A Coordinadora de Traballadores/as de Normalización da Lingua organiza un acto público de entrega dos II Premios Mil Primaveras, que terá lugar o vindeiro sábado, 5 de xuño, ás 18:30 h, no Teatro Principal de Pontevedra, e estará conducido pola actriz Bea Campos, co acompañamento musical de Manuel Pombal (integrantes de Migallas Teatro). Os Premios Mil Primaveras teñen como obxectivo a difusión e posta en valor de proxectos de fomento do galego que, polo súa calidade, poidan servir de modelo e inspiración. Para obter máis información sobre esta iniciativa, así como sobre os proxectos galardoados nesta segunda edición, preme aquí.
31/05/2021. AXUDAS E PREMIOS
31/05/2021. INVESTIGACIóN
O IES Marco do Camballón presenta o proxecto audiovisual "A escola das avoas", impulsado polo alumnado de 2º e 3º da ESO. A iniciativa ten como obxectivo recuperar a memoria histórica e colectiva da xeración de avoas e avós, bisavoas e bisavós, que foron escolarizados durante a ditadura franquista. O propio alumnado entrevistou e gravou cos seus teléfonos móbiles a máis de 25 persoas que narran as súas vivencias na escola franquista, tamén as relacionadas coa represión lingüística. O documental inclúe a colaboración póstuma de Xosé Neira Vilas, que tamén reflexiona sobre esta etapa histórica.
31/05/2021. DINAMIZACIóN
A comunidade virtual "Orgullo galego" ofrece no seu perfil en Spotify tres listas de música en galego de diferentes estilos musicais, deseñadas tanto para público infantil como adulto. A primeira delas é "Música en galego", onde atoparás máis de 500 cancións en galego de todos os estilos musicais. Nunha segunda lista ofrecen máis de 100 panxoliñas de Nadal en lingua galega e na terceira, baixo o título "Música infantil en galego", compilan 140 cancións infantís no noso idioma. Podes obter máis información sobre estes recursos premendo
aquí.
aquí.
31/05/2021. LEXISLACIóN
A Comisión de Sanidade, Política Social e Emprego do Parlamento de Galicia aprobou por unanimidade, o pasado 20 de maio de 2021, a Proposición non de lei en Comisión, presentada polo BNG, sobre as actuacións que debe levar a cabo o Goberno galego para garantir os dereitos lingüísticos das persoas galegofalantes nos centros sanitarios dependentes da Consellería de Sanidade. O Parlamento galego insta a Xunta de Galicia a normalizar o galego nos centros sanitarios (sinaléctica, cartelaría, documentación interna e externa...), a garantir a existencia de exemplares en galego de toda a documentación que se lles facilita aos doentes e a realizar actuacións formativas para que os profesionais sanitarios poidan adquirir a competencia lingüística necesaria, así como coñecer os dereitos lingüísticos dos pacientes. Podes consultar o texto aprobado premendo aquí.
31/05/2021. AXUDAS E PREMIOS
A Deputación de Pontevedra publica as condicións xerais para a realización de contratos de patrocinios con entidades privadas que desenvolvan proxectos audiovisuais ou obras de animación en galego. Poden solicitar a petición de patrocinio as produtoras audiovisuais independentes que desenvolvan proxectos de produción audiovisual en lingua galega que pola súa relevancia e transcendencia supoñan unha gran repercusión ou retorno publicitario das actividades culturais, artísticas e de fomento do galego que se desenvolven na provincia. As producións deben contar cunha porcentaxe de rodaxe en escenarios da provincia de Pontevedra de polo menos un 50%. A rodaxe debe comezar no ano da solicitude e a produción audiovisual debe rematar antes do 30 de setembro do ano seguinte. O prazo de presentación de solicitudes comeza o día seguinte ao da publicación da disposición no BOP e estará aberto durante todo o ano natural.
