O xurado do III Premio Lingua e Empresa, promovido polo Concello de Ames, acordou que as empresas galardoadas nesta edición do 2020 son o diario tecnolóxico Código Cero, na categoría de "uso consolidado da lingua", e mais o centro óptico e auditivo Ollar, na categoría de "nova incorporación ou creación". O Servizo de Normalización Lingüística do Concello de Ames, en colaboración coa Concellaría de Promoción Económica, convoca anualmente este certame co obxectivo de promover o galego na actividade económica e premiar o compromiso das empresas municipais coa nosa lingua. Para obter máis información, preme aquí.
11/12/2020. AXUDAS E PREMIOS
10/12/2020. AXUDAS E PREMIOS
O xurado da cuarta edición dos premios Youtubeir@s, certame deseñado para fomentar a creación de contidos en galego en Youtube, fixo público os gañadores nas diferentes categorías. Os traballos e canles premiadas son: Pradorua (mellor canle), Olaxonmario (mellor youtubeir@), "O cabalo de Alberte Merlo" (mellor vídeo), "As patacas do paraíso" (premio á calidade lingüística), "Xogando con Ana Pontón aos Sims" (premio ao impacto), "Os 20 do XX. As Irmandades da Fala" (premio á calidade técnica), Un rapá transquilo (premio á comunicación), O Son das Ideas (premio á creatividade), "Lume" (mellor vídeo musical), Naturiza (premio didáctico), Cousas RarismASRM (premio pioneiro) e "Apps para docentes" (premio do público).
09/12/2020. DINAMIZACIóN
O Concello de Bueu presenta a iniciativa “A lingua no audiovisual galego”, organizada ao abeiro do programa “Bueu e a fala”, deseñado para analizar durante os vindeiros anos a situación do galego nos diferentes ámbitos sociais. No caso desta primeira iniciativa, trátase dunhas xornadas, que se desenvolverán entre os días 10 e 13 de decembro de 2020, nas que se debaterá sobre a situación da lingua no audiovisual galego, se presentará a iniciativa “Xabarín” (da Mesa pola Normalización Lingüística) e se falará dos usos lingüísticos no filme Ons. Todas estas sesións poderás seguilas en liña a través das canles de Youtube e Facebook do Concello de Bueu. A maiores, no Centro Social do Mar terá lugar a preestrea deste mesmo filme, Ons, de Alfonso Zarauza, e mais a proxección do documental Reboiras, acción e corazón, de Alberte Mera. Para ampliar información, preme aquí.
07/12/2020. CURSOS E CONGRESOS
Xa podes consultar en liña os relatorios das dúas xornadas sobre a educación plurilingüe que organiza o Consello da Cultura Galega (primeira xornada e
segunda xornada). O debate en directo da primeira xornada, que estaba previsto para o pasado 3 de decembro, tivo que ser adiado ata novo aviso. O debate da segunda xornada poderás seguilo en directo o vindeiro 10 de decembro, ás 18:00 h, a través do sitio web do CCG ou da súa canle de Youtube. Se o desexas, tamén podes participar enviando as túas preguntas a participa@consellodacultura.gal.
segunda xornada). O debate en directo da primeira xornada, que estaba previsto para o pasado 3 de decembro, tivo que ser adiado ata novo aviso. O debate da segunda xornada poderás seguilo en directo o vindeiro 10 de decembro, ás 18:00 h, a través do sitio web do CCG ou da súa canle de Youtube. Se o desexas, tamén podes participar enviando as túas preguntas a participa@consellodacultura.gal.
07/12/2020. AXUDAS E PREMIOS
O xurado dos Premios da Cultura Galega fixo públicos os/as oito galardoados/as que son recoñecidos/as este ano 2020 polo seu labor no ámbito da creación, conservación e difusión cultural. Na categoría de Lingua, nesta edición outorgóuselle o premio a Xosé González Martínez, dinamizador cultural e lingüístico e promotor do colectivo Galeguizar Galicia. Nas restantes categorías, os galardoados/as son Ledicia Costas (Letras), Xurxo Lobato (Artes Plásticas), FEGATEA (Artes Escénicas), aCentral Folque (Música), Chema Prado (Audiovisual), Fundación Penzol (Patrimonio Cultural) e Ildiko Szijj (Proxección Exterior). Para ampliar esta información, preme aquí.
