Novas da lingua

Rexistros751 a 780 de 5145
  1. Inicio
  2. CDSG-CCG
  3. Novas da lingua
09/02/2024. INVESTIGACIóN

As científicas da UDC convidan o alumnado de primaria e secundaria a pescudar con elas

A Unidade de Divulgación Científica e Cultural da Universidade da Coruña presenta unha nova edición da súa iniciativa Atrévete a pescudar con elas!, coa que quere celebrar o Día Internacional das Mulleres e as Nenas na Ciencia 2024. No marco deste iniciativa elaboráronse dúas pezas audiovisuais, unha dirixida a alumnado de educación primaria e outra a alumnado de educación secundaria) onde diferentes investigadoras desta universidade nos contan cal foi a súa traxectoria científica e vital, así coma os seus logros profesionais, co ánimo de incentivar o interese pola profesión investigadora e científica.

O alumnado pode dialogar coas mulleres científicas que protagonizan os vídeos enviándolles as súas preguntas, antes do 31 de marzo de 2024, a través deste formulario. Entre os/as participantes sortearase unha visita a algún dos centros do Parque Tecnolóxico da UDC.
09/02/2024. INVESTIGACIóN

Investígase o uso do galego en Instagram

Lisamaria Fabro, alumna de mestrado na Universidade de Heildeberg, está a realizar unha investigación sobre o uso do galego en Instagram. O obxecto, segundo ela mesma indica, é "analizar as prácticas lingüísticas na era dixital e contribuír ao enriquecemento da nosa comprensión sobre a presenza do galego en liña".

Podes colaborar no estudo cubrindo esta enquisa.
08/02/2024. CURSOS E CONGRESOS

Cursos de formación en lingua galega na Universidade de Vigo

A Universidade de Vigo publica a convocatoria de cursos de formación en lingua galega do segundo cuadrimestre do curso académico 2023/2024, dirixidos á comunidade universitaria e organizados pola Área de Normalización Lingüística. Os cursos ofertados son os seguintes: Curso de iniciación á lingua galega (40 h); A calidade lingüística no teu TFG ou TFM (30 h); Avanza co galego (40 h); Curso de linguaxe administrativa e xurídica (40 h); Os erros máis frecuentes na lingua galega (30 h); Escribir en internet (30 h).

As sesións desenvolveranse durante os meses de marzo, abril e maio de 2024, na modalidade en liña. O prazo de inscrición remata o 23 de febreiro de 2024, e os trámites deben facerse a través da plataforma virtual https://bubela.uvigo.es.
08/02/2024. DINAMIZACIóN

Aberto o prazo de inscrición para o certame Ciencia Calidade 2024

As divulgadoras científicas Andrea Muras e Eva Cabanelas, co apoio da Asociación Galega de Comunicación de Cultura Científica e Tecnolóxica, organizan a terceira edición de Ciencia Calidade, un concurso de monólogos científicos en lingua galega que ten como obxectivos fomentar a divulgación en galego e contribuír á formación dos divulgadores/as científicos/as que apostan polo noso idioma. Os monólogos deben ser en galego, ter unha duración de 3 minutos e tratar un tema científico (ciencias puras, ciencias sociais, historia...). O prazo de inscrición remata o 31 de marzo de 2024. En outubro, os participantes seleccionados terán a oportunidade de asistir a unha xornada de formación. O certame terá lugar o 2 de novembro de 2024 na Domus (A Coruña).

Podes acceder ao formulario de inscrición premendo aquí.
07/02/2024. OUTRAS

Campaña Celebrarmos Rosalía: leva a túa escolma da súa obra pola compra dun libro en galego

Aproxímase o 23 de febreiro, Día de Rosalía, e xa coñecemos a programación de 2024. Como novidade, xunto ás alboradas, o Caldo de Gloria, os actos literarios e as numerosas actividades previstas en centros educativos e culturais, xorde unha campaña para animar a lectura en lingua galega.

A quen merque un libro en galego entre o 6 de febreiro e o 3 de marzo nas librerías da Federación de Librarías de Galicia, a Casa de Rosalía e a Fundación Xistral, coa colaboración da Xunta de Galicia, entregaralle como agasallo un dos 20 000 exemplares da escolma da súa obra Celebrarmos Rosalía, edición feita por Anxo Angueira.