21/05/2021. DINAMIZACIóN
A Secretaría Xeral de Política Lingüística e a Federación de Asociacións de Persoas Xordas de Galicia (FAXPG) promoven o proxecto Os Bolechas. A lingua de signos, co obxectivo de garantir que os nenos e nenas xordas poidan ter acceso aos contidos audiovisuais en lingua galega e, ao mesmo tempo, a poboación infantil galega en xeral adquira os conceptos básicos da lingua de signos. Ao abeiro deste proxecto presentouse unha serie de 46 pezas audiovisuais da famosa familia de monicreques Os Bolechas con subtítulos en lingua de signos, dirixida á poboación infantil de entre 3 a 9 anos con discapacidade auditiva. Así mesmo, tamén está accesible en liña a guía didáctica Os Bolechas. A lingua de signos, destinada neste caso a toda a poboación infantil galega, onde se explica que é a lingua de signos, cales son os signos empregados na comunicación básica infantil e como podemos facilitarlles a comunicación ás persoas xordas.
21/05/2021. DINAMIZACIóN
O Espazo de Cine da Área de Cultura da USC convoca a sexta edición do maratón "Findecurta", un certame audiovisual para fomentar a creatividade e o uso do galego entre a mocidade. Tras unha sesión informativa a través de Zoom que terá lugar o vindeiro 4 de xuño, as persoas inscritas disporán de 80 horas (ata o 8 de xuño ás 10:30 h) para elaborar por equipos a súa curta. Outorgarase un primeiro premio de 400 €, que supón ademais a participación da curtametraxe na 43ª Semana de Cine de Lugo; e un segundo premio (premio do público) que supón a participación da curta na 43ª Semana de Cine de Lugo. O prazo de inscrición remata o vindeiro 2 de xuño. Para consultar as bases completas do certame, preme aquí.
20/05/2021. DINAMIZACIóN
Coincidindo coa celebración das Letras Galegas 2021, as tres universidades galegas presentaron o vídeo "A universidade, un espazo para o galego", realizado co apoio da Xunta de Galicia. Trátase dunha peza audiovisual curta, de 5 minutos de duración, onde o alumnado dos diferentes campus da UDC, a USC e a UVigo conta a súa experiencia lingüística na universidade, reflexiona sobre as eivas e as oportunidades para a normalización da lingua galega neste ámbito e expón as súas razóns para incorporar o galego nos seus usos lingüísticos.
20/05/2021. DINAMIZACIóN
Tras unha obrigada interrupción o ano pasado por motivos sanitarios, este 2021 o Galegote Rock volverá encher Pontevedra de música en galego. No marco desta iniciativa, promovida polo Servizo de Normalización Lingüística do Concello de Pontevedra co obxectivo de crear espazos de uso para o galego no ámbito do lecer, celebraranse 15 concertos durante os vindeiros días 28, 29 e 30 de maio. Os espectáculos terán lugar en dous espazos ao aire libre da cidade: nas escaleiras que baixan do parque das Palmeiras cara a Raíña Vitoria e no palco da música na Alameda. Podes consultar o programa completo do Galegote Rock 2021 premendo aquí.
20/05/2021. OUTRAS
A Mesa pola Normalización Lingüística presentou o seu informe anual da Liña do Galego, un servizo gratuíto que atende consultas sobre dereitos lingüísticos, tramita queixas sobre a súa vulneración e recolle parabéns para as entidades que os respectan. Segundo os datos recollidos neste último informe, ao longo do ano 2020 tramitáronse 219 expedientes de queixas, atendéronse 20 consultas e recibíronse 111 parabéns. Os dous principais motivos das queixas foron a ausencia do galego na atención oral e escrita (24,07%) e a discriminación lingüística (19,91 %). No que respecta á tipoloxía de entidades implicadas, o 62,04% das queixas van dirixidas a administracións e institucións públicas, o 31,48% a empresas de servizos, o 4,17% a institucións privadas e o 2,31% a entidades bancarias. Para ampliar información, preme aquí.
