Laxeiro é o nó fundamental na arte galega do século XX. As influencias que el recibe (Goya, Tiziano, Picasso) sénteas e reformúlaas ata dar cun estilo único e identificable para sabios e profanos, dentro do movemento renovador das vangardas artísticas galegas.

Presentamos tres gravacións que se conservan no Arquivo Sonoro de Galicia: dúas entrevistas e unha charla. Baixo o sentido crítico que translocen, sempre asoma a rexouba, signo inequívoco da personalidade do pintor lalinense. Tamén Laxeiro, con enorme gratitude, recorda á súa mestra de Botos, Teresa López, como a persoa fundamental que o estimula para que emprenda o camiño artístico.