CONCERTO DAS LETRAS GALEGAS 2020

EN LIÑA. SANTIAGO DE COMPOSTELA
Información
En liña
A celebración do Día das Letras Galegas naceu en 1963 asociada coa tradición literaria, na que salientan nomes de figuras homenaxeadas que deron pulo ás nosas letras. Dende hai dez anos, o Consello da Cultura Galega vén contribuíndo a esta celebración co Concerto das Letras Galegas, unha festa de véspera na que toma protagonismo a música galega. Convencidos do valor esencial que a música ten na preservación da identidade cultural de Galicia, naquel xa afastado ano 2011, os membros do Plenario do Consello da Cultura Galega acordaron programar un concerto institucional con vocación de permanencia no tempo para contribuír a reforzar a dimensión festiva e conmemorativa do Día das Letras Galegas. Ramón Villares, daquela presidente da institución, e Maximino Zumalave, coordinador na altura da Sección de Música e Artes Escénicas e director musical de moitas das súas edicións, foron os artífices dun proxecto que cumpre agora unha década de frutífera vida.

Os repertorios desta década permitiron xuntar a tradición musical galega, tanto popular coma clásica, e ofrecéronnos obras de nova creación dedicadas aos autores e autoras homenaxeados no Día das Letras Galegas, feitas de encarga por compositores contemporáneos. Imos creando así un corpus propio no que a música galega dialoga coa contemporaneidade e acada dimensión internacional. É unha extraordinaria viaxe diatópica e diacrónica que contribúe a materializar o desexo da Xeración Nós, lembrada decote polo centenario neste 2020: converter Galicia en célula de universalidade. As músicas folk de Milladoiro ou SondeSeu; o virtuosismo da Real Filharmonía de Galicia, as voces de coros de toda Galicia ou de solistas magníficos como Carmen Durán, Anaís G. Fernández Cerneira ou Gabriel Alonso; as composicións de Roxelio Groba, Chané, Antón García Abril, Pascual Veiga, Rubén Vizcaíno, Octavio Vázquez, Miguel Matamoros ou Xavier de Paz, entre outros, e as olladas sobre a tradición galega de compositores foráneos do talle de Enrique Granados ou Joly Braga Santos permitíronnos abrirnos ao mundo. Dende aquel primeiro concerto de maio do 2011 na Igrexa de San Domingos de Bonaval en Santiago de Compostela viaxamos a Pontevedra, Lugo, A Coruña e Ourense con homenaxes a Lois Pereiro, Valentín Paz-Andrade, Xosé María Díaz Castro, Roberto Vidal Bolaño, Filgueira Valverde, Manuel María, Carlos Casares, María Victoria Moreno e Antón Fraguas.

Este 2020, cando facemos dez anos de periplo, programouse dende a innovación musical do Taller Atlántico Contemporáneo, que tamén cumpre unha década de existencia. No programa ofrécennos un diálogo entre a música e a literatura galegas con pezas de Fernando Buide del Real, de Xan Viaño -cun aceno á cultura da comarca ferrolá - e de César Morán sobre un poema de Rosalía de Castro. Pecha o programa, como adoito, en estrea absoluta, unha nova peza, encargada a Nani García sobre un poema de Ricardo Carballo Calero, autor homenaxeado no Día das Letras Galegas 2020.

Neste ano 2020 o concerto debía chegar a Ferrol, a cidade en que veu ao mundo un día 30 de outubro de 1910, e facelo ao Teatro Jofre, tan vencellado á súa biografía real e sentimental. A crise sanitaria, agravada na comarca ferrolá nos derradeiros días de outubro, non o fixo posible. Sen alterarmos o programa, o Concerto das Letras Galegas 2020 grávase e emítese en directo desde o Auditorio de Galicia. Porque non debemos desistir de manter activa a cultura en tempos de pandemia, como Ricardo Carballo Calero e os seus compañeiros de xeración non desistiron de manter o facho aceso en circunstancias ben máis dramáticas.
Ficha técnica
CONCERTO DAS LETRAS GALEGAS 2020
CONCERTO DAS LETRAS GALEGAS 2020
Concerto. EN LIÑA. SANTIAGO DE COMPOSTELA
Consello da Cultura Galega
Pazo de Raxoi, 2º andar
Praza do Obradoiro, s/n 15705
Santiago de Compostela
Tel.: 981 957 202 / Fax.: 981 957 205