Difusión
Seteventos Podcast
Explora as relacións da cultura galega
Web
Difusión
Seteventos Podcast
Explora as relacións da cultura galega
WebSeteventos Podcast
Nortada, Vendaval, Soán, Poñente, Nordés, Levante e Ábrego son os nomes tradicionais da meteoroloxía popular e mariñeira galega dos ventos segundo a súa dirección de procedencia e dan tamén nome a “Seteventos”, o último proxecto de pódcast do Consello da Cultura Galega (CCG), que aborda as interaccións de Galicia con outros países, culturas ou dinámicas históricas. A presidenta do CCG, Rosario Álvarez, destacou na presentación que o proxecto pretende “amosar a interacción entre Galicia e calquera outra dirección e, de paso, amosar o fondo enorme de gravacións e materiais do CCG”, mentres que o coordinador da Área de Produción de Contidos e Difusión, Manuel Gago, explicou que “encaixa nunha liña da institución de trasladar a cultura galega a todos os formatos”. Na rolda de prensa tamén estiveron Gabri Fuentes e David Gesteira, autores do pódcast, que parte da escolma de fitos, persoas ou acontecementos representativos para conectar con outras zonas do mundo empregando unha narrativa contemporánea. Os sete episodios xa están dispoñibles en Ágora, a plataforma de pódcast do CCG, así como nas principais plataformas: iVoox, Spotify e YouTube.
"Seteventos" estrutúrase en sete episodios guiados polas sete correntes, que se acompañan coas ilustracións de Andrea López. O primeiro episodio, Nortada, aborda as conexións de Galicia con Irlanda e a Bretaña, explorando as correntes culturais e históricas que chegan do norte. O segundo episodio, Vendaval, trae os aires de Portugal, afondando nas relacións de proximidade e intercambio co país veciño. No terceiro episodio, Soán, a mirada amplíase cara a Madrid, mentres que o cuarto, Poñente, abre o horizonte transatlántico cara a México, Cuba, Estados Unidos e Panamá, espazos clave da diáspora galega. No quinto episodio, Nordés, achégase ás influencias europeas. O percorrido continúa con Levante, dedicado ás relacións co Mediterráneo e Asia, e péchase con Ábrego, que mira cara ao sur, á Arxentina e ao Uruguai.
No proxecto participaron máis dunha ducia de nomes, entre os que se atopan Ana Boullón, Xosé Manoel Núñez Seixas, Rebeca Blanco-Rotea e Javier Serrano Alonso, entre moitos outros. O proxecto emprega diferentes técnicas, como diálogos, cortes de audios xa existentes, entrevistas, ficcións sonoras e outros recursos sonoros. Ademais, na web do CCG proporciónanse as ligazóns aos materiais e recursos que se citan en cada unha das historias narradas.
Os episodios
O primeiro episodio afonda na relación entre Galicia e o Atlántico, tomando o celtismo como fío condutor. Arrinca coa recreación dun texto de Plácido Castro sobre os habitantes das Illas Blasket, escrito tras a súa estadía en Irlanda en 1928, e continúa coa análise da súa visión internacionalista e do celtismo galego da man de Xulio Ríos, a través do libro Vocacións e ideais de Plácido Castro. O programa aborda o papel do celtismo na cultura galega, vencellándoo ao Rexurdimento e á xeración Nós. Complétase co Cancioneiro da poesía céltica de Julius Pokorny, traducido por Ramón Piñeiro, e, no ámbito científico, coa evolución do coñecemento sobre o Atlántico desde o Congreso do Neolítico Atlántico e o congreso internacional de 1996, con voces como Antón Casal, Ramón Fábregas e Pilar Prieto.
No segundo episodio, Vendaval, a serie achégase a Portugal a través da historia medieval de Inés de Castro, nobre galega e raíña póstuma de Portugal. A arqueóloga Rebeca Blanco-Rotea afonda nas construcións transfronteirizas que transformaron a relación entre ambos os países. Ademais, Domingo González Lopo analiza a emigración galega ao país veciño, e tamén se afonda na figura de Valentín Paz Andrade, cunha atención especial á proximidade lingüística.
O terceiro episodio, Soán, orienta a mirada cara a Madrid. Afonso X e Martín Sarmiento son os principais protagonistas e contan coa explicación a cargo de Henrique Monteagudo. Tamén se aborda a figura de Concepción Arenal, analizada a través das súas obras e da serie As mulleres do porvir, así como o epistolario de Emilia Pardo Bazán, especialmente a correspondencia mantida coa fidalga Carme Miranda.
Poñente abre o horizonte transatlántico cara a México, Cuba, Estados Unidos e Panamá. Comeza con Sebastián Ocampo, natural de Tui, que participou na expedición destinada a demostrar que Cuba era unha illa. Tamén se fala, da man de Núñez Seixas, da emigración masiva a Cuba; da figura de Osorio Tafall; da participación dos galegos na construción da canle de Panamá; e do secuestro do Santa María a mans do DRIL, con dous comandantes galegos.
No quinto episodio, Nordés, a serie céntrase nas influencias europeas de Francia, Alemaña e Suíza. Analízase, ao estilo Monty Python, a pegada dos suevos en Galicia, pero tamén as figuras de Diego Xelmírez, Valle-Inclán, Lois Tobío, María Casares e Dorothé Schubarth.
O percorrido continúa con Levante, dedicado ás relacións co Mediterráneo e Asia. Comeza coa figura de Exeria, primeira peregrina e cronista da historia. Xosé Carlos Sánchez Pardo aborda as conexións comerciais co Mediterráneo a partir dos materiais descubertos en escavacións arqueolóxicas en Vigo. Martiño de Dumio, Xoán o Galego ou o papel do sétimo conde de Lemos, Pedro Fernández de Castro, son outras das figuras abordadas. O capítulo péchase coa presenza de Moisés Inzabarra e coa achega de María Gloria de Antonio Rubio sobre a Biblia de Kennicott, que acredita a presenza xudía en Galicia.
A serie conclúe con Ábrego, que dirixe a mirada cara ao sur, á Arxentina e ao Uruguai, territorios fundamentais na historia migratoria, social e cultural de Galicia.