Esta sesión final está pensada para consolidar unha visión compartida das conclusións do foro Un país coa súa lingua. Neste último encontro identificaranse e expresaranse as reflexións, suxestións e propostas fundamentais extraídas ao longo da celebración do foro para, a partir de aí, desenvolver principios e liñas de actuación que dean coherencia e continuidade ao conxunto do proceso.

A sesión, aberta a toda a cidadanía, contará coa asistencia dos coordinadores de cada unha das mesas que se desenvolveron entre febreiro e xullo (Nel Vidal da mesa “Educación e socialización”; Alba Nogueira da mesa “Administración, xustiza e servizos públicos”: Iolanda Casal de “Sanidade, ciencia e servizos sociais”; Marta Veiga de “Comunicación, cultura e acción exterior”; Jackson R. Soares e Montse Pena “Asociacións e redes comunitarias”). Ademais, tamén se poñerán sobre a mesa o medio millar de propostas remitidas pola cidadanía a través do espazo web habilitado para o proxecto.

A iniciativa
O pasado mes de xaneiro, a institución puxo en marcha Un país coa súa lingua. Foro participativo, como unha estratexia complementaria a outras iniciativas, focalizada nos aspectos máis urxentes e cunha estrutura áxil para poder sumarse ás diferentes accións desenvolvidas desde outras entidades. Na primeira xornada, que abordou a situación da lingua no ensino, púxose enriba da mesa unha medida piloto para posibilitar unha liña educativa voluntaria na que o galego teña maior presenza, desenvolta con carácter experimental, de maneira voluntaria e consensuada entre todos os axentes implicados (familias e centros), co obxectivo de compensar a menor presenza social do galego. Na segunda sesión, propúxose a creación de software e a dispoñibilidade de documentación xudicial en galego; traducir ao galego os programas de tramitación utilizados no ámbito xudicial e os formularios máis habituais foron algunhas das medidas abordadas. Na terceira sesión, abordáronse estratexias de benvida con programas de acollida transcultural, a promoción de contidos específicos desde a CRTVG que faciliten a inmersión lingüística dun xeito ameno e lúdico, a realización de estudos sociolingüísticos desde a perspectiva da emigración e a creación dunha rede de puntos de encontro en galego no rural. Na cuarta mesa propúxose empregar o galego e a identidade galega como piares estratéxicos nas empresas, crear unha plataforma transmedia para a difusión e posta en valor da identidade galega e replicar experiencias de pequeno formato como o festival Presumo de Galego. Na quinta mesa abordouse o galego como unha oportunidade comercial, avanzar na regulamentación do etiquetado do produto na nosa lingua e promover programas de xestión empresarial en galego. Na sexta e última mesa propuxéronse medidas como desenvolver redes de galegofalantes, incrementar a participación e intensificar os contactos entre entidades.