07/02/2024. DINAMIZACIóN

10ª edición do Festival Converxencias Portugal-Galicia

O grupo Canto D´Aquí e o Centro de Estudos Galegos da Universidade do Minho xúntanse, un ano máis, para homenaxear a Rosalía de Castro e a Zeca Afonso durante un mes de ampla programación cultural no Festival Converxencias Portugal-Galicia.

Entre o 3 de febreiro ao 9 de marzo, Braga, Ponteareas, A Estrada, Padrón e Santiago de Compostela uniranse a través da música, a danza, o teatro e a literatura. Consulta no programa as datas e lugares de realización de cada actividade concreta.

07/02/2024. OUTRAS

Estrea de O diamante galego o 14 de febreiro

A Associaçom Galega da Língua, co apoio da Deputación da Coruña e a produción de Nós TV, presenta o documental O diamante galego. Trátase dunha proposta centrada nas relacións económicas galego-portuguesas na que participan expertas e expertos das áreas institucional, empresarial, política ou económica.

A estrea vai ser o 14 de febreiro, ás 19 h, na Facultade de Económicas da Universidade de Santiago de Compostela. Aquí tes o trailer e máis información sobre os seus protagonistas.
05/02/2024. INVESTIGACIóN

Presentación do terceiro volume de Papés d'emprenta condenada

O vindeiro mércores 7 de febreiro de 2024, ás 11: 00 h, terá lugar na biblioteca do Consello da Cultura Galega (CCG) a presentación pública da obra Papés d'emprenta condenada (III). Novos textos, reflexións finais, editada por Ramón Mariño Paz e Damián Suárez Vázquez. No acto de presentación intervirán os dous editores da publicación e mais Rosario Álvarez, presidenta do Consello da Cultura Galega.

Na páxina web do CCG podes consultar os volumes anteriores da colección: Papés d'emprenta condenada (I) e Papés d'emprenta condenada (II).
02/02/2024. DINAMIZACIóN

O alumnado de Cedeira encherá de literatura en galego os espazos públicos do concello

A Concellaría de Normalización Lingüística do Concello de Cedeira presenta o proxecto “Literarrúa”, que desenvolverá en colaboración cos equipos de dinamización da lingua galega do CEIP Nicolás do Río e mais do IES Punta Candieira. No marco desta iniciativa o alumnado seleccionará aqueles textos literarios (poesía ou prosa) que mellor concorden con cada lugar, tendo en conta a súa toponimia ou a súa historia en xeral. Unha vez feita a selección dos textos, elixirase a mellor maneira de plasmalos nos diferentes espazos públicos escollidos (nunha placa, pintados nunha parede ou no chan...)

Na páxina web do Concello de Cedeira tes máis información sobre esta iniciativa.
02/02/2024. DINAMIZACIóN

A celebración do Día dos Medios en Galego comeza este sábado na Estrada

Como en anos anteriores, a Asociación de Medios en Galego (AMEGA) conmemora o Día dos Medios en Galego o 7 de febreiro, día no que saíu por primeira vez á rúa, no ano 1976, o xornal O Tío Marcos d´A Portela (primeira publicación de carácter xornalístico redactada integramente en lingua galega).
Neste 2024 o programa de actividades inclúe diferentes rutas xornalísticas que se desenvolverán en varias vilas galegas. A primeira delas terá lugar mañá, sábado 3 de febreiro, no Concello da Estrada, e comezará ás 12:00 h na Praza da Música, nos estudos de Radio Estrada. No Xornal da Estrada podes consultar o programa completo desta primeira ruta.

Na páxina web da AMEGA podes manterte ao día sobre o resto das actividades conmemorativas.
02/02/2024. DINAMIZACIóN

A Deputación de Pontevedra convoca o Programa “+Música” de apoio á programación artística profesional en galego

A Deputación de Pontevedra publica no BOP do 2 de febreiro de 2024 as bases reguladoras e mais a convocatoria do Programa “+Música” de apoio á programación artística profesional en galego nos concellos da provincia de Pontevedra. Así mesmo, créase o Catálogo +Música, como o inventario de grupos e artistas profesionais de música que realizan as súas actuacións ou os seus concertos en lingua galega ou, no caso de ser instrumentais, que as súas pezas sexan de autoría galega. Neste catálogo incorporaranse de oficio todos os grupos e artistas actualmente inscritos no Catálogo de grupos Musigal.

O programa “+Música” está dirixido aos concellos da provincia de Pontevedra de menos de 50.000 habitantes, que poderán solicitar unha actuación dalgún dos grupos incluídos no Catálogo +Música, dirixida ao público en xeral e de entrada libre, para desenvolverse entre o 1 de maio e o 31 de decembro do 2024.

