O Consello da Cultura Galega (CCG) ofreceuse como espazo de encontro, mediación e coordinación para contribuír ao fortalecemento da rede de Centros de Estudos Galegos (CEG), unha das principais ferramentas para a difusión internacional da lingua e da cultura galegas. A proposta formulouse no marco da xornada “Os Centros de Estudos Galegos a debate”, que reuniu o pasado venres no Consello especialistas de universidades europeas e americanas, persoal lector e responsables de políticas de internacionalización lingüística para analizar a situación actual da rede e identificar posibles liñas de mellora.
19/07/2026
17/07/2026
A presidenta do Consello da Cultura Galega (CCG), Dolores Vilavedra, mantivo este venres un encontro co conselleiro de Cultura, Lingua e Xuventude, José López Campos, para abordar os detalles da proposta de actualización do Plan Xeral de Normalización da Lingua Galega. A presidenta congratulouse de que o documento recollese unha parte importante das propostas formuladas polo CCG no documento de conclusións do foro Un país coa súa lingua, presentado o pasado mes de outubro, aínda que que se aprecian diferenzas no alcance dalgunhas medidas e nos instrumentos previstos para a súa aplicación. No encontro estaba tamén presente Valentín García, secretario xeral da Lingua.
16/07/2026
Mery Pais (Santiago, 1990), Julia Huete (Ourense, 1990), Rosendo Cid (Ourense, 1974), Manuel Quintana Martelo (Santiago, 1946) e Yolanda Dorda (Barcelona, 1975) son os cinco artistas que se incorporan a Atalaia, plataforma web de creación contemporánea galega que promove a Sección de Arte e Creación Visuais Contemporáneas do Consello da Cultura Galega (CCG). Entrevistas, biografías e unha escolma da súa obra incorpóranse á plataforma que pretende contribuír a dar a coñecer a plástica galega.
16/07/2026
O Arquivo da Emigración Galega do Consello da Cultura Galega (CCG) vén de subir á rede, no marco do proxecto “Repertorio da prensa da emigración galega”, doce exemplares de Rosalía, revista mensual. Trátase do primeiro ano de vida da publicación editada pola delegación de Santiago de Cuba do Centro Galego de Cuba.
14/07/2026
A creación dunha mesa sectorial permanente como canle de diálogo entre o sector das artes visuais e as administracións, a necesidade de reforzar a gobernanza independente e a autonomía das institucións culturais, a recuperación dun plan director para o Centro Galego de Arte Contemporánea (CGAC), o cumprimento do Código de Boas Prácticas e a incorporación de mecanismos de transparencia nos procesos de selección figuran entre as principais conclusións do primeiro encontro sectorial titulado “A xestión dos espazos expositivos en Galicia”, organizado polo Consello da Cultura Galega (CCG). Estas propostas completaranse coas achegas do segundo encontro, previsto para o 22 de setembro, e servirán de base para un informe final que o CCG presentará no último trimestre do ano.
10/07/2026
“Escola, cultura e territorio” é o proxecto co que o Consello da Cultura Galega (CCG) e as deputacións da Coruña e de Lugo promoverán e darán visibilidade ás iniciativas culturais que se desenvolven en ámbitos non urbanos. A presidenta do CCG, Dolores Vilavedra, xunto coas responsables das áreas de Cultura de ambas as deputacións, Natividade González e Iria Castro, respectivamente, asinaron na sede do Consello un protocolo de colaboración para impulsar esta iniciativa, que carece de dotación económica específica e que se concretará este ano no desenvolvemento de seis actividades. “Abrimos así un camiño para percorrer en común, que demostra que a colaboración entre institucións é posible e que parte do convencemento de que a cultura é unha ferramenta de cohesión social”, salientou Dolores Vilavedra.
