Noticias

Acción exterior do Consello da Cultura Galega. Rexistros1 a 30 de 493
13/05/2024

Rebeca Blanco-Rotea e André Teixeira abordan a situación da arqueoloxía na segunda sesión de Vidas paralelas

O Museu Arqueológico do Carmo (Lisboa) é o escenario elixido para a segunda sesión de Vidas paralelas, formato que o Consello da Cultura Galega (CCG) e a Universidade de Lisboa puxeron en marcha para poñer en valor figuras destacadas con traxectorias similares en Galicia e Portugal. Nesta ocasión, falarase de arqueoloxía con Rebeca Blanco-Rotea e André Teixeira, dúas figuras representantes dunha nova xeración de arqueólogos, con sólidas carreiras investigadoras arredor do patrimonio cultural fronteirizo. Xa se poden consultar no web do CCG as entrevistas previas que lles fixeron Xosé A. López Silva e Ana Tarrío, nas que ambos repasan as súas traxectorias profesionais. O coloquio presencial será o luns 13 de maio ás 17:00 horas.
02/05/2024

Un encontro analiza a arquitectura fortificada da Raia

As fortificacións históricas construídas tras a independencia de Portugal, no século XVII, son hoxe un rico patrimonio cultural que se estuda desde diferentes ámbitos académicos. Co obxectivo de explorar e promover o coñecemento e a conservación das paisaxes defensivas transfronteirizas, o Consello da Cultura Galega (CCG) e a Universidade do Minho organizan este venres a xornada A arquitectura fortificada da Idade Moderna como construto da fronteira miñota. A presidenta do CCG, Rosario Álvarez, inaugura esta sesión, que se enmarca no ciclo “Conversas na Raia”, e que nesta ocasión se desenvolve en Vila Nova de Cerveira.
17/04/2024

A lírica medieval centra a colaboración co XIV Congreso Internacional de Estudos Galegos

A presidenta do Consello da Cultura Galega (CCG), Rosario Álvarez, participou esta mércores en Braga na apertura oficial do XIV Congreso Internacional da Asociación Internacional de Estudos Galegos (AIEG) que se celebra baixo o lema “Horizontes dos Estudos Galegos e /na Lusofonía”. No marco desta edición, o CCG desenvolveu ese mesmo día a mesa redonda "A interpretación do repertorio lírico-medieval hoxe: enxeñería e investigación coordinada por Rebeca Blanco-Rotea, vogal da Comisión Executiva e coordinadora da Sección de Patrimonio e Bens Culturais. Ademais, a presidenta inaugurou a nova itinerancia da exposición Afonso X e Galicia, que afonda na conexión do Rei Sabio con Galicia.
13/04/2024

A exposición Inventio Mundi chega a Castelló

A cidade de Castelló acolle unha nova itinerancia de Inventio Mundi, un proxecto expositivo producido polo Consello da Cultura Galega (CCG) en colaboración coa Secretaría Xeral da Emigración da Xunta de Galicia que documenta as consecuencias que o éxito da expedición Magalhães/Elcano tivo para Galicia. A mostra, comisariada por Ofelia Rey, inaugúrase este domingo, 14 de abril, ás 19:30 horas. O acto terá lugar na sala de exposicións do Edificio Moruno de El Grau, onde a exposición permanecerá ata o vindeiro 12 de maio.
03/04/2024

A presidenta inicia unha viaxe institucional a Salvador da Bahia

A presidenta do Consello da Cultura Galega (CCG), Rosario Álvarez, continúa co seu programa de acción exterior cunha viaxe institucional a Salvador da Bahia. A súa axenda comeza este xoves, 4 de abril, coa inauguración no Museu de Arte da Bahia da exposición Afonso X e Galicia, o proxecto organizado polo CCG coa colaboración da Xunta de Galicia e as deputacións de Ourense e Lugo, que continúa a súa itinerancia no Brasil. No marco desta viaxe a presidenta impartirá diferentes conferencias e manterá reunións coa colectividade galega e con membros da Assembleia Legislativa da Bahia.
06/03/2024