07/12/2020. OUTRAS
Despois de ter sido adiado o pasado mes de maio por mor da emerxencia sanitaria, finalmente a Real Academia Galega celebrará o pleno extraordinario das Letras Galegas, este ano en homenaxe a Ricardo Carvalho Calero, o vindeiro 12 de decembro de 2020. O acto terá lugar no paraninfo da Universidade de Santiago de Compostela, institución na que o homenaxeado impartiu clases como primeiro catedrático de Lingüística e Literatura Galega, e nel participarán os/as académicos/as Margarita Ledo Andión, Xesús Alonso Montero, Ramón Villares e Francisco Fernández Rei. A sesión será retransmitida en directo e poderá seguirse a través da páxina web da RAG. Para ampliar esta información, preme aquí.
03/12/2020. AXUDAS E PREMIOS
A Secretaría Xeral de Política Lingüística, o Parlamento de Galicia e o Foro Enrique Peinador convocan conxuntamente a vixésimo sétima edición dos Premios de Publicidade en Galego. Establécense cinco premios, un para cada unha das seguintes categorías: radio, televisión, Internet, prensa escrita e un extraordinario para os proxectos elaborados polo alumnado de centros educativos. O prazo de inscrición e de presentación dos traballos está aberto ata o 30 de decembro de 2020. Para consultar as bases completas preme aquí.
01/12/2020. DINAMIZACIóN
O Portal das Palabras convídate a elixir un ano máis a Palabra do ano, co obxectivo de que a sociedade tome conciencia de que o idioma nos representa como pobo e a través das súas palabras podemos definir colectiva e simbolicamente as nosas experiencias vitais. Todas as persoas interesadas poden enviar as súas propostas ata o vindeiro 13 de decembro. Tras seleccionar os termos máis populares e de maior carga semántica, abrirase un novo período de votación entre o 14 e o 25 de decembro para elixir definitivamente a palabra que mellor describe este ano que está a piques de rematar.
30/11/2020. DINAMIZACIóN
A axencia de publicidade Freshysweet, formada por estudantado da Facultade de Ciencias Sociais e da Comunicación da Universidade de Vigo, presentan unha nova edición da iniciativa Usa a lingua, que este ano se desenvolverá de xeito virtual a través de Instagram entre os días 30 de novembro e 4 de decembro de 2020. O programa de actividades inclúe unha serie de coloquios (David Amor, Aí Falaches, Patricia Hermida, Dani Irimia e Orgullo Galego) e concertos (The Rapants e Dakidarría), dirixidos a promover o uso do galego entre a mocidade. Para ampliar información preme aquí.
27/11/2020. INVESTIGACIóN
O Consello da Cultura Galega (CCG) presenta a publicación Variedades lingüísticas en contacto na Península Ibérica, editada por Francisco Dubert-García, Víctor Míguez e Xulio Sousa. A obra compila sete traballos nos que se analizan, desde múltiples perspectivas, diferentes situacións de contacto lingüístico entre comunidades da Península Ibérica, poñendo o foco nos fenómenos de préstamo, interfencia, transferencia e converxencia que son propios destas relacións entre idiomas e/ou variedades lingüísticas. A publicación está accesible (tanto para a súa cosulta en liña como para a descarga) no sitio web do CCG.
24/11/2020. CURSOS E CONGRESOS
Escolas Católicas Galicia presenta unha nova edición da súa Xornada de Normalización Lingüística, organizada anualmente co obxectivo de intercambiar experiencias e recursos didácticos en galego entre o profesorado e os membros dos equipos de dinamización da lingua galega dos centros educativos de Galicia. Nesta ocasión analizaranse as posibilidades didácticas que ofrecen museos coma o MUPEGA, daráselles visibilidade a recursos e ferramentas útiles para o labor pedagóxico en tempos de confinamento e entregaranse os Premios Irmáns Reboiras á mellor iniciativa (virtual) de fomento do galego. Por mor das actuais circunstancias sanitariais, este ano as sesións desenvolveranse en liña, o vindeiro 26 de novembro, en horario de 16:00 h a 18:00 h, e poderás seguilas en directo na canle de Youtube de Escolas Católicas.
23/11/2020. DINAMIZACIóN
O Campus Terra e o Servizo de Normalización Lingüística da Universidade de Santiago de Compostela presentan a quinta edición de “DivulgaTerra. Petiscos de divulgación científica”, unha iniciativa deseñada para darlle visibilidade ao traballo desenvolvido polos investigadores/as do Campus Terra e promover a utilización do galego como ferramenta para a comunicación científica. As sesións terán lugar os días 1 e 3 de decembro de 2020, a partir das 19,30 h, na Casa do Saber (praza de Pío XII, Lugo). Se desexas asistir presencialmente, podes enviar a túa solicitude (para dúas persoas como máximo) a a cultura.lugo@usc.es a partir do 27 de novembro. As dúas sesións serán retransmitidas en directo na canle de YouTube do Campus Terra.