O prazo de presentación de solicitudes de actuacións por parte dos concellos interesados estará aberto desde o 1 ata o 15 de marzo de 2024, os dous incluídos.

Podes consultar o texto completo da convocatoria premendo aquí.
01/02/2024. CURSOS E CONGRESOS

Curso para mellorar a competencia lingüística en galego para docentes

CIG-Ensino e a Asociación Socio-Pedagóxica Galega (AS-PG) organizan un Curso para mellorar a competencia lingüística en galego para docentes, que será impartido, na modalidade de teleformación, pola docente Marta Dacosta Alonso. As sesións desenvolveranse entre o 2 e o 29 de febreiro de 2024.
Podes matricularte cubrindo este formulario.
31/01/2024. OUTRAS

A RAG presenta a programación de homenaxe a Luísa Villalta no seu Ano das Letras

A Real Academia Galega presenta o programa de actividades que levará adiante para dar a coñecer ou axudar a afondar na personalidade e na obra de Luísa Villalta, homenaxeada co Día das Letras Galegas 2024.

No mes de marzo, vaise estrear unha serie web de seis episodios a través dos que coñeceremos os aspectos fundamentais da vida e obra da autora. Este audiovisual, considerado pola Academia unha das apostas máis fortes da programación, acompañarase de múltiples iniciativas entre as que segue destacando a dedicada aos máis cativos, o proxecto Primavera das Letras.

Podes ampliar esta información e manterte ao tanto das novidades na sección especial sobre Luísa Villalta creada pola RAG.
31/01/2024. DINAMIZACIóN

Nova entrega de 70 minutos con

A Asociación Socio-Pedagóxica Galega, en colaboración coa Deputación da Coruña, publica unha nova entrega do proxecto 70 minutos con, entrevistas con persoeiros da cultura galega que reflexionan sobre o seu ámbito de actividade.

Nesa ocasión, incorpóranse os encontros con Ramón Nicolás, Paula Carballeira, Marilar Aleixandre, Suso de Toro e Elena Vázquez Cendón. Podes velos todos na canle de Youtube da AS-PG.
31/01/2024. DINAMIZACIóN

Novos materiais para traballar a lectoescritura e a adquisición de vocabulario en lingua galega

A Secretaría Xeral de Política Lingüística presenta Divertímonos xogando coas nosas palabras, un material didáctico, de carácter lúdico e manipulativo, orientado ás primeiras etapas educativas.

A combinación de recursos que recolle esta caixa de xogos permite realizar ata nove actividades coas que traballar a conciencia léxica, silábica ou fonémica. Tes toda a información aquí.
29/01/2024. DINAMIZACIóN

A creatividade en galego chega ás aulas hospitalarias a través do “kamishibai”

A Xunta de Galicia presentou O kamishibai do hospital, un proxecto didáctico elaborado polas mestras Pilar Porta e Marta Peña que introducirá a creatividade en galego nas aulas hospitalarias a través da técnica tradicional xaponesa do “kamishibai”, un teatro de papel que permite contar historias de xeito creativo. O kamishibai do hospital está deseñado para as etapas educativas de Infantil, Primaria e Secundaria, e ademais de traballar contidos como as emocións, os valores sociais, a lingua e a creatividade artística, busca tamén normalizar a existencia de enfermidades na infancia e na adolescencia.

Na páxina web da Secretaría Xeral de Política Lingüística podes obter máis información sobre esta iniciativa.
29/01/2024. DINAMIZACIóN

VOGAL: unha nova ferramenta para atopar series e películas en galego

A enxeñeira informática Inés San Luís presenta VOGAL, unha nova ferramenta gratuíta que permite localizar series e películas con versión orixinal galega. Trátase dun catálogo elaborado a partir da base de datos colaborativa "The Movie Database", que proporciona información sobre o contido da serie ou do filme, así como da súa dispoñibilidade nas diferentes plataformas en liña.
29/01/2024.

O noso fútbol profesional comprométese publicamente co galego

Despois de conseguir que máis de 170 centros educativos do país, así como diferentes artistas de referencia para a mocidade (Viggo Mortensen, James Rhodes ou Tanxugueiras) se adherisen á súa iniciativa, os promotores da campaña “Aquí tamén se fala” suman un novo éxito ao lograr que o fútbol profesional tamén se comprometa publicamente co noso idioma. Segundo anuncian na súa páxina web «Dépor, Racing, Lugo e Celta berran con orgullo que en Riazor, na Malata, no Anxo Carro e en Balaídos “Tamén se fala galego”».