18/05/2021. DINAMIZACIóN
Coincidindo coa conmemoración do Día das Letras Galegas e mais o Día de Internet, que festexamos cada 17 de maio, a Asociación PuntoGal puxo ao dispor da cidadanía unha serie de 17 guías para usar a rede e as principais ferramentas ofimáticas en galego. De xeito sintético e didáctico, ofrécense as indicacións básicas necesarias para configurar no noso idioma programas ofimáticos como LibreOffice ou Microsoft Office; navegadores como Firefox; sistemas operativos como Windows, Adroid ou IOS; redes sociais como Twitter, Telegram ou Facebook; servizos de Google ou aplicacións coma o dicionario da RAG.
18/05/2021. LEXISLACIóN
A proposición non de lei promovida pola Mesa pola Normalización Lingüística, coñecida como “Iniciativa Xabarín”, conseguiu a pasada semana o apoio unánime de todos os partidos con representación no Parlamento galego. O acordo acadado supón a creación dunha canle temática da TVG con contidos en galego para a infancia e a mocidade, que emitirá para fibra óptica, adsl, satélite e telefonía móbil. Así mesmo, aprobouse reclamarlle ao Goberno de España que promova as medidas precisas para que a RTVE emita todos os seus contidos con opción dobrada ao galego (nomeadamente os dirixidos á poboación infantil e xuvenil), e impulse o cumprimento dos artigos do Anteproxecto de Lei Xeral de Comunicación Audiovisual onde se recolle a pluralidade lingüística como principio básico. Por último, ínstase ao goberno galego a promover acordos con outras administracións para garantir a dobraxe en galego en todas as plataformas dixitais, así como a recepción mutua TVG-RTP en Galicia e Portugal. Podes consultar o texto desta proposición non de lei premendo aquí.
14/05/2021. OUTRAS
A Real Academia Galega celebrará o pleno extraordinario das Letras Galegas o vindeiro luns 17 de maio, no Auditorio Mar de Vigo, a partir das 13:00 h. No acto, celebrado en homenaxe a Xela Arias, participarán Ana Romaní, Marilar Aleixandre e Manuel Rivas, en representación da RAG. Así mesmo, haberá unha actuación musical a cargo de Mónica de Nut, Pablo Carrera e Fernando Abreu. Podes seguir a emisión en director nesta ligazón. Para ampliar información, preme aquí.
14/05/2021. INVESTIGACIóN
A Xunta de Galicia, diferentes consultoras especializadas e institucións académicas, coma a Universidade de Santiago de Compostela, promoven o "Proxecto Nós: intelixencia artificial ao servizo da lingua galega". No marco desta iniciativa, deseñada para captar financiamento dos fondos Next Generation da Unión Europea, xeraranse diferentes recursos lingüísticos dixitais en código aberto que poderán ser empregados de balde por empresas e institucións. O obxectivo final é garantir os dereitos dos galegos e as galegas a empregar no noso idioma propio os recursos tecnolóxicos baseados na intelixencia artificial (como poden ser, por exemplo, asistentes de voz, sistemas de recoñecemento da fala ou tradutores de alta calidade), permitindo ao mesmo tempo que o idioma galego poida usarse no eido tecnolóxico en pé de igualdade con outros idiomas. Para ampliar información, preme aquí.
14/05/2021. DINAMIZACIóN
A comezos do segundo cuadrimestre deste curso, a Comisión de Normalización Lingüística da Facultade de Medicina e Odontoloxía, co apoio do Servizo de Normalización Lingüística da USC, comezou a difundir a campaña "Entendo, logo diagnostico. Técnico&popular". Trátase dunha serie de dezaoito imaxes, difundidas periodicamente nas redes sociais, nas que se asocian as expresións populares que os/as pacientes galegofalantes empregan para referirse a síntomas e doenzas cos seus respectivos termos técnicos. A iniciativa está dirixida aos profesionais da medicina, co ánimo de que poidan comprender o que lles están transmitindo os seus pacientes e así poder realizar diagnósticos correctos. Podes acceder á colección de imaxes na páxina de Facebook do SNL da USC.
