Non cabe dúbida da importancia que ten para esta entidade a sede recreativa coñecida como Campo Corcubión. Anos antes de ser adquirida en propiedade, era alugada para realizar celebracións de toda índole. Nela nenos e maiores gozaban do tempo de lecer, particularmente durante os meses de verán. As festas tradicionais galegas, o Entroido e os aniversarios continúan tendo lugar nas súas coidadas e modernizadas instalacións, onde socios e simpatizantes rememoran acotío os signos da identidade cultural, con bailes e música popular galega, facendo honra da súa orixe.