A mostra As xeracións do Monserrat inaugúrase esta tarde en Vigo

A presidenta do Consello da Cultura Galega (CCG), Rosario Álvarez, xunto co alcalde do Concello de Vigo, Abel Caballero, e o secretario territorial da Delegación da Xunta de Galicia en Vigo, Fernando González Abeijón, inauguran esta tarde (ás 20:00 horas) na Casa das Artes a exposición As xeracións do Monserrat. Memoria emocional da emigración galega ao Reino Unido. No acto participará tamén Xosé Manoel Núñez Seixas, vicepresidente do CCG e director do Arquivo da Emigración Galega. A mostra, comisariada por Xesús Fraga e con deseño de Pepe Barro, constrúe un relato do fluxo migratorio cara ao país británico a través de fotografías, documentos e obxectos pertencentes aos seus protagonistas. O proxecto expositivo poderá visitarse na cidade olívica ata o próximo 26 de maio.
21/02/2024

Rosario Álvarez deposita na nova Biblioteca Rosalía de Castro de Curitiba (O Brasil) unha escolma de obras sobre a autora

A presidenta do Consello da Cultura Galega (CCG), Rosario Álvarez, iniciou este martes unha viaxe institucional por Curitiba. Alí inaugurou na sede que o Instituto Cervantes ten na cidade brasileira a mostra Galicia imaxinada nas revistas da emigración, un proxecto que retrata a Galicia de finais do século XIX e inicios do XX a través da visión da colectividade emigrada alén mar. Após a apertura da exposición, tivo lugar o acto de nominación da biblioteca do centro como Biblioteca Rosalía de Castro, na que Rosario Álvarez depositou diferentes publicacións editadas polo CCG e mais pola Fundación Rosalía de Castro.
08/02/2024

A mostra Luces de alén mar chega á Facultade de Ciencias da Educación da Universidade de Santiago de Compostela

A presidenta do Consello da Cultura Galega (CCG), Rosario Álvarez, e Mar Lorenzo, decana da Facultade de Ciencias da Educación da Universidade de Santiago de Compostela (USC), inauguraron na sede que a facultade ten no Campus Vida a mostra expositiva Luces de alén mar. As escolas de americanos en Galicia. O acto tivo lugar na mañá deste xoves, 8 de febreiro (12:00 horas), e nel participou tamén o comisario da mostra, Vicente Peña Saavedra. A exposición, que documenta o importante labor educativo desenvolto pola emigración galega nas súas parroquias natais, permanecerá aberta ata o próximo 29 de febreiro.
26/01/2024

A presidenta inaugura en Barcelona a mostra Afonso X e Galicia

O proxecto expositivo Afonso X e Galicia, producido polo Consello da Cultura Galega (CCG) coa colaboración da Xunta de Galicia e a Deputación de Ourense, recala no Edifici Històric da Universitat de Barcelona (UB). A presidenta do CCG, Rosario Álvarez; o reitor da UB, Joan Guàrdia; o vicedecano de Investigación e Relacións Internacionais da Facultade de Filoloxía e Comunicación da UB, Josep Solervicens, e o comisario da exposición, Antoni Rossell, inauguraron a mostra nun acto que contou tamén coa actuación do grupo de gaitas da Asociación Cultural Galega Rosalía de Castro de Cornellà. Ao remate, Antoni Rossell e Luciano Pérez, do Centro de Artesanía e Deseño (CENTRAD), realizaron unha visita guiada á exposición, que permanecerá aberta ata o próximo 22 de febreiro.
18/01/2024

Incorpóranse ao Repertorio da prensa da emigración galega novos números do xornal Correo de Galicia

O Repertorio da prensa da emigración galega, proxecto que mantén o Arquivo da Emigración Galega (AEG) do Consello da Cultura Galega (CCG), suma 86 novos números da cabeceira Correo de Galicia. O xornal, editado en Bos Aires entre os anos 1908 e 1945, foi o voceiro da colectividade galega emigrada no Río da Prata. As súas páxinas contiñan información de interese para as persoas emigrantes, así como novas locais e outras sobre a actualidade de Galicia. Os exemplares que se incorporan neste mes de xaneiro corresponden a diferentes números publicados no período 1919-1920.
15/01/2024

