Ana Paula Laborinho

Doutorada en Estudos Literarios pola Universidade de Lisboa, onde exerce funcións docentes desde 1982. En 1989 integrou a comisión fundadora do Instituto Português do Oriente (IPOR), institución encargada de promover a lingua e a cultura portuguesas da India ao Xapón. De 1989 a 1992 exerceu funcións no Departamento de Estudos Portugueses da Universidade de Macau, onde formou parte da correspondente comisión directiva, coordinou a variante de Literatura do Mestrado en Estudos Luso-Asiáticos, deu clase no ámbito do mesmo mestrado e no programa de licenciatura, así como en diversos niveles de Lingua Portuguesa. En 1995 foi nomeada asesora de gabinete do Secretario Adxunto para a Comunicación, Turismo e Cultura do Goberno de Macau. De 1996 a 2002 exerceu funcións como presidenta da dirección do Instituto Português de Oriente, tendo asegurado o período de transferencia de administración de Macau de Portugal para a República Popular de China. No ano 2007 incorporouse ao Centro de Estudos Comparatistas da Facultade de Letras de Lisboa, onde coordina a liña de investigación Orientalismo Portugués. Foi membro de diversas comisións pedagóxicas do Departamento de Literatura da Facultade de Letras, entre elas a comisión executiva. De 2007 a 2008 formou parte do grupo de traballo, presidido polo profesor Carlos Reis, que elaborou o informe “A internacionalização da lingua portuguesa. Para uma política articulada de promoção e difusão”. En 2010 foi nomeada Presidenta do Instituto Camões e en 2012 do Conselho Diretivo do Instituto da Cooperação e da Língua, I.P., sendo responsable do proceso de fusión do Instituto Camões e do Instituto Português de Apoio ao Desenvolvimento. Do seu paso polo Camões, I.P., na área de lingua, destacan, entre outros logros: a expansión da presenza do portugués no mundo (85 países nos cinco continentes); a certificación do portugués, onde se destaca o referencial Camões, que acadou o selo do Consello de Europa; a creación do estatuto da Empresa Promotora da Lingua Portuguesa; o desenvolvemento do ensino dixital e de produtos innovadores como a plataforma de ensino a distancia “Português mais perto” e a app e-Learning. Na área da cultura, produciuse un crecemento da proxección cultural (en 2016, o Camões, I.P. promoveu cerca de 1300 actividades de divulgación cultural); destacan tamén os programas de apoio á edición, en colaboración coa Dirección Xeral do Libro, Arquivos e Bibliotecas (DGLAB), e programas de apoio á tradución e promoción de autores portugueses noutras linguas, así como a articulación da Acción Cultural Externa co Ministério da Cultura. No ámbito da cooperación, houbo un aumento no número de iniciativas e proxectos con parceiros internacionais, como a UE, a ONU ou a CPLP (Comunidade dos Países de Língua Portuguesa), e tamén un incremento dos proxectos financiados a través da liña de financiamento de proxectos de Cooperación para o Desenvolvemento e da liña de Educación para o Desenvolvemento, coa consecuente xestión dixital no aceso a estas liñas e das candidaturas a axentes de cooperación. Neste capítulo de cooperación destacaron os protocolos de colaboración asinados co Consello da Cultura Galega para fomentar a realización de actividades conxuntas e o intercambio de experiencias culturais abrindo camiño e ofrecendo para Galicia unha antena para a difusión da cultura galega e viceversa. Froito desta colaboración organizáronse conferencias, seminarios, cursos e exposicións entre ambas as institucións. Na actualidade é a directora da representación en Portugal da Organización de Estados Iberoamericanos para a Educación, a Ciencia e a Cultura (OEI).