Ricardo Portela: Un canto de estima

Documental que dá conta da vida, obra e legado do gran gaiteiro Ricardo Portela (1920-1992), producido por aCentral Folque para o Consello da Cultura Galega.

O equilibrio dos extremos

Foto: Gonzalo Vázquez Pozo

A prestixiosa publicación Asymptote -unha das principais revistas literarias online mundiais que conta xa con traballos de 121 países e 103 idiomas nos ámbitos da poesía, ficción, non ficción, drama e entrevistas a persoas da creación literaria e tradución-  faise eco da poesía galega contemporánea. Así, vén de publicar unha escolma de poemas de 8 poetas galegos coas súas traducións verquidas ao inglés. Podes ler os versos de Manuel Rivas, Chus Pato, Gonzalo Hermo, Eva Veiga, Luz Pozo, Alba Cid, Lara Dopazo e Ismael Ramos e as súas versións inglesas realizadas por Jacob Rogers, Jonathan Dunne,  Lorna Shaughnessy, Kathleen March, Laura Cesarco Eglin, Erin Moure, Neil Anderson, Harriet Cook and Patrick Loughnane. Moitos deles podes mesmo escoitalos nas súas propias voces. Non é o caso de Luz Pozo Garza, a quen a morte veu visitar antes da publicación desta revista.  Mais non quixemos deixala sen voz. Nove voces amigas len a súa escolma poética en galego e a tradutora fai o propio coas traducións ao inglés publicadas na revista. Pepe Cáccamo, Yolanda Castaño, Xavier Seoane, Gonzalo Vázquez Pozo, Olivia Rodríguez, Eva Veiga, Cesáreo Sánchez Iglesias, Xesús Alonso Montero, Carme Blanco e Kathleen March conforman estes dez raios de Luz para unha memoria solar. Ao fío da saída de Asymptote e con este especial, o Consello da Cultura Galega quere homenaxear a Luz Pozo Garza, unha poeta xa canónica da literatura galega de todos os tempos. Os seus versos servirán para alumear este verán de nubes e claros.

ordeno o cuarto sen atopar o centro      amor
e digo      amor      pero xa sen ganas
como imaxino que o di a xente que xa non
parellas collidas da man pola Alameda
ás tardes camiño o cuarto      amor
e é unha lección de baile
as cousas que memorizamos para ter algo 
que repetir en lugar de saltar
camiño o cuarto nese equilibro de
non querer dicir      amor      por medo 
a que alguén escriba un poema
ou teza un tapiz
e non vexa como entra o vento 
no cuarto      amor
tan estrema a punta das follas
a ansia das árbores 
o vento que o desordena todo e me deixa só
tan canso     amor
para volver comezar

	        A unidade componse.
		Da desorde.

Desordénome, amor,
e dou co punto
único
do centro dos abrazos.

Abrazo a desorde das ideas
e sei
que a unidade se compón.

		A unidade componse.

		Da desorde.

De  Intempériome

Kathleen Nora March naceu en Rochester (NY) e formouse como especialista en estudos hispánicos, latinoamericanos e portugueses; na actualidade é catedrática emérita de Español na University of Maine. En 1975 veu a Galicia para investigar sobre a poesía de Manuel Antonio e aquí quedou prendida, galega por elección. Estudou a obra de, entre outros, Carvalho Calero, Castelao, Luz Pozo, Xohana Torres, Rosalía de Castro, Álvaro Cunqueiro e Otero Pedrayo. As súas traducións constitúen outra faceta dun traballo académico imprescindíbel, que axudou á proxección da literatura galega no ámbito anglosaxón.