09/07/2026
A Sección de Patrimonio e Bens Culturais do Consello da Cultura Galega (CCG) abre o ciclo “Soster o noso” para crear un espazo de reflexión e de achegamento arredor do patrimonio dos lugares contando coa xente que o coñece de primeira man e que traballa para mantelo vivo. O ciclo comeza en Fornelos de Montes coa xornada “A serra do Suído. A memoria gandeira entre as pedras” na que diferentes especialistas abordan o pasado e futuro do patrimonio gandeiro. Teresa Nieto, Paula Ballesteros e David García coordinan esta sesión que inclúe unha sesión de relatorios e un roteiro pola serra. A xornada non se emite en directo pero será gravada e as intervencións subiranse ao web corporativo e a canle de YouTube.
08/07/2026
O Pleno da Real Academia Galega (RAG) vén de elixir a Xosé Neira Vilas (Gres, Vila de Cruces 1928 – 2015) como figura protagonista do Día das Letras Galegas 2027. Escritor, editor, investigador, activista cultural, divulgador e referente da literatura galega contemporánea, Neira Vilas estivo marcado pola súa experiencia como emigrante en América. É autor de Memorias dun neno labrego, a obra máis lida da literatura galega con preto de 40 edicións, e dedicou a súa vida á defensa da lingua, da cultura e da memoria da emigración. O Consello da Cultura Galega (CCG) ten no seu sitio web a disposición da cidadanía numerosos recursos para afondar no seu legado.
07/07/2026
O Centro de Documentación en Igualdade e Feminismos (CDIF) do Consello da Cultura Galega (CCG) incorpora ao proxecto “Sextina”, que inclúe rarezas e documentos pouco coñecidos do seu fondo, o catálogo Traballadoras. Trátase dunha publicación da Secretaría da Muller da Confederación Xeral de Traballadores Galegos (CXTG) de 1990 que permite recuperar un testemuño fundamental sobre o traballo das mulleres en Galicia ao longo do século XX.
03/07/2026
“Inicio esta tarefa coa ilusión de quen emprende unha aventura, unha
viaxe cuxa meta é unha Galicia na que se dean as mellores condicións para o desenvolvemento dunhas prácticas culturais que reforcen a democracia, que combatan as desigualdades e que nos axuden a pensar novas formas de vida”. Con estas palabras, Dolores Vilavedra tomou posesión este venres como presidenta do Consello da Cultura Galega (CCG) nun acto solemne celebrado na sede da institución. Contou coa presenza do presidente de honra do CCG, o presidente da Xunta de Galicia, Alfonso Rueda Valenzuela; do delegado do Goberno en Galicia, Pedro Blanco; do presidente do Parlamento de Galicia, Miguel Ángel Santalices; da alcaldesa de Santiago, Goretti Sanmartín; do conselleiro de Cultura, Lingua e Xuventude, José López Campos, ademais dunha ampla representación do ámbito político, institucional, académico, social e cultural.
viaxe cuxa meta é unha Galicia na que se dean as mellores condicións para o desenvolvemento dunhas prácticas culturais que reforcen a democracia, que combatan as desigualdades e que nos axuden a pensar novas formas de vida”. Con estas palabras, Dolores Vilavedra tomou posesión este venres como presidenta do Consello da Cultura Galega (CCG) nun acto solemne celebrado na sede da institución. Contou coa presenza do presidente de honra do CCG, o presidente da Xunta de Galicia, Alfonso Rueda Valenzuela; do delegado do Goberno en Galicia, Pedro Blanco; do presidente do Parlamento de Galicia, Miguel Ángel Santalices; da alcaldesa de Santiago, Goretti Sanmartín; do conselleiro de Cultura, Lingua e Xuventude, José López Campos, ademais dunha ampla representación do ámbito político, institucional, académico, social e cultural.
