MULLERES, PATRIMONIO E SOCIEDADE. Ciclo de cine luso-galego
Braga, 3, 10 e 17 de maio de 2018
2ª edición: 3º trimestre de 2019

Este ciclo de cine luso-galego pretende fomentar o intercambio cultural entre Galicia e o norte de Portugal. A primeira edición, centrada fundamentalmente no cine galego e de fronteira, celebrouse na cidade de Braga, onde se localiza o Centro de Estudos Galegos, un dos colaboradores e dos promotores iniciais da iniciativa. Para tal fin, e coa vontade de establecer lazos que conecten ambas as realidades, escolléronse tres fíos condutores, interrelacionados entre si, que remiten a temáticas transversais e, polo tanto, que procuran unha difusión da actividade que entronca con aspectos de actualidade e preocupación social: a situación social das mulleres, as sociedades rurais e o seu empoderamento en relación co patrimonio.
Colaboradores: UMinho, Instituto Camões e Vigo Film Office.
http://consellodacultura.gal/evento.php?id=200698

REPENSAR IBÉRIA- SEMINARIO
Vila Real (Casa Mateus), do 12 ao 14 de outubro de 2018 
2ª edición: Vila Real (Casa Mateus), 3º trimestre de 2019, co tema: Territórios e espaços urbanos

Os estados ibéricos padeceron en tempos recentes non só unha forte crise económica, senón tamén ser ollados de novo a través de vellos estereotipos que parecen lembrar as matinacións dun Antero de Quental sobre as causas da decadencia dos pobos peninsulares. Agora que os efectos da crise económica foron parcialmente superados, é un momento adecuado para lanzar este tipo de reflexións e, sobre todo, de propostas para o futuro. Son viables os estados-nación? Como superar os bloqueos da construción europea? Que vantaxes e oportunidades teñen os estados ibéricos na xeopolítica actual?
Nesta dirección, desenvolveuse un seminario centrado en varios bloques de debate, pero cun elo común, que é pensar ou “repensar” a Iberia no seu conxunto e como parte esencial da Europa occidental e do espazo atlántico. O formato do seminario debe ser de discusión aberta, mais só entre relatores e convidados específicos.
Colaboradores: Casa Mateus
http://consellodacultura.gal/evento.php?id=200735

PATRIMONIO E FRONTEIRA- CONGRESO
Santiago//8 e 9 de novembro de 2018

O Consello da Cultura Galega, como observador consultivo da Comunidade dos Países de Língua Portuguesa (CPLP), ten entre as súas funcións promover e difundir o idioma común dos países integrantes da CPLP e a súa diversidade cultural nun espazo extracomunitario como é Galicia. Neste marco nace o congreso “Patrimonio e Fronteira”, no que se reflexionou sobre patrimonios que nos son comúns.
O congreso pretendeu, por unha parte, debater acerca dos conceptos de fronteira e patrimonio e como estes se mesturan nos espazos raianos, traspasándoos e constituíndo un espazo de intercambio, de creación de identidade e de novas realidades patrimoniais. Pero tamén de patrimonios que unen e que separan en función das nosas realidades político-económico-culturais. Tamén se analizaron os modelos de xestión patrimoniais axeitados a este tipo de patrimonio.
Colaboradores: CPLP, Universidade do Minho
http://consellodacultura.gal/evento.php?id=200740

A PRODUCIÓN DE SAL EN ÉPOCA ROMANA NO SUR DE GALICIA E NORTE DE PORTUGAL
A Guarda//Venres, 29 de marzo de 2019- XORNADA

O sal desempeñou un papel de grande importancia na economía da Antigüidade. Con usos domésticos, simbólicos e médicos de todo tipo, foi sobre todo un compoñente fundamental na industria de salgadura, tanto no comercio de peixe salgado como na preparación de prebes. Ao longo das dúas últimas décadas, o avance da investigación arqueolóxica permitiu documentar un importante conxunto de explotación do sal ao longo da costa da antiga Gallaecia. Neste encontro falouse dos resultados do proxecto Mar de Sal no estudo das evidencias de aproveitamento do sal durante a Protohistoria e da gran transformación que experimentou a industria salineira a partir da chegada do Imperio Romano coa implantación de grandes salinas mariñas
http://consellodacultura.gal/evento.php?id=200781

DRAMATURXIAS ITINERANTES- CREACIÓN
Santiago// 8 de abril de 2019
Paredes de Coura//2ª edición en setembro-outubro