11/05/2021. CURSOS E CONGRESOS
O Consello da Cultura Galega, a través da súa Sección de Lingua, Cultura e Comunicación, organiza a xornada en liña "Novas plataformas de comunicación. O galego vive nas redes", que terá lugar o 25 de maio de 2021 ás 19:00 horas. Trátase dunha mesa redonda na que se debaterá sobre a creación de contidos e a presenza do galego en plataformas como YouTube, Tik-Tok, Twitch ou Twitter. No debate, que estará moderado polo xornalista Carlos Pereiro, participarán Esther Estévez, Agos Reigosa, María Sabarís e Jon Amil. A actividade retransmitirase a través da páxina web e a canle de Youtube do CCG, así como na plataforma Twitch. Non se require inscrición previa.
11/05/2021. EMPREGO
O Concello de Cedeira publica as bases que rexerán a convocatoria para a creación dunha bolsa de emprego destinada á provisión temporal do posto de técnico/a de normalización lingüística. O sistema de selección é o de concurso de méritos e entrevista curricular. Os/as aspirantes deben estar en posesión dalgunha das seguintes titulacións: grao en Lingua Galega, licenciatura en Filoloxía Galega, licenciatura en Filoloxía Hispánica (subsección Galego-Portugués) ou outras titulacións de grao/licenciatura equivalentes, sempre que estean en posesión do Celga 5. O prazo de presentación de solicitudes é de 10 días naturais, contados a partir do seguinte ao da publicación da convocatoria.
11/05/2021. CURSOS E CONGRESOS
A Escola Galega de Administración Pública publica a convocatoria de actividades de formación continua para o persoal da Administración pública galega. No que respecta á formación de carácter lingüístico, ofértanse os seguintes cursos (todos na modalidade de teleformación): "A calidade da redacción administrativa. Técnicas para unha boa redacción dos documentos administrativos", "Manual de estilo do DOG e outras publicacións institucionais" e "Redacción de documentos técnico-xurídicos en galego" (este último dirixido especificamente ao PAS das tres universidades galegas). O prazo de presentación de solicitudes abranguerá desde o día seguinte ao da publicación da convocatoria no DOG ata o 20 de maio de 2021.
11/05/2021. DINAMIZACIóN
A iniciativa Twiter en galego celebrou o pasado venres, 7 de maio, o seu décimo aniversario e diferentes personalidades do ámbito da cultura, os medios de comunicación e a política quixeron sumarse á celebración enviando, co cancelo #MilChíosMáis, as súas mensaxes de agradecemento por esta década de promoción da lingua galega nesta rede social. O seu creador, Calos Vieito, lémbranos que, malia os evidentes logros, queda aínda por conseguir a configuración en lingua galega na versión de Twitter para os dispositivos móbiles, que continúa en fase beta, xa que ata o momento só é posible configurar o galego na versión web. Podes obter máis información sobre esta iniciativa, premendo aquí.
07/05/2021. OUTRAS
O Consello da Cultura Galega, como órgano estatutario asesor dos poderes públicos, emitiu un informe sobre o topónimo Ría de Ribadeo, elaborado a pedimento da Secretaría Xeral de Política Lingüística da Xunta de Galicia. Neste informe o CCG ratifícase na posición mantida en anteriores ocasións sobre este asunto, argumentando que a forma do topónimo debe ser Ría de Ribadeo, pois tanto a documentación como a cartografía históricas avalan o uso desta forma. Así mesmo, explica a formación usual deste tipo de topónimos, que usan a base ría e complementan o nome co dunha localidade ou terra importante, non co do río. Tras analizar este ditame, así como outros dous emitidos pola RAG e a USC no mesmo sentido, a Xunta de Galicia trasladará a súa decisión de manter a oficialidade deste topónimo galego ao Instituto Xeográfico Nacional do Ministerio de Fomento, que debe valorar a petición do Principado de Asturias de oficializar o nome Ría do Eo.