Podes obter máis información no sitio web da iniciativa.
26/01/2024. DINAMIZACIóN

O Concello de Ames presenta as actividades do proxecto Apego para o primeiro semestre de 2024

O Servizo de Normalización Lingüística do Concello de Ames presentou o programa das actividades que van desenvolverse durante este primeiro semestre de 2024 no marco do proxecto Apego, ao que que xa están adheridas máis de 400 familias do concello. En concreto, ofértanse 16 actividades lúdicas (música, contos, monicreques, teatro, obradoiros didácticos...), dirixidas ás familias que estean a esperar un bebé ou que teñan nenos/as de entre 0 e 6 anos, co obxectivo de fomentar o uso do galego na socialización da primeira infancia.

Podes ampliar información premendo aquí.
26/01/2024. DINAMIZACIóN

RAG e PuntoGal convocan a sétima edición do seu certame de microrrelatos

Dominio PuntoGal e a Real Academia Galega organizan o VII Certame de Microrrelatos, co obxectivo de reforzar a presenza do idioma galego e da identidade propias no mundo dixital. Poden participar todas as persoas que o desexen, e para facelo deben presentar un relato en lingua galega, orixinal, inédito, de temática libre e cunha extensión máxima de 200 palabras (título incluído). Establécense tres categorías, segundo a idade dos participantes, e outorgaranse tres premios por cada unha das categorías. O prazo de presentación dos textos estará aberto entre o 1 e o 29 de febreiro de 2024.

Os microrrelatos deben presentarse no sitio web relatos.gal, onde tamén atoparás as bases completas do certame.
24/01/2024. DINAMIZACIóN

Xogos populares en galego para os nenos e nenas de Carballo

O Servizo de Normalización Lingüística do Concello de Carballo organiza, no marco do Proxecto Apego, unha actividade de xogos populares en galego dirixida a familias con nenos e nenas de 0 a 6 anos. A iniciativa desenvolverase hoxe mércores, 24 de xaneiro de 2024, na planta alta do mercado municipal. A entrada é libre e gratuíta ata completar capacidade. Todas as persoas interesadas poden inscribirse a través do correo electrónico snl@carballo.gal.
23/01/2024. OUTRAS

O mosteiro de San Martiño Pinario acolle unha exposición sobre os 55 anos de liturxia en galego

A editorial Sept, co apoio da Xunta de Galicia e do Arcebispado de Santiago, organiza a exposición “55 anos da liturxia en galego (1969-2024)”, que pode visitarse no mosteiro de San Martiño Pinario ata o 29 de febreiro de 2024. A mostra está composta por seis paneis que dan conta da historia da lingua galega na liturxia, desde 1969 (ano da aprobación do galego como lingua litúrxica nas dioceses de Galicia) ata a actualidade.

Para ampliar información sobre esta iniciativa, preme aquí.

22/01/2024. EMPREGO

Convocatoria para impartir docencia de galego no ensino secundario cubrindo interinidades e substitucións

A Consellería de Cultura, Educación, Formación Profesional e Universidades convoca un procedemento para a elaboración das listas de interinidades e substitucións para impartir docencia no corpo de profesores de ensino secundario en diferentes especialidades, entre elas a de “Lingua e literatura galega”. O prazo de presentación de solicitudes estará aberto ata o vindeiro 31 de xaneiro de 2024.

Podes ampliar información, así como como consultar o texto completo da convocatoria, premendo aquí.
19/01/2024. DINAMIZACIóN

Viggo Mortensen súmase á campaña “Aquí tamén se fala” en defensa do galego

O coñecido actor Viggo Mortense quixo amosar o seu apoio á campaña de dinamización lingüística “Aquí tamén se fala”, enviando unha mensaxe na que reivindica que as linguas son “o tesouro dos pobos” e amosa o seu apoio, como falante, á lingua galega. A campaña “Aquí tamén se fala” é unha idea orixinal do IES Rafael Dieste (A Coruña), á que actualmente están adheridos máis de 160 centros educativos do país. O seu obxectivo é darlles a oportunidade aos mozos e mozas de que exerzan coma se fosen técnicos/as de normalización lingüística, intervindo nos usos lingüísticos da súa contorna.