23/11/2020. DINAMIZACIóN
O Concello de Santiago de Compostela e a Cámara de Comercio convocan a vixésimo primeira edición dos Premios Manuel Beiras, que teñen como finalidade recoñecer o compromiso coa normalización lingüística no sector empresarial compostelán, premiando o uso do galego na comunicación comercial. Nesta edición engádese ás bases da convocatoria unha nova categoría, "empresa innovadora no uso do galego", que se suma ás outras dúas que xa se incluían en edicións anteriores: "empresa cun uso continuado da lingua galega" e "empresa de nova incorporación ao uso da lingua galega". O xurado dará a coñecer as empresas gañadoras o 21 de decembro de 2020.
No sitio web da iniciativa atoparás as bases completas da convocatoria, así como información sobre edicións anteriores.
No sitio web da iniciativa atoparás as bases completas da convocatoria, así como información sobre edicións anteriores.
23/11/2020. INVESTIGACIóN
Cando se cumpren xa 29 anos da súa creación, o Instituto Galego de Análise e Documentación Internacional (IGADI) quere deixar constancia do seu compromiso fundacional co uso da lingua galega coa presentación da obra O mundo en galego. Comprender o global desde aquí. Trátase dunha publicación na que 17 analistas e especialistas galegos/as de recoñecido prestixio internacional reflexionan sobre a conveniencia de presentar a Galicia no exterior partindo do idioma galego, como parte consubstancial á nosa identidade. No web do IGADI podes obter máis información sobre esta iniciativa.
20/11/2020. CURSOS E CONGRESOS
O Grupo de Investigación Lingüística e Literaria (ILLA) da Universidade da Coruña organiza unha xornada de debate académico sobre os neofalantes e as súas características lingüísticas. O encontro, no que participarán diferentes especialistas en neofalantismo, terá lugar no Salón de Graos da Facultade de Filoloxía da UDC o vindeiro 27 de novembro de 2020. Todas as sesións serán presenciais. Para obter máis información, preme aquí.
20/11/2020. DINAMIZACIóN
A Coordinadora de Traballadores/as de Normalización da Lingua organiza unha nova edición do LGx15, unha iniciativa deseñada para difundir, a través de charlas breves e amenas, argumentos e experiencias para influír no futuro do galego. Este ano os participantes serán Ángel Carracedo, Laura Marín, Verto, Adrián Dios, Bea Campos, Esther Estévez e Manuel Gago. Nesta ocasión, debido á actual situación de emerxencia sanitaria, o evento non será presencial pero terás igualmente a ocasión de ver en liña todos os vídeos dos/as participantes, que se farán públicos nestas datas. Tamén podes ver as intervencións das edicións anteriores na canle de Youtube da CTNL.
19/11/2020. CURSOS E CONGRESOS
Transcorrida unha década desde a aprobación do Decreto 79/2010 para o plurilingüismo no ensino non universitario de Galicia, o Consello da Cultura Galega quere contribuír ao debate sosegado sobre a educación plurilingüe, analizando o concepto desde a perspectiva das linguas minorizadas e das comunidades bilingües, e ofrecendo experiencias e datos do que está a acontecer no ámbito do ensino en Galicia. Con este obxectivo, o vindeiros días 3 e 10 de decembro de 2020 terán lugar os debates en liña "Educación prulingüe: achegas para o debate", que poderás seguir en directo desde a páxina web do CCG, e participar enviando as preguntas a participa@consellodacultura.gal. Os vídeos das intervencións, gravados previamente, estarán accesibles en liña tres días antes da celebración de cada sesión de debate.
13/11/2020. CURSOS E CONGRESOS
Xa tes ao teu dispor na páxina web do CCG todos os vídeos coas intervencións dos XXII Encontros para a Normalización Lingüística, onde diferentes profesionais, representantes políticos e expertos/as dos ámbitos da socioloxía e da planificación lingüística reflexionan sobre a integración lingüística das persoas migrantes. A partir de agora, se desexas participar nas diferentes sesións de debate que terán lugar entre os días 16 e 19 de novembro de 2020, podes enviar as túas preguntas ao enderezo participa@consellodacultura.gal.