A exposición Afonso X e Galicia chega a Boloña

Nunha nova itinerancia internacional, a mostra Afonso X e Galicia abre hoxe as súas portas na Sala Falchieri do Dipartimento di Lingue, Letterature e Culture Moderne (LILEC) da Università di Bologna. O proxecto, que realiza un percorrido pola poliédrica figura de Afonso X e a súa particular conexión con Galicia, poderá visitarse na cidade italiana ata o próximo 15 de marzo.
11/01/2024

A proxección exterior da cultura galega será unha das prioridades do CCG en 2024

O Consello da Cultura Galega (CCG) celebrou hoxe o primeiro pleno da institución, no que se deron conta das liñas de programación da institución para o ano 2024 e se definiu o calendario de renovacións da institución para este ano. O reforzo da proxección exterior e da internacionalización da cultura galega será unha das liñas forza clave, xunto coa atención aos profundos cambios na creación e recepción cultural polo impacto das tecnoloxías dixitais. Ao pleno asistiu o presidente da Xunta de Galicia, Alfonso Rueda, en calidade de presidente de honra do CCG.
15/12/2023

Inaugurada en Miño a mostra que rende homenaxe a Antón Crestar e á emigración galega en Uruguai

A presidenta do Consello da Cultura Galega, Rosario Álvarez; o alcalde de Miño, Manuel Vázquez Faraldo; e o cónsul de Uruguai en Galicia, Asturias, Cantabria e País Vasco, Ramiro Rodríguez Bausero; xunto co secretario xeral da Emigración, Antonio Rodríguez Miranda, inauguraron hoxe en Miño a mostra 'Miñenses no Uruguai: Homenaxe a Antón Crestar'. Trátase dunha dobre homenaxe: aos veciños deste concello que emigraron a Uruguai e a Antón Crestar, un dos grandes expoñentes da emigración galega no Uruguai no século XX. Rosario Álvarez destacou a importancia da colaboración cidadá nesta mostra “que nos permite, non só construír a historia de todos eles e renderlles homenaxe, senón tamén coñecer a historia do país”. Mentres tanto, Miranda incidiu en que “é un espello do legado e a resiliencia da comunidade galega en Uruguai, reflectindo nosa rica historia e cultura transatlántica”. A mostra, comisariada por Pilar Cagiao, estará aberta ata o 10 de xaneiro.
12/12/2023

Inaugurada na universidade eslovaca de Nitre a mostra Afonso X e Galicia

A exposición Afonso X e Galicia chega á Univerzita Konštantína Filozofa de Nitre, Eslovaquia, onde foi inaugurada polo seu reitor, Libor Vozár; a vicerreitora de relacións institucionais, Martina Pavlíková; máis o agregado de educación da embaixada de España en Eslovaquia, Joaquín Támara. Á inauguración asistiu un grupo de alumnos de diferentes departamentos desa universidade; o decano de la Facultad de Filosofía, Martin Hetenyi; e o decanato e director comercial de Gestamp en Eslovaquia. A mostra estará aberta ata o 29 de febreiro.
30/11/2023

O especial Historias de ida e volta documenta o labor educativo da emigración galega en América

A colectividade galega emigrada alén mar impulsou centos de iniciativas para promover a construción de escolas nos seus lugares de orixe, pero tamén nos países de acollida. En Cuba, A Arxentina, O Uruguai, O Brasil, México e Venezuela creáronse academias e centros educativos para atesourar os vínculos das novas xeracións coa lingua e cultura galegas. A nova entrega de Historias de ida e volta, proxecto do Arquivo da Emigración Galega (AEG) do Consello da Cultura Galega (CCG) que conta co apoio da Secretaría Xeral da Emigración, reflicte en vinte imaxes e documentos algúns dos proxectos educativos desenvolvidos pola emigración galega en América.
21/11/2023