05/05/2021. INVESTIGACIóN
A Comisión de Cultura e Normalización Lingüística da Facultade de Ciencias da Educación da USC e o Seminario de Sociolingüística da Real Academia Galega organizan unha presentación virtual, a través de videoconferencia, da investigación "Avaliación da competencia bilingüe nos idiomas galego e castelán do alumnado de 4º da ESO". O acto terá lugar o vindeiro luns, 10 de maio de 2021, de 19:00 h a 20:30 h, e nel participarán Bieito Silva, Xaquín Loredo, María López, Valentina Formoso, Nel Vidal e Henrique Monteagudo. As persoas interesadas en asistir poden inscribirse a través deste formulario web. O prazo de inscrición remata o 10 de marzo, ás 12:00 h. Para ampliar información, preme aquí.
05/05/2021. DINAMIZACIóN
No marco da programación institucional das Letras Galegas 2021, a Secretaría Xeral de Política Lingüística presenta a serie Unha palabra para Xela Arias, composta de 31 pezas audiovisuais nas que académicos/as da lingua, familiares e amigos/as fan un retrato plural da autora, a través dos seus textos ou das palabras que mellor a definen. A serie irase completando, coa publicación dun vídeo por día, durante o mes de maio. Para ampliar información, preme aquí.
05/05/2021. CURSOS E CONGRESOS
A Fundación Manuel Giménez Abad, coa colaboración das Cortes de Aragón, organiza a xornada "Oficialidad lingüística y lenguas docentes en España: balance y perspectivas", que se celebrará a través de videoconferencia o vindeiro 12 de maio de 2021. A exposición sobre a situación concreta do idioma galego correrá a cargo da profesora Alba Nogueira, que participará co relatorio "Las lenguas cooficiales como lenguas docentes: modalidades, con particular atención a Galicia, País Vasco y Cataluña". Todas as persoas interesadas poden inscribirse de balde na actividade, e posteriormente recibirán a ligazón para poder seguir a retransmisión virtual.
04/05/2021. OUTRAS
O Consello da Cultura Galega (CCG) publica ¡Non te amola!, unha obra narrativa de Xela Arias, que permanecía inédita ata este momento, na que a autora ficciona boa parte da súa nenez. O texto preséntase acompañado dun estudo crítico, autoría da profesora Ana Iglesias, e de sete ilustracións realizadas por Bea Gregores. Esta publicación conmemorativa enmárcase nos actos de homenaxe a Xela Arias que o CCG está a desenvolver con motivo do Día das Letras Galegas 2021. Podes ampliar esta información premendo aquí.
04/05/2021. DINAMIZACIóN
O Concello de Pontevedra, a través do seu Servizo de Normalización Lingüística, promove o certame musical “X Xela”, co ánimo de render homenaxe a Xela Arias e, ao mesmo tempo, promover a creación musical en lingua galega. O certame está dirixido a músicos/as e bandas de Pontevedra (ou que teñen un compoñente da cidade), e para participar cómpre musicar en lingua galega, con composicións orixinais, un poema de Xela Arias. O xurado seleccionará tres finalistas, que recibirán un premio de 1.000, 500 e 250 euros, respectivamente. O prazo de presentación dos traballos remata o 7 de maio de 2021. Con este mesmo obxectivo de fomentar e difundir a creación musical no noso idioma, o Concello de Pontevedra inaugurará hoxe a mostra “Cantámola en galego”, unha exposición que permite coñecer o amplo e diverso panorama musical actual en lingua galega, e que poderá visitarse durante o mes de maio na praza de Ourense. No marco desta exposición, elaborouse unha unidade didáctica, unha listaxe de reprodución en Spotify con 288 cancións e outra en Youtube con 77 vídeos musicais.