13/11/2020. OUTRAS
A Real Academia Galega presenta a listaxe cos nomes oficiais en lingua galega das oitenta e oito constelacións recoñecidas pola Unión Astronómica Internacional. O traballo, froito da colaboración entre o Seminario de Terminoloxía da RAG e o equipo composto por Salvador Bará, Martin Pawley e Dosi Veiga, constitúe un importante pulo para a normalización do galego no eido da comunicación e divulgación científicas. Podes ampliar esta información premendo aquí.
09/11/2020. CURSOS E CONGRESOS
Desde o CDSG retomamos a vixésimo segunda edición dos Encontros para a Normalización Lingüística, que foron adiados o pasado mes de abril por mor da pandemia da Covid-19 e que agora presentamos nun novo formato virtual adaptado ás actuais circunstancias sanitarias. Tal e como avanzamos no seu día, o fío condutor desta edición será a integración lingüística das persoas migrantes como ferramenta de cohesión social.
As intervencións, gravadas con antelación, estarán accesibles na Rede o vindeiro 13 de novembro de 2020. Posteriormente, entre os días 16 e 19 de novembro terán lugar as sesións de debate que se indican no programa, que serán retransmitidas en directo a través do sitio web do CCG. Se desexas particiar nestes debates, abertos ao público sen inscrición previa, podes facelo enviando as túas preguntas ao enderezo participa@consellodacultura.gal.
As intervencións, gravadas con antelación, estarán accesibles na Rede o vindeiro 13 de novembro de 2020. Posteriormente, entre os días 16 e 19 de novembro terán lugar as sesións de debate que se indican no programa, que serán retransmitidas en directo a través do sitio web do CCG. Se desexas particiar nestes debates, abertos ao público sen inscrición previa, podes facelo enviando as túas preguntas ao enderezo participa@consellodacultura.gal.
09/11/2020. DINAMIZACIóN
O Servizo de Normalización Lingüística e o Departamento de Mocidade do Concello de Ames convocan o I Certame #GaleTikTokers, co obxectivo de estimular a creatividade e fomentar a creación de vídeos en galego entre a mocidade, nomeadamente entre a comunidade de tiktokers. Poden participar no certame todas as mozas e mozos amesáns a partir de 14 anos, de xeito individual ou en parellas. Os vídeos deben ser de creación propia, a través da aplicación TikTok, e teñen que estar en lingua galega (con presenza oral, escrita ou musical). En cada categoría outorgaranse dous premios (premio do público e premio do xurado) de 150 euros cada un. O prazo de inscrición remata o 30 de novembro de 2020. Para ampliar información, preme aquí.
04/11/2020. CURSOS E CONGRESOS
A edición en linguas minorizadas será o fío condutor da décimo sétima edición do Simposio “O libro e a lectura”, que organiza anualmente a Asociación Galega de Editoras (AGE) e que nesta ocasión, debido ás restricións sanitarias, non contará con público presencial. O acto difundirase en directo desde o auditorio do Consello da Cultura Galega, mañá 5 de novembro de 2020, e poderás seguilo na canle de Youtube da AGE. Diferentes representantes das editoras galegas independentes e as presidencias dos gremios e asociacións de editores de Catalunya, Valencia e Euskadi reflexionarán sobre a situación da edición en galego, catalán e éuscaro. Para coñecer o programa completo, preme aquí.
02/11/2020. DINAMIZACIóN
O Correlingua, iniciativa lúdico-didáctica deseñada para que o alumnado de todos os ciclos educativos reivindique publicamente o uso do galego, festexerá os seus vinte anos de traxectoria cun programa de actividades que se desenvolverán durante o mes de novembro en doce centros escolares. Baixo o lema “Vinte coa lingua!”, nesta vixésima edición celebranse de xeito presencial 16 actuacións, que tamén serán retransmitidas na Rede para que todos os centros escolares que o desexen teñan a posibilidade de asistir de xeito virtual. Para ampliar información, preme aquí.
02/11/2020. EMPREGO
A Consellería de Cultura, Educación e Universidade da Xunta de Galicia publica a convocatoria de 8 bolsas de formación nos lectorados de lingua, literatura e cultura galegas dos centros de estudos galegos de diferentes universidades (Barcelona, Estremadura, Granada, Madrid, Lisboa, Padua, Río de Janeiro e São Paulo). O programa de formación das persoas seleccionadas terá unha duración máxima de 3 anos. O prazo de presentación de solicitudes é dun mes, contado a partir do día seguinte ao da publicación da convocatoria.
