballo “Stop_Bullyng”, do IES Leixa de Ferrol. Para ampliar información, preme aquí.
09/12/2019. DINAMIZACIóN
O colectivo Galeguiza-T, composto por un grupo de estudantes do IES Neira Vilas de Oleiros que participan activamente no Equipo de Dinamización da Lingua Galega do centro, está a difundir nas redes a iniciativa Nova antoloxía da música galega contemporánea, unha lista de Spotify con máis de 200 artistas ou grupos contemporáneos que fan música en galego. O obxectivo é difundir entre a mocidade a riqueza e diversidade da música feita no noso idioma, que abrangue estilos tan variados coma o trap, o reggaeton, o death metal, o heavy, a bachata, a cumbia, o indie ou o jazz, entre outros.
03/12/2019. OUTRAS
O pasado 30 de novembro, no marco da feira Culturgal, tivo lugar a presentación pública do número 0 de Nós Diario, unha iniciativa xornalística en lingua galega que comezará a editarse de xeito regular a partir do vindeiro 2 de xaneiro de 2020. O xornal, dirixido por María Obelleiro, terá versión en papel e dixital, e tratará temas como o feminismo, o ecoloxismo, a lingua, a historia, a memoria, os movementos sociais, a economía ou a diáspora (entre outros), sempre desde a perspectiva galega. Tanto este número cero de Nós Diario, coma o número cero do semanario Sermos Galiza, que acompañará o diario todos os sábados, están xa accesibles en liña.
03/12/2019. DINAMIZACIóN
O Portal das Palabras, proxecto da Real Academia Galega e a Fundación Barrié, organiza unha nova edición da iniciativa Palabra do ano, co obxectivo de que a sociedade tome conciencia de que o idioma nos representa como pobo e a través das súas palabras podemos definir colectiva e simbolicamente o ano que remata. Todas as persoas interesadas poden enviar as súas propostas ata o vindeiro 15 de decembro. Tras seleccionar os termos máis repetidos ou que representen unha temática compartida por diferentes participantes, abrirase un novo período de votación entre o 16 e o 25 de decembro para seleccionar a palabra do ano 2019.
02/12/2019. AXUDAS E PREMIOS
O pasado venres, 29 de novembro, déronse a coñecer, nunha gala celebrada en Santiago de Compostela, os/as galardoados/as da terceira edición do Proxecto Youtubeir@as, un concurso de creación de vídeos que ten como obxectivo promover o uso do galego na canle Youtube. Os traballos premiados/as nas distintas categorías son: “O radón: malos modais para un gas nobre”, de Aarón Vilariño (mellor vídeo-facermos); “Formación dos cantís”, de Xacobo de Toro e Rocío Romar (mellor vídeo-opinarmos); “O queimaserebros”, de Blanca e Tinta (mellor vídeo-cantarmos); Aquel-e (mellor canle); “Cativos na Cociña”, de Siradella Films (creatividade); “Malaxente”, de MJ Pérez (eficiencia comunicativa); “Quero fugir”, de Aarón Vilariño (calidade técnica); “21 días improvisando”, de A Rabela (calidade lingüística) e “Flow do Toxo” (proposta youtubeira).
02/12/2019. EMPREGO
A Universidade de Santiago de Compostela convoca un concurso público para a elaboración de listas de agarda de persoal docente e investigador contratado interino para cubrir necesidades docentes urxentes e inaprazables de distintas áreas de coñecemento para o curso académico 2019/20. Entre as áreas de coñecemento para as que se convoca esta lista de agarda está a de “Filoloxías Galega e Portuguesa”. A maiores dos requisitos xerais indicados no texto da convocatoria, os participantes deben estar en posesión da titulación de grao e máster oficial, ou ben de licenciatura, arquitectura, enxeñaría ou equivalente. As solicitudes deberán presentarse no prazo de dez días hábiles contados a partir do seguinte ao de publicación da convocatoria no Diario Oficial de Galicia.