03/05/2021. DINAMIZACIóN
O Consello da Cultura Galega, coa colaboración do Concello de Vigo, organiza o Concerto das Letras Galegas 2021, que este ano se celebrará en homenaxe a Xela Arias no Pazo de Congresos Auditorio Mar de Vigo, o 16 de maio de 2021 ás 20:00 horas. Nesta edición a actuación correrá a cargo de Laura Lamontagne & PicoAmperio, que ofrecerán un espectáculo baseado en temas do seu repertorio e poemas da autora homenaxeada. Debido ás limitacións sanitarias, ofrécense dúas modalidades de asistencia: presencial ou virtual. As entradas para asistir presencialmente podes conseguilas de balde en teuticiket.com ou no despacho de billetes do Auditorio Mar de Vigo dúas horas antes do inicio do espectáculo. O concerto emitirase tamén en directo dende o sitio web do Consello da Cultura Galega e da súa canle de youtube, así como pola web da CRTVG.
03/05/2021. OUTRAS
A Mesa pola Normalización Lingüística presenta o "Informe Xabarín", que analiza a presenza de contidos en lingua galega nas diferentes operadoras e plataformas audiovisuais. O estudo constata que ningunha das 10 canles temáticas infantís, que como media teñen as principais operadoras de TV por fibra óptica, ofrecen contidos en galego. No que respecta aos títulos dispoñibles no catálogo global das diferentes plataformas, só 25 (de entre máis de 25.000) están accesibles no noso idioma. O informe preséntase no marco da Iniciativa Xabarín, que estes días recibiu tamén o apoio de APRADOGA, a asociación dos profesionais da dobraxe en Galicia. Podes ampliar información premendo aquí.
28/04/2021. DINAMIZACIóN
Xa está accesible en liña a colección dos dez vídeos que compoñen a serie audiovisual Brincadeiras da lingua, onde se recollen ditos infantís tradicionais de Galicia. O obxectivo é difundir a riqueza da nosa tradición oral e, ao mesmo tempo, fornecer de recursos ás familias para a transmisión interxeracional da lingua. Na páxina web Orella Pendella, xestionada por Migallas Teatro, tes máis información sobre os ditos, recitados e cancións que conservamos na nosa literatura popular infantil.
28/04/2021. INVESTIGACIóN
A Real Academia Galega presenta o estudo Avaliación da competencia bilingüe nos idiomas galego e castelán do alumnado de 4º da ESO, onde se analiza a competencia en comunicación lingüística da denominada xeración Z, poñendo os datos en relación con variables sociodemográficas, sociolingüísticas e escolares. Malia que, por mandato legal, o sistema educativo debe garantir que o alumnado remate a ESO coa mesma competencia nos dous idiomas oficiais, o estudo constata un evidente desequilibrio en detrimento do galego, relacionado co perfil lingüístico do alumnado, o hábitat e a titularidade do centro. Así, mentres os galegofalantes demostran ter unha competencia equilibrada nos dous idiomas, máis do 35% dos castelanfalantes teñen unha competencia bastante máis deficiente en galego ca en castelán. A competencia bilingüe tamén é máis máis homoxénea nos centros públicos e no rural; sendo o alumnado do ámbito urbano e da rede privada o que amosa peor competencia en galego.
23/04/2021. DINAMIZACIóN
A Asociación Cultural Correlingua convoca o Cantalingua 2021, un concurso musical dirixido a bandas ou solistas que desenvolven a súa actividade en galego. As cancións presentadas a concurso deben ser orixinais e a letra debe estar integramente en lingua galega. O prazo para enviar as propostas, en formato MP3, remata o vindeiro 31 de maio de 2021. Os tres primeiros clasificados terán a oportunidade de actuar dentro da programación do Correlingua 2021, que se desenvolverá no vindeiro outono baixo o lema Inmunízate co galego!. Para ampliar información, preme aquí.