O Consello da Cultura Galega, o Camões, Centro Cultural Portugués en Vigo e a Escola Superior de Arte Dramática de Galicia puxeron en marcha o programa “Dramaturxias itinerantes/Dramaturgias itinerantes”, que ten como obxectivo servir de ponte entre as escrituras teatrais galega e portuguesa para fomentar, a través do diálogo escénico, un mellor coñecemento mutuo que poida agromar en futuros traballos colectivos.
Colaboradores: Camões Instituto de Cooperación e Lingua IP
http://consellodacultura.gal/evento.php?id=200784

NO BICO UN CANTAR: concerto
Tui//7 de xuño de 2019

A localidade pontevedresa de Tui acolleu o 7 de xuño a sétima edición do concerto “No bico un cantar”, unha proposta que xunta música, poesía e mocidade. Este año tiña como título “Nenas e nenos cantan na Raia” e, da banda portuguesa colaboraron a Academia de Música da Fortaleza de Valença e da Academia de Música José Atalaya de Fafe.
A cita xuntou un gran coro de cincocentos nenos e nenas chegados dos conservatorios profesionais de Galicia e das escolas de música da zona. Alí estreouse a versión musical do poema de Xosé María Álvarez Blázquez “No rego do prado” a cargo do compositor Alexis Rozas.
http://consellodacultura.gal/no-bico-un-cantar/2019/

REPENSAR IBÉRIA. UMA REFLEXÃO SOBRE A EUROPA. TESTEMUNHOS DE UM ENCONTRO
Lisboa// 2 de maio de 2019 
Santiago//25 de xuño de 2019

En Lisboa, Xosé Manoel Nuñez Seixas e Jorge Vasconcelos foron os encargados da presentación da publicación resultante do seminario homónimo desenvolvido en 2018. 
En Santiago participarán como relatores Ramón Máiz e Luis Braga da Cruz. Coa presenza de Rosario Álvarez, Teresa Albuquerque e Ramón Villares.
Colaboradores: Casa de Mateus, Fundação Calouste Gulbenkian
https://bit.ly/2XkXha1

CONFERENCIA "IBERO-AMÉRICA: UMA COMUNIDADE, DÚAS LINGUAS PLURICÉNTRICAS" 
Lisboa// 21 e 22 de novembro de 2019, Fundação Calouste Gulbenkian

A Organización de Estados Iberoamericanos (OEI) propón un lugar para reflectir, discutir e acordar o Plan de Acción articulado e de colaboración interinstitucional sobre a relevancia de traballar as dúas linguas en conxunto nos ámbitos da educación, da ciencia, da cultura e da tecnoloxía na súa perspectiva rexional e global.
Colaboradores: Organización de Estados Iberoamericanos (OEI), Fundação Calouste Gulbenkian

EXPOSICIÓN: OUTROS VERBOS, NOVAS LECTURAS. VALLE-INCLÁN TRADUCIDO (1906-1936) 
Covilhã-Portugal//setembro

A Faculdade de Artes e Letras da Universidade da Beira Interior acollerá este proxecto expositivo que permite ver con outros ollos a figura de Valle-Inclán xa que se centra nun trazo pouco atendido como é a internacionalización da obra en vida do autor.
http://consellodacultura.gal/mediateca/eventos-serie.php?serie=Valle-Incl%E1n%20traducido

SIMPOSIO ILG 2019
Santiago// 4-7 de novembro de 2019

Este simposio é froito da colaboración entre o CCG e o ILG (da USC), ao amparo dun convenio renovado desde 2001. A temática desta edición xira arredor da variación lingüística na eurorrexión Galicia-Norte de Portugal. Interfaces coa etnografía e a antropoloxía cultural. Convidados lingüistas e antropólogos da UTAD e da Universidade do Porto.

COMUNIDADE DOS PAÍSES DE LÍNGUA PORTUGUESA

O Consello da Cultura Galega foi admitido o 1 de novembro de 2016 na Comunidade dos Países en Lingua Portuguesa (CPLP), durante a XI Conferencia de Xefes de Estado e de Goberno da entidade, en calidade de Observador cConsultivo. Culmina así un dilatado proceso de tramitación iniciado en 2010 para facer máis visible a lingua e cultura galegas no exterior. O CCG converteuse na primeira institución galega en formar parte da CPLP. 
A día de hoxe, tamén está tramitada a solicitude de inclusión na Comissão Temática de Educação, Ensino Superior, Ciência e Tecnologia.