02/07/2026
A presidenta do Consello da Cultura Galega (CCG), Dolores Vilavedra, presentou na mañá deste xoves na sede do CCG o proxecto “Otero Pedrayo, unha conversa contigo”, un chatbot conversacional que permite dialogar con Ramón Otero Pedrayo (Ourense, 1888 – 1976) como se o propio autor respondese. “É un uso cultural da Intelixencia Artificial desde unha perspectiva humanista” apuntou Vilavedra na rolda. Xosé Antón López Silva, oteriólogo e representante da Fundación Otero, mantivo un diálogo coa ferramenta, que non “inventa” a Otero, senón que constrúe cada resposta a partir dun corpus documental verificado —a súa obra ensaística e narrativa, os seus epistolarios, as súas guías de viaxe e a bibliografía crítica—. Un corpus intelectual facilitado pola editorial Galaxia que, en palabras do seu director, Marcos Calveiro, “abre unha nova posibilidade de aprender sobre a obra de Otero”. Manuel Gago, coordinador de proxectos dixitais do CCG, explicou que o proxecto funciona mediante unha arquitectura de recuperación aumentada (RAG, Retrieval-Augmented Generation) que ancora a fala do bot en pasaxes reais e trazables “programado para ser fiel á fonte orixinal”. A presentación encaixa dentro dos proxectos do CCG para este Ano Oteriano 2026.
26/06/2026
“É posíbel un turismo sustentábel?” É o título da xornada coa que a Sección de Pensamento do Consello da Cultura Galega (CCG) xunta este martes (30 de xuño, 9:30 horas) a profesionais do ámbito da economía, a xeografía, o urbanismo, a xestión turística e o desenvolvemento local a reflexionar sobre os posibles modelos turísticos. A cita busca contrastar a análise académica cos casos reais de territorios e comunidades que viven diariamente os efectos do turismo. Dolores Vilavedra, presidenta do CCG, e Celia Pereira, coordinadora da sección e da xornada, abren esta sesión que se pode seguir en directo desde o web e a canle de YouTube do CCG.
25/06/2026
“Fomentar la amistad entre todos los hijos de aquel Término Municipal y aumentar y difundir la enseñanza entre todos los niños de ambos sexos por medio de las escuelas de instrucción elemental”. Estes son os obxectivos que motivaron, en abril de 1911, a un grupo de emigrantes orixinarios do concello lugués de Lourenzá a fundar a “Hijos de Lorenzana. Sociedad de beneficiencia e cultura”. Materiais que axudan a entender a traxectoria desta entidade súbense hoxe á rede no marco do proxecto “Memoria documental das sociedades da emigración galega” que mantén o Arquivo da Emigración Galega do Consello da Cultura Galega (CCG). Un especial para por en valor estes fondos documentais e ofrecer un mellor coñecemento e comprensión da traxectoria da emigración galega.
23/06/2026
A residencia artística Do Picho situada en Palas de Rei acolle este xoves 25 de xuño (a partir das 16:30 horas) a xornada “Territorio e identidade. Apostas dende a ruralidade e o contexto non urbano”. Un encontro organizado pola Sección de Creación e Artes Visuais Contemporáneas do Consello da Cultura Galega (CCG) que propón reflexionar sobre o papel do territorio na creación contemporánea, poñendo en valor iniciativas que, dende o non urbano, contribúen a ampliar o campo de acción da arte e a complexificar os discursos sobre identidade, pertenza e produción cultural. Paula Cabaleiro, coodinadora da sección e secretaria do CCG, inaugura esta sesión coordinada por Rosendo Cid e Eduardo Valiña. Non se emite en directo pero será gravada.
23/06/2026
«Escritor, mestre e contador; activista do esencial e membro da Xeración Lamote». Así sintetiza Manuel Bragado a traxectoria de Xabier P. DoCampo (Rábade, 1946–A Coruña, 2018), unha das figuras máis destacadas da literatura galega contemporánea. A súa biografía incorpórase desde hoxe ao Álbum de Galicia, a colección dixital de perfís biográficos do Consello da Cultura Galega (CCG), nas vésperas do 26 de xuño, data do seu pasamento.
