Descrición
En 2020, a presidenta do Consello da Cultura Galega, Rosario Álvarez; o director do Instituto Cervantes, Luis García Montero; a directora do Institut Ramon Llull, Iolanda Batallé, e a directora do Etxepare Euskal Institutua, Irene Larraza, asinaron un acordo de colaboración conxunto entre estas entidades para promover as linguas e culturas galega, española, catalá e vasca. Foi o primeiro asinado polas catro entidades e marcou o inicio dun camiño que se mantén ata o presente. Asinouse telematicamente no medio da situación de alarma declarada pola crise da COVID-19.