Aínda que datada a finais do século XV ou a comezos do século XVI, na actualidade consérvase en Ourense, na antiga Pena Vixía e actual rúa Hernán Cortés, unha casa cun arco conopial que tería pertencido á liñaxe dos Cadórniga. Na súa arquitectura e decoración plásmase a relevancia socio-política e económica desa familia coa que emparentou dona Beatriz de Castro por vía matrimonial.