29/11/2019. DINAMIZACIóN
Un ano máis por estas datas, A Mesa pola Normalización Lingüística convídate a consultar o seu Catálogo de Nadal 2019, que compila as diferentes propostas de agasallos en galego que ofrecen as empresas adscritas ao proxecto Abertos ao Galego. O obxectivo é achegarlles aos potenciais consumidores ideas de agasallos para esas datas festivas e, ao mesmo tempo, fomentar un consumo responsable que aposte pola calidade, a proximidade e o idioma.
28/11/2019. DINAMIZACIóN
A Deputación de Pontevedra publica as bases do programa Musigal 2020, deseñado para contribuír á difusión e á promoción da música galega e en galego nos concellos da provincia de Pontevedra. Poden inscribirse no programa artistas ou grupos musicais profesionais que traten de xeito específico contidos sociolingüísticos e de dinamización da lingua galega e que fagan música en galego nos seus concertos ou, no caso de ser instrumentais, que as súas pezas sexan de autoría galega. O prazo de inscrición remata o 20 de decembro de 2019. Unha vez que se faga pública a relación de artistas e grupos inscritos, os concellos da provincia con menos de 50.000 habitantes terán de prazo ata o 24 de xaneiro de 2020 para tramitar as súas solicitudes de actuacións. Para consultar as bases completas do programa, preme aquí.
28/11/2019. OUTRAS
Elhuyar, fundación para a divulgación da ciencia, a tecnoloxía e o desenvolvemento do éuscaro, presenta o seu novo tradutor automático multilingüe Itzultzailea. Trátase dunha ferramenta baseada na intelixencia artificial e nas redes neuronais que permite a tradución entre cinco idiomas: éuscaro, castelán, francés, catalán e galego. Ademais da versión web, tamén está accesible a aplicación para móbil deste tradutor. Neste momento xa podes descargar a versión para Android e en breve estará tamén dispoñible a versión para IOS.
28/11/2019. DINAMIZACIóN
A Real Academia Galega e a Secretaría Xeral de Política Lingüística coordinan a terceira edición do programa Topinimízate. Falámosche dos nomes da túa terra, que ten como obxectivo preservar e divulgar o patrimonio toponímico galego. No marco desta iniciativa, neste último trimestre de 2019 están a desenvolverse unha serie de charlas divulgativas en quince concellos adscritos á Rede de Dinamización Lingüística da Xunta de Galicia. Nestas charlas, o técnico do Seminario de Onomástica da RAG, Vicente Feijoo, ofrece información sobre a orixe e o significado dos topónimos de cada concello. Os asistentes tamén poderán familiarizarse con ferramentas coma o
"Buscador de topónimos", que permite localizar a microtoponimia recollida ata o momento, ou coa futura aplicación colaborativa “Galicia nomeada”, coa que a cidadanía poderá xeolocalizar aqueles microtopónimos que aínda non están recollidos.
"Buscador de topónimos", que permite localizar a microtoponimia recollida ata o momento, ou coa futura aplicación colaborativa “Galicia nomeada”, coa que a cidadanía poderá xeolocalizar aqueles microtopónimos que aínda non están recollidos.
27/11/2019. AXUDAS E PREMIOS
O xurado dos Premios da Cultura Galega fixo públicos os/as oito galardoados/as que son recoñecidos/as este ano 2019 polo seu labor no ámbito da creación, conservación e difusión cultural. Na categoría de Lingua, nesta edición outorgóuselle o premio a Pilar Ponte Patiño, profesora do IES da Pobra do Caramiñal e promotora do proxecto “21 días co galego”. Nas restantes categorías, os galardoados/as son Xesús Alonso Montero (Letras), Soledad Penalta (Artes Plásticas), Monicreques de Kukas (Artes Escénicas), Amancio Prada (Música), “O sabor das margaridas” (Audiovisual), a restauración do Pórtico da Gloria (Patrimonio Cultural) e “Galego en Londres” (Proxección Exterior). Para ampliar esta información, preme aquí.