Miro Casabella: Miro canta as súas canciós. Edigsa/Xistral. Barcelona, 1968. [ficha catalográfica]
Festas galegas. Hermifono. Bos Aires, 1965. [ficha catalográfica]


Todo este fondo está catalogado en formato marc en Koha, o sistema integrado de xestión de biblioteca que emprega o catálogo colectivo da Rede de Bibliotecas de Galicia.

Acceso ao catálogo

Para unha consulta rápida dos fondos editados, ofrecémoslles a lista-inventario. Os datos que se facilitan son: intérprete, título disco, soporte, nº currens, ano edición. A lista vai alfabetizada polo intérprete. As siglas dos soportes corresponden a: CD (compact disc), SCD (single de compact disc), SI (single vinilo), LP (vinilo longa duración), CA (casete), OO (disco de lousa ou de pasta), DVD (digital video tape), CD-DVD (compact disc + digital video tape). Estas siglas van acompañadas de –L cando o soporte audio vén complementado cun libriño.

Contidos:


Fondos discográficos por ano de edición no ASG.

Ao tratarse dunha colección de soportes discográficos editados, é a música a protagonista case absoluta desta parte dos fondos do Arquivo Sonoro de Galicia. Non obstante, tamén existen documentos editados que recollen fondos orais (contacontos, voces de persoeiros, voces literarias…).



A produción discográfica galega non é allea á situación cultural de Galicia. Nos anos 60, Voces Ceibes ten que gravar en Barcelona os seus discos baixo o selo Edigsa-Xistral, co alento, dende aquí, de Manuel María. Cos anos, xorden discográficas que favorecen a difusión da música galega, especialmente das músicas folk e tradicional, e que axudan a reivindicar e conformar os nosos sinais identitarios.

O proceso de normalización, e mesmo de globalización, que sofre a cultura galega en xeral ⸺e a música como unha das súas manifestacións⸺ comporta unha apertura e a incorporación de novos estilos musicais (rock, pop, punk, indie, blues, jazz...). Tamén a creación das dúas orquestras sinfónicas públicas (Real Filharmonía de Galicia e Orquestra Sinfónica de Galicia) resolve, aínda que polo de agora timidamente, a disposición de gravacións dos nosos compositores da chamada “música clásica ou culta”.



Dúo 2x4 (Genaro Fernández e José Manuel Yáñez): Marcial del Adalid. Integral de obras para piano a catro mans. A Coruña : Fundación Paideia, 2010 [Ficha catalográfica]


Andrés do Barro. A rapaciña, chora. Barcelona: Belter, 1974 [Ficha catalográfica]



No Arquivo Sonoro de Galicia atópase unha boa mostra de todos os xéneros musicais feitos por músicos galegos (compositores, intérpretes, produtores e técnicos). Seguimos a traballar para recompilar o amplo número de traballos discográficos que existen para que poidamos preservalos e poñelos a disposición dos nosos estudosos e investigadores.
Facemos un chamamento público para que nos axuden nesta continua procura de “vellos discos”.

E non só dos rexistros históricos. A tiraxe das edicións sempre foi, e continúa a ser, cativa. Hai lagoas que se deben emendar; por exemplo e entre outras, os traballos discográficos das nosas orquestras populares. Tamén cómpre preservar os traballos musicais que xa só se colgan na rede e non teñen soporte físico. O seu seguimento e recompilación é unha tarefa complexa e que require unha atención constante. Precisamos da súa colaboración para que non queden perdidas na rede composicións e interpretacións musicais que deben pasar á historia da música galega.
Se queren colaborar co ASG nesta ampla e perseverante recuperación do noso patrimonio musical, contacten con nós: asonoro@consellodacultura.gal.

Procedencia:

A colaboración de particulares, institucións, músicos e compañías discográficas resulta imprescindible para completar progresivamente a colección e evitar omisións, por outra parte, inescusables.
O Arquivo Sonoro de Galicia está a facer un esforzo de xestión para a recuperación de todo tipo de edicións musicais galegas (lousas, rolos de pianola, vinilos, etc.) que se atopan en mans de particulares. Contamos coa xenerosidade de coleccionistas e particulares para ir sumando documentos sonoros dun alto valor patrimonial con que aumentar a maior colección discográfica en Galicia. A nosa identidade está nesas melodías, defínennos como pobo.