19/06/2026
Máis público, máis actividade, maior produción e perspectivas favorables para o futuro. O sector cultural galego afronta 2026 nunha posición de consolidación pero moi condicionado polo incremento dos custos. Así o reflicte o “Barómetro da Cultura Galega 2026”, elaborado polo Observatorio da Cultura Galega (OCG) do Consello da Cultura Galega (CCG) a partir dunha mostra de 829 entidades de todos os ámbitos da cultura galega. “Este Barómetro amosa unha mellora real pero sen facer unha lectura triunfalista” apuntou a presidenta do CCG, Dolores Vilavedra, na rolda de presentación do documento. Canda ela, Håkan Casares Berg, membro da comisión asesora do OCG, destacou que “aínda que o sector traballa máis, non se traduce en máis ingresos debido aos elevados custos que ten para desenvolver a súa actividade”. O estudo revela que, por primeira vez, máis da metade das entidades non solicitaron axuda pública e salienta o papel do galego como un activo importante para o sector. O documento está dispoñible para descarga desde o web da institución.
17/06/2026
A sétima edición de “Pensar con Orgullo”, que organiza o Centro de Documentación en Igualdade e Feminismos (CDIF) do Consello da Cultura Galega (CCG), pon o foco na diversidade sexual no ámbito da cultura. Baixo o titulo “Crear, programar e mediar dende a diversidade sexual” profesionais da creación, da comunicación, da mediación cultural e da xestión pública para abordar os retos da inclusión da perspectiva LGBT+ no ámbito cultural galego. Ademais, presentarse un avance da Guía de boas prácticas para a programación de actividades culturais con perspectiva LGBT+ que prepara a institución. A sesión, coordinada por Carme Adán, é presencial pero pode seguirse en directo desde o web e a canle de YouTube do CCG.
16/06/2026
“Innovación nun clima que cambia” é o título da xornada coa que a Sección de Ciencia, Tecnoloxía, Natureza e Sociedade do Consello da Cultura Galega (CCG) analiza este mércores (a partir das 9:30 horas) o papel da innovación na resposta aos desafíos derivados da crise climática. A sesión, coordinada por Susana Bayo, reunirá especialistas do ámbito científico, tecnolóxico e universitario de centros de referencia como o Instituto Tecnológico de Aragón (ITA), o Institute for Systems and Computer Engineering, Technology and Science (INESC TEC) de Portugal ou o Centro Tecnolóxico de Investigación Multisectorial (CETIM) de Galicia. A sesión é presencial pero pode seguirse en directo desde o web do CCG e a canle de YouTube.
15/06/2026
A presidenta en funcións do Consello da Cultura Galega (CCG), Rosario Álvarez, e a pró-reitora para a Cooperación Internacional da Universidade do Minho (UMinho), Sandra Fernandes, asinaron este venres en Braga un protocolo de colaboración para o desenvolvemento de actividades conxuntas durante os vindeiros catro anos.
15/06/2026
O Consello da Xunta de Galicia ratificou na sesión deste luns a elección de Dolores Vilavedra (Vigo, 1963) como presidenta do Consello da Cultura Galega (CCG). O decreto publicarase mañá, martes 16 de xuño, no Diario Oficial de Galicia. A toma de posesión terá lugar o vindeiro 3 de xullo nun acto institucional ao que asistirá o presidente de honra da institución e presidente da Xunta de Galicia, Alfonso Rueda Valenzuela.
15/06/2026
Xinzo de Limia acollerá este martes (a partir das 17:00 horas) o cuarto e último escoitadoiro do ciclo “Migracións e Dereitos Culturais” que organiza a Comisión de Xestión e Políticas Culturais, orientada a coñecer de primeira man as experiencias, necesidades e propostas da poboación migrante e dos axentes culturais de Galicia para avanzar na garantía dos dereitos culturais desde unha perspectiva intercultural. A coordinadora da comisión e secretaria do CCG, Paula Cabaleiro abre este encontro de traballo pechado ao público.