30/10/2020. DINAMIZACIóN
O Padroado dos Premios San Martiño de Normalización Lingüística fixo públicos os gañadores da edición deste ano 2020. Os premiados son a Asociación Cultural Vagalumes, na modalidade “A Estrada e comarca de Terra de Montes” e a agrupación musical A Banda da Loba na modalidade “Galicia enteira”. Os premios entregaranse o vindeiro 13 de novembro no transcurso dunha rolda de prensa, no Teatro Principal da Estrada. Para obter máis información, preme aquí.
29/10/2020. DINAMIZACIóN
O Consello da Cultura Galega (CCG) organiza unha nova edición do seu tradicional Concerto das Letras Galegas, que terá lugar mañá, 30 de outubro de 2020, ás 19:30 h, no Auditorio de Galicia, en Santiago de Compostela. O programa deste ano recolle a innovación musical do Taller Atlántico Contemporáneo e no repertorio ofrecerannos un diálogo entre a música e a literatura galegas con pezas de Fernando Buide del Real, de Xan Viaño e de César Morán. Para pechar o programa asistiremos á estrea dunha nova peza, encargada a Nani García, sobre un poema de Ricardo Carballo Calero, autor homenaxeado no Día das Letras Galegas 2020. Dadas as circunstancias especiais que estamos a vivir por mor da pandemia da Covid-19, nesta edición non haberá público presencial na sala mais o concerto emitirase en directo e poderase seguir desde a páxina web do CCG.
29/10/2020. DINAMIZACIóN
A Xunta de Galicia organiza unha nova edición do programa Novembro, mes da ciencia en galego nas bibliotecas, co obxectivo de difundir a divulgación científica en galego en todas as bibliotecas públicas e escolares. Igual ca en edicións anteriores, o programa de actividades está acompañado polo manifesto dun científico/a galego/a e nesta edición asínao o biólogo e divulgador científico Xurxo Mariño. A maiores, tamén atoparás en Internet unha compilación de materiais didácticos en galego de temática científica, unha escolma de traballos realizados pola comunidade educativa e mais unha colección de imaxes en Pinterest coas portadas de libros informativos de interese para as bibliotecas escolares.
29/10/2020. OUTRAS
O proxecto Youtubeir@s elaborou unha breve guía de recursos en Youtube, dirixida á comunidade educativa, cunha selección de vídeos de carácter didáctico sobre diferentes áreas do saber (ciencia, plástica, literatura e lingua, música, natureza…). O obxectivo é que, inspirándose nos diferentes proxectos e canles seleccionadas, tanto o profesorado como o alumnado se anime a aproveitar o Youtube como ferramenta para a transmisión de coñecementos educativos e a crear os seus propios contidos en lingua galega.
27/10/2020. OUTRAS
A Facultade de Ciencias Sociais e da Comunicación da Universidade de Vigo, en colaboración coa Área de Normalización Lingüística desta universidade, organiza o ciclo de coloquios Redes Galegas, que se desenvolverá de xeito virtual, a través do Campus Remoto, os dias 29 de outubro e 5 e 12 de novembro de 2020. Trátase de tres sesións de debate nas que diferentes profesionais do ámbito da comunicación dixital (Mario Brión, María Yáñez, Adriana Villamisar, Pilar Ponte, David Sousa e María Reimunde) reflexionarán sobre a presenza da cultura galega en Internet e sobre o aproveitamento das redes sociais para a promoción do galego entre as xeracións máis novas. Podes ampliar información premendo aquí.
27/10/2020. AXUDAS E PREMIOS
A Coordinadora de Traballadores/as de Normalización da Lingua (CTNL) retoma o prazo de inscrición na segunda edición dos Premios Mil Primaveras, que fora interrompido o pasado mes de marzo por mor da crise sanitaria ocasionada pola Covid-19. O obxectivo destes premios é recoñecer e difundir exemplos de boas prácticas no ámbito da normalización lingüística. Poderán presentarse accións, campañas, programas e proxectos de promoción do uso e prestixio do galego, desenvolvidos total ou parcialmente en 2018, 2019 ou 2020. O novo prazo para a inscrición das iniciativas, que debe ser feita pola propia entidade organizadora, remata o 31 de xaneiro de 2021. Os proxectos presentados con anterioridade á interrupción do prazo, non teñen que inscribirse de novo. Para ampliar información preme aquí.