As xeracións do Montserrat achégase á emigración galega ao Reino Unido

Pilar, Mary, Andrés e Tito son algúns dos protagonistas do fluxo migratorio que levou máis de douscentos mil galegos e galegas cara ao Reino Unido entre 1960 e 1974. As súas historias, narradas a través de documentos, fotografías e outros obxectos desa diáspora, poden verse na mostra As xeracións do Monserrat. Memoria emocional da emigración galega ao Reino Unido organizada polo Consello da Cultura Galega (CCG), coa colaboración do Concello da Coruña e da Xunta de Galicia. A presidenta do CCG, Rosario Álvarez, destacou na inauguración a importancia de coñecer o fenómeno migratorio para comprender a Galicia contemporánea e concretamente no período que conta a exposición “na segunda metade do século XX cando o fluxo virou cara a Europa (neste caso ao Reino Unido), e que de aí viñeron outros aires de frescura, outras novidades, outras tendencias de cambio”. Canda a ela o concelleiro da Área de Fomento e Promoción da Cidade, Gonzalo Castro, puxo de relevo a importancia da conservación do patrimonio vivo “as imaxes e relatos son fundamentais para comprender a historia da nosa terra”. Antonio Rodríguez Miranda, secretario xeral da Emigración, incidiu en que “non son só unha colección de imaxes e obxectos, senón un testemuño do sacrificio, da valentía e da esperanza dos emigrantes galegos que deixaron Galicia en busca dun futuro mellor”. O vicepresidente do CCG e director do Arquivo da Emigración Galega, Xosé M. Núñez Seixas situou a exposición no marco da área de traballo da institución do estudo e difusión do fenómeno migratorio. O escritor e xornalista Xesús Fraga é o comisario deste proxecto, que se pode ver no Kiosko Alfonso ata o día 14 de xaneiro.
21/11/2023

Paula Carballeira e Sofia Santos Silva protagonizan a sexta edición do ciclo Dramaturxias itinerantes

O Consello da Cultura Galega (CCG), a Escola Superior de Arte Dramática (ESAD) de Galicia e a Escola Superior de Música e Artes do Espetáculo (ESMAE) de Porto, en colaboración co Camões-Centro Cultural Português de Vigo, presentan unha nova edición de Dramaturxias itinerantes. O ciclo, que busca promover un maior coñecemento sobre a escrita teatral feminina máis contemporánea de Galicia e Portugal, xunta nesta edición ás creadoras Paula Carballeira e Sofia Santos Silva. A cita arrinca hoxe (18:00 horas), no Teatro Helena Sá e Costa (Porto), e repite mañá, mércores 22 (17:30 horas) na ESAD de Vigo.
16/11/2023

A mostra As xeracións do Monserrat, que relata a memoria emocional da emigración, inaugúrase o día 21 na Coruña

O Consello da Cultura Galega (CCG), coa colaboración do Concello da Coruña e da Xunta de Galicia, inaugurará o vindeiro martes 21 de novembro no Kiosco Alfonso da Coruña a mostra As xeracións do Monserrat. Memoria emocional da emigración galega ao Reino Unido. O escritor e xornalista Xesús Fraga (Londres, 1971) é o comisario deste proxecto, que relata a través de obxectos e outros documentos as historias dos seus protagonistas. Na Coruña tamén terá lugar o concerto conmemorativo do 40º aniversario do CCG. Será o venres 24 de novembro a cargo da Orquestra Sinfónica de Galicia, dirixida por Víctor Pablo Pérez e cun programa no que destaca a estrea absoluta de Terra, de Juan Durán.
16/11/2023

O Repertorio da prensa da emigración galega incorpora dúas cabeceiras editadas pola Unión Mugardesa de Instrucción