12/06/2026
Vigo acolle o vindeiro luns (15 de xuño) a xornada “De aquí o xerme saíu. Presenzas galegas de Camões”, coa que a cultura galega pon o ramo aos actos conmemorativos do quinto centenario do nacemento de Luís de Camões, o gran poeta das letras portuguesas. Unha exposición, unha sesión de relatorios e un recital de poemas do gran clásico das letras portuguesas conforman o programa desta cita que terá lugar na Casa Galega da Cultura. O Consello da Cultura Galega (CCG), xunto con outras entidades, organiza esta cita que rematará cunha ofrenda floral diante do busto de Camões na Praza de Portugal da cidade olívica.
09/06/2026
O patrimonio cultural galego enfróntase con frecuencia a situacións de risco derivadas de fenómenos naturais e de emerxencias ambientais. O tren de borrascas do inicio de ano provocou o derrubamento parcial da Muralla de Lugo, mentres que os incendios forestais do pasado verán afectaron numerosos bens patrimoniais. Son algúns exemplos da vulnerabilidade do patrimonio ante eventos extremos e da necesidade de desenvolver estratexias de prevención, protección e resposta. Cuestións que aborda a xornada “A xestión de riscos e a resposta ás emerxencias no patrimonio cultural”, coa que se pecha o ciclo “Encontros Temáticos Transversais dende o Patrimonio Cultural” (ETTPC). Un espazo de debate organizado pola Sección de Patrimonio e Bens Culturais do Consello da Cultura Galega, que leva dous anos promovendo unha análise interdisciplinar do territorio e dos seus valores patrimoniais. Os encontros ábrense mañá (17:00 horas) cunha intervención de Arsenio Sánchez Henampérez, cocoordinador do Plan Nacional de Xestión do Risco e Emerxencias en Patrimonio Cultural. Seguirán o xoves 11 (17:00 horas) cun debate a cargo de profesionais que traballan no ámbito galego sobre este asunto. A cita, coordinada por Teresa Nieto, Rebeca Blanco-Rotea e Carlos Amoedo, é presencial e pode seguirse en directo a través do web do CCG e a súa canle de YouTube.
09/06/2026
Dos alalás e da lírica medieval ata a actual escena musical en galego, a nova entrega de “Proxector”, iniciativa de divulgación en galego promovida polo Centro de Documentación Sociolingüística de Galicia (CDSG) do Consello da Cultura Galega (CCG) e pola Universidade de Santiago de Compostela (USC), conmemora o Día Europeo da Música (21 de xuño) cunha ducia de vídeos. Baixo o título Lingua e música en sintonía, abórdanse temas como os seráns, as regueifas, as músicas urbanas e outros estilos musicais.
09/06/2026
Dos alalás e da lírica medieval ata a actual escena musical en galego, a nova entrega de “Proxector”, iniciativa de divulgación en galego promovida polo Centro de Documentación Sociolingüística de Galicia (CDSG) do Consello da Cultura Galega (CCG) e pola Universidade de Santiago de Compostela (USC), conmemora o Día Europeo da Música (21 de xuño) cunha ducia de vídeos. Baixo o título Lingua e música en sintonía, abórdanse temas como os seráns, as regueifas, as músicas urbanas e outros estilos musicais.
05/06/2026
A presidenta electa do Consello da Cultura Galega (CCG), Dolores Vilavedra (Vigo, 1963), compareceu na tarde deste venres na Comisión 4ª de Educación e Cultura do Parlamento de Galicia, no paso previo ao seu nomeamento oficial. Alí perfilou as liñas xerais do seu mandato que se caracterizan por reforzar o Observatorio da Cultura Galega, avanzar nos dereitos culturais, chegar a novos públicos e adaptar a institución aos retos de futuro. Entre as primeiras medidas anunciou un informe sobre a lectura e un plan cuatrienal de dixitalización. O seguinte trámite será o nomeamento polo Consello da Xunta de Galicia e, posteriormente, a súa publicación no Diario Oficial de Galicia.