Non é a primeira vez que Viggo Mortensen amosa o seu interese polo idioma galego, pois durante a súa recente participación no recital Poetas Di(n)versos, que tivo lugar o pasado mes de novembro de 2023 na Coruña, tamén recitou en galego un poema da súa autoría.
19/01/2024. DINAMIZACIóN

A CRTVG presenta as súas novas plataformas de contidos dixitais en galego

A Corporación de Radio e Televisión de Galicia (CRTVG) presenta Agalega, a súa nova plataforma de contidos dixitais con máis de 1.400 contidos en lingua galega para todos os públicos, en aberto e gratuítos (información, cine, series, animación, podcasts, música...). Esta nova plataforma está accesible a través do web agalega.gal, de Google Play e de App Store.

Xunto con esta plataforma principal, a CRTVG creou tamén outras dúas plataformas específicas: AGalega Audio (tamén en Google Play e APP Store), con todos os contidos da Radio Galega; e Xabarín (tamén en Google Play e App Store), con contidos para o público infantil.

Podes ampliar información premendo aquí.
19/01/2024. AXUDAS E PREMIOS

Axudas ás entidades locais para a compra de novidades editoriais en galego

A Consellería de Cultura, Educación, Formación Profesional e Universidades publica unha convocatoria de subvencións dirixidas ás entidades locais de Galicia para a compra de novidades editoriais en galego en formato físico e para mellorar as coleccións bibliográficas das bibliotecas e/ou axencias de lectura públicas de titularidade municipal, integradas na Rede de Bibliotecas Públicas de Galicia.

O prazo para a presentación de solicitudes é dun mes, contado a partir do día seguinte ao da publicación da convocatoria.
19/01/2024. OUTRAS

Cinemas_Gal, nova canle en Filmin con cine galego e en galego

A plataforma de cine en liña Filmin incorpora unha nova canle dedicada ao cine galego e en galego. Cinemas_Gal, elaborada coa colaboración da Xunta de Galicia, presenta de xeito agrupado todos os filmes en galego ou con subtítulos en galego, así como os de autoría galega, que forman parte do catálogo da plataforma.

Neste momento ofértanse 74 títulos clasificados nas seguintes categorías: “éxitos recentes do cine galego”, “éxitos internacionais en galego”, “autores galegos”, “curtametraxes galegas”, “documentais”, “o mellor cine europeo en galego”, "cine portugués" e “música”.
18/01/2024. OUTRAS

Actualizada a información sobre o fondo de publicacións periódicas do CDSG

O Centro de Documentación Sociolingüística de Galicia publica en liña o Boletín de Sumarios 2023, un produto documental que inclúe os sumarios dos números das revistas que se incorporaron á hemeroteca do centro ao longo do ano pasado.

Tamén podes consultar a nosa colección completa actualizada a través do Catálogo de publicacións periódicas do CDSG.

Estas revistas pódense consultar en sala ou levar en préstamo naqueles casos en que dispoñamos de máis dun exemplar. No caso das dixitais, desde o boletín e o catálogo pode accederse directamente a elas.
18/01/2024. CURSOS E CONGRESOS

Cursos de linguaxe administrativa e xurídica galega para o persoal da Administración pública

A Escola Galega de Administración Pública convoca, en colaboración coa Secretaría Xeral de Política Lingüística, vinte e sete cursos de linguaxe administrativa galega e tres de linguaxe xurídica galega (niveis medio e superior) para persoal ao servizo das distintas administracións da Comunidade Autónoma de Galicia. Todos os cursos se desenvolverán na modalidade de teleformación. O prazo de presentación de solicitudes estará aberto entre o 19 e o 31 de xaneiro de 2024.

Podes consultar o texto completo da convocatoria premendo aquí.
18/01/2024. CURSOS E CONGRESOS

Nova edición do curso de lingua e cultura galegas do programa Aula GaliciaAberta

A Secretaría Xeral da Emigración da Xunta de Galicia, dentro do seu programa Aula GaliciaAberta, organiza unha nova edición do curso en liña de lingua e cultura galegas, dirixido principalmente á comunidade galega no exterior. O curso, que se emitirá todos os martes a través do Facebook Live de GaliciaAberta, é gratuíto e non precisa inscrición previa.

A edición deste ano 2024 incorpora como novidade a participación unha vez ao mes dun persoeiro/a relevante da cultura galega. Na primeira sesión, que tivo lugar o pasado martes 16 de xaneiro, a convidada foi a poeta Yolanda Castaño.

Para ampliar información, preme aquí.