A Unión Mugardesa de Instrucción foi unha asociación integrada pola numerosa colonia de emigrantes mugardeses residentes en Cuba. No ano 1912, puxo en marcha a revista La Unión Mugardesa como medio para informar sobre o funcionamento da entidade e as actividades que esta organizaba. Posteriormente, editou o boletín Unión Mugardesa de Instrucción cun fin similar ao da anterior cabeceira. O Repertorio da prensa da emigración galega, proxecto que mantén o Arquivo da Emigración Galega (AEG) do Consello da Cultura Galega (CCG), incorpora neste mes de novembro dous números da primeira cabeceira e tres da segunda.
14/11/2023

Presentado Federico Mediante, el Salgari español que contribúe ao mellor coñecemento do fenómeno migratorio

Federico Mediante era asturiano pero sentíase fondamente galego. “ A súa historia sitúase dentro do noso interese por documentar e coñecer os nomes que conforman a emigración galega” explicou a presidenta do Consello da Cultura Galega (CCG), Rosario Álvarez, quen, xunto co secretario xeral da Emigración, Antonio Rodríguez Miranda; o vicepresidente do CCG e director do Arquivo da Emigración Galega, Xosé M. Núñez Seixas; e o ribadense Francisco Díaz-Fierros, acompañaron á autora, Ana Rosa Martínez Loredo, na presentación da obra Federico Mediante, el Salgari español. O libro fai un percorrido pola biografía e historia deste home e que tamén se pode consultar no Álbum de Galicia.
09/11/2023

A presidenta do Consello da Cultura Galega inaugura no Río de Xaneiro a mostra Afonso X e Galicia

Afonso X e Galicia, o proxecto expositivo organizado polo Consello da Cultura Galega (CCG) coa colaboración da Xunta de Galicia e as deputacións de Ourense e Lugo, continúa a súa itinerancia polo Brasil. Nesta ocasión chega ao Río de Xaneiro, onde foi inaugurado pola presidenta do CCG, Rosario Álvarez; o decano do Centro de Letras e Artes, Afranio Gonçalves Barbosa; a vicerreitora da Universidade Federal do Rio de Janeiro (UFRJ), Cássia Turci; o director da Escola de Música da UFRJ, Ronal Silveira, e o vicedirector da Escola de Música da UFRJ, Marcelo Jardim. Coa apertura da mostra comeza un programa cultural no que participan expertos vinculados ás universidades públicas das cidades do Río de Xaneiro e de Niterói, así como outros convidados á instancia destes colaboradores.
26/10/2023

O galeguismo en América centra a nova entrega de Historias de ida e volta

A colectividade galega emigrada alén mar desenvolveu un importante labor a prol da preservación da identidade cultural galega e da defensa dunha nacionalidade propia. En Cuba e Bos Aires constituíronse durante as primeiras décadas do século XX diferentes asociacións cun marcado carácter galeguista. Ademais de organizar actos para recadar fondos que enviar a Galicia, estas institucións puxeron en marcha diferentes xornais étnicos nos que divulgaban a súa ideoloxía. O especial Historias de ida e volta, proxecto do Arquivo da Emigración Galega (AEG) do Consello da Cultura Galega (CCG) que conta co apoio da Secretaría Xeral da Emigración, amosa en vinte imaxes e documentos algunhas destas publicacións, así como os mitins e outras actividades organizados para defender a causa galeguista.
24/10/2023

O proxecto audiovisual Crossing borders profunda no momento actual da música de raíz

A música de raíz galega está a traspasar fronteiras e a vivir un momento dourado sobre o que o Consello da Cultura Galega (CCG) profunda nun novo proxecto audiovisual. A presidenta do Consello da Cultura Galega, Rosario Álvarez, e o coordinador do proxecto, Manuel Gago, presentaron en rolda de prensa Crossing borders. A música TRAD galega atravesando fronteiras, tres pezas audiovisuais subtituladas en inglés que, da man de creadores como Mercedes Peón, Baiuca (Alejandro Guillán) e Uxía Senlle, entre outros, mais os expertos Óscar Losada e Marina Fernández, percorren a evolución, as especificidades e as claves do éxito da música de raíz.
19/10/2023

O Repertorio da prensa da emigración galega incorpora 15 números do Boletín de las Sociedades Gallegas Federadas

