Dorothé Schubarth chega a Galicia en 1978 atraída pola inmensa riqueza da música de tradición oral galega. Iniciou entón un traballo de cinco anos nos que, coa axuda dunha bolsa da Fundación Barrié, percorreu Galicia realizando un traballo de recollida novidoso que introducía o punto de vista do informante. As súas dificultades coa lingua galega precisaron de axuda e atopouna en Antón Santamarina, filólogo da Universidade de Santiago de Compostela, que se converteu nunha parte importante do traballo de recompilación, transcrición de textos e clasificación.

O seu intenso traballo de recolleita abrangue 38 zonas xeográficas galegas e limítrofes. Comezou na serra do Caurel e recolleu nos seus cadernos e en 5 000 cintas de casete cancións, contos, lembranzas e testemuñas de moitísimas persoas e lugares. O resultado deste inmenso labor foi a publicación do Cancioneiro Popular Galego, conformado por sete volumes, editado pola Fundación Barrié en 1984.

A finais dos anos 90, Dorothé Schubarth depositou no Consello da Cultura Galega as casetes orixinais, os 248 CD coa súa dixitalización e 19 carpetas con transcricións e notas manuscritas. O material completo está dispoñible para consultas presenciais nas instalacións do Arquivo Sonoro de Galicia e, de maneira parcial, a través do Mapa Sonoro de Galicia.