05/06/2026
Un gran coro formado por 400 nenas e nenos chegados de toda Galicia cantou esta tarde en Vilalba as verbas dos poetas da Terra Chá no concerto “No bico un cantar”. “Esta é unha actividade pensada para a rapazada, auténticos protagonistas, nunha experiencia que esperemos sexa inesquecible”, apuntou a presidenta do Consello da Cultura Galega (CCG), Rosario Álvarez, no inicio desta actividade esta institución organiza xunto coas consellerías de Educación, Ciencia, Universidades e Formación Profesional e de Cultura, Lingua e Xuventude da Xunta de Galicia máis a colaboración do Concello de Vilalba. O director xeral de Cultura, Anxo Lorenzo, destacou a iniciativa “na que cada ano se implican centos de persoas dando mostra dun importante traballo colectivo a prol da nosa cultura que é especialmente relevante pola implicación das xeracións máis novas”. Unha idea na que incidiron a alcaldesa de Vilalba e a directora xeral de Educación Profesional, Eugenia Pérez, nas súas intervencións. Maximino Zumalave dirixiu este gran coro acompañado da formación de metais Hércules Brass, con Rosa Aneiros como mantedora. Ademais, anunciouse que a vindeira edición homenaxeará a Xosé Neira Vilas.
04/06/2026
“A lectura é a práctica cultural máis sólida da sociedade galega e a que presenta unha evolución máis favorable”, afirma o informe Hábitos e prácticas culturais en Galicia. Tendencias e determinantes da participación cultural, elaborado polo Observatorio da Cultura Galega do Consello da Cultura Galega (CCG). Os datos revelan que na última década medrou 6,4 puntos a porcentaxe de persoas que leron un libro e que se reduciu á metade a porcentaxe de persoas que non len nunca. O informe constata tamén unha transformación dos hábitos culturais en Galicia, cada vez máis dixitais e vinculados ao fogar. O informe xa se pode descargar desde o web do CCG.
03/06/2026
O Centro de Documentación en Igualdade e Feminismos (CDIF) do Consello da Cultura Galega (CCG) vén de incorporar novos materiais ao fondo Movemento Feminista Organizado en Galicia (MFOG). A iniciativa pioneira que arrincou no mes de abril, ofrece unha segunda entrega documental composta por máis de 800 novos rexistros procedentes de dez organizacións e colectivos que desempeñaron un papel fundamental na historia recente dos feminismos en Galicia. Esta nova achega permite ampliar o coñecemento sobre as loitas, debates, campañas e formas de organización desenvolvidas por diferentes xeracións de mulleres desde a década de 1970 ata os primeiros anos do século XXI.
02/06/2026
A Terra Chá protagoniza a décima edición de No bico un cantar, actividade organizada polo Consello da Cultura Galega (CCG), a Consellería de Educación, Ciencia, Universidades e Formación Profesional e a Consellería de Cultura, Lingua e Xuventude da Xunta de Galicia, coa colaboración do Concello de Vilalba. “Unha actividade que percorre todo o país e que pon música á tradición literaria galega para divulgala entre o alumnado dos conservatorios e centros de ensino musical”, apuntou a presidenta do CCG, Rosario Álvarez, na presentación desta edición. O director xeral de Cultura, Anxo Lorenzo, destacou que se trata “dun proxecto moi querido que resulta dun esforzo colectivo que ten por detrás moitas entidades”. Unha idea na que incidiu o subdirector xeral de Aprendizaxe Permanente, Ensinanzas Artísticas, Idiomas e Deportivas, Rubén Vázquez, ao destacar “a colaboración como un piar fundamental para achegar a cultura galega á cativada de toda Galicia”. A alcaldesa de Vilalba, Marta Rouco, salientou a implicación do Concello, que xuntará este venres (5 de xuño, ás 17:30 horas) 400 nenas e nenos chegados de toda Galicia. O director do concerto, Maximino Zumalave, apuntou que se “trata dunha xornada especial que permite facer música con xente moi nova”. Por último, Alejo Amoedo, membro da Comisión Executiva, destacou a excelencia musical que caracteriza o programa, “desde a dirección do concerto polo mestre Zumalave ata os arranxos realizados por Juan Durán”.