Unha das liñas principais de investigación do Consello da Cultura está centrada no estudo da arquitectura e do territorio e foi promovida en proxectos como as mostras de Alejandro de la Sota e de Arquitectura Institucional, realizadas en 1990 e 1991 respectivamente, e as publicacións Lugar, memoria e proxecto: Galicia 1974-1994 e Arquitectura moderna en Galicia. 

A exposición Galicia: 25 anos de Arquitectura incide neste ámbito apostando pola ollada retrospectiva e panorámica, mediante a exhibición de paneis e maquetas, presentando un percorrido polas obras e proxectos da arquitectura contemporánea en Galicia ao longo das últimas décadas.

A exposición estivo exposta en San Martiño Pinario (26 de maio - 10 de xuño de 1995) e despois itinerou a Madrid, onde inaugurou o 14 de setembro no Colexio de Arquitectos de Madrid.