Descrición
O Concerto das Letras Galegas do ano 2015 celebrouse en Pontevedra, localidade de orixe do homenaxeado nesa edición, Filgueira Valverde. Maximino Zumalave volveu dirixir a Real Filharmonía de Galicia acompañado pola soprano Carmen Durán e o barítono Gabriel Alonso Díaz, cun programa moi enraizado na figura do homenaxeado. Nesta ocasión, Xavier de Paz (A Coruña, 1963) foi o responsable de poñer música a dúas cantigas que Filgueira Valverde escribiu como contestación a “Ángeles de Compostela”, versos que lle dedicou ao pontevedrés o poeta, músico e mestre Gerardo Diego.