O Repertorio da prensa da emigración galega, proxecto que mantén o Arquivo da Emigración Galega (AEG) do Consello da Cultura Galega (CCG), suma quince números do Boletín de las Sociedades Gallegas Federadas. A cabeceira, que é unha continuación do voceiro Galicia, publicouse en Bos Aires entre 1943 e 1944. Editada pola Federación de Sociedades Gallegas de la República Argentina, tiña como obxectivo informar sobre a entidade editora e as sociedades que a integraban. Ademais, tamén incluía novas sobre Galicia e a colectividade emigrada.
19/10/2023

Comeza en Lubbock o IV Simposio Norteamericano de Estudos Galegos

Este xoves arrinca en Lubbock (Texas) o IV Simposio Norteamericano de Estudos Galegos que organiza a Asociación de Estudos Galegos que este ano leva por título “Camiño a Texas: unha morada galega na pradeira”. Unha cita coa que colabora o Consello da Cultura Galega (CCG) con conferencias e proxeccións.
13/10/2023

Preséntase en Braga Como levar unha vida honesta , o manual para príncipes de Martiño de Dumio

“Que as túas opinións sexan xuízos” ou “Non finxas ser o que non es, nin queiras semellas máis do que es” son algúns dos consellos que figuran en Formula vitae honestae. Un compendio de ética natural que o monxe Martiño, bispo de Dumio, escribiu a petición do rei Miro cara o ano 570 e que o Consello da Cultura Galega (CCG) traduciu ao galego o pasado mes de marzo. Este éxito da Europa medieval do momento preséntase este venres en Braga nun acto en colaboración coa Universidade do Minho que inclúe dúas visitas comentadas polos escenarios biográficos e históricos ligados a el e o seu contexto cultural: Núcleo Museológico de São Martinho de Dume e São Frutuoso de Montélios.
04/10/2023

Perugia acolle a mostra Afonso X e Galicia, que afonda na conexión galega do monarca

A presidenta do Consello da Cultura Galega (CCG), Rosario Álvarez, acompañada de Carlo Pulsoni e Marco Paone, codirectores do centro de estudos galegos da Universidade de Perugia;. Roberto Rettori, delegado de orientación, titoría e divulgación científica da mesma universidade; Ignacio Peyró, director do Instituto Cervantes de Roma e Leonardo Varasano, asesor de cultura da Comuna de Perugia, inauguraron esta mañá no reitorado da universidade a mostra Afonso X e Galicia. O proxecto expositivo poderá verse na cidade italiana ata o 13 decembro.
03/10/2023

A exposición Afonso X e Galicia chega a Bratislava

A presidenta do Consello da Cultura Galega, Rosario Álvarez; a directora da biblioteca central de Brastislava, Silvia Stasselova; e a embaixadora de España en Eslovaquia, Lorea Arribalzaga, inauguraron este luns a mostra Afonso X e Galicia. Un proxecto expositivo que afonda na conexión do rei Sabio con Galicia.
02/10/2023

O CCG desenvolverá proxectos conxuntos coa embaixada de España en Eslovaquia

A presidenta do Consello da Cultura Galega (CCG), Rosario Álvarez, reuniuse esta mañá coa embaixadora de España en Eslovaquia, Lorea Arribalzaga Ceballos. Na xuntanza estableceron contacto para futuras vías de colaboración en iniciativas de ámbito cultural que se concretará en proxectos expositivos e outras actividades.
29/09/2023

O Arquivo da Emigración Galega participa na 33ª xuntanza da AEMI

“Intersections of Migration and Work” é o título da trixésimo terceira edicióndo encontro anual da Asociación Europea de Institucións Migratorias (AEMI). Un encontro que xuntou durante tres días en Liubliana (Eslovenia) aos representantes de entidades migratorias en toda Europa cun programa que deita a súa ollada sobre a diáspora migratoria desde unha perspectiva de xénero. Nel participa o Arquivo da Emigración Galega (AEG) do Consello da Cultura Galega (CCG).