Este ciclo de cine galego-portugués ten como obxectivo promover o intercambio cultural entre Galicia e Portugal. Despois dunha primeira edición, que tivo lugar en Braga no 2018, centrada fundamentalmente no cine galego e de fronteira, a segunda realizarase en Vigo os días 26, 27 e 28 de setembro, cuxos temas serán a situación das mulleres e a súa relación cunha sociedade normalizadora e, novamente, o patrimonio, xa que consideramos importante a visibilización da muller en relación con ambas as realidades na actualidade, a patrimonial e a social.
Este ano desenvolverase un ciclo estruturado en tres xornadas continuas nas que se proxectarán en cada unha delas unha curtametraxe e unha longametraxe, seguidas dun debate-coloquio co público participante. As institucións implicadas son o Consello da Cultura Galega, o Camões-Instituto da Cooperação e da Lingua, I. P., a Universidade do Minho (UMinho) e a Vigo Film Office.
Os obxectivos desta segunda edición son:
• Promover o intercambio lingüístico-cultural a través das reflexións que poidan xurdir no debate previsto en cada xornada de proxección. A actividade procura ser unha transferencia cultural transfronteiriza de ida e volta.
• Difundir o patrimonio cultural galego en Portugal e portugués en Galicia, así como a súa relación coa sociedade, servíndose das posibilidades que ofrece o soporte audiovisual.
• Visibilizar a realidade portuguesa e galega, ofrecendo unha visión positiva e punteira de produtos culturais que se están a xestar no panorama actual. Para tal fin estase levando a cabo unha selección de proxeccións que na súa totalidade tiveron ou teñen impacto nas sociedades portuguesa e galega, tanto polo recoñecemento público como por obteren diferentes premios nacionais e internacionais.
• Visibilizar e promover a reflexión sobre temáticas sociais de relevancia transversal e, xa que logo, de grande interese no ámbito galego e tamén no portugués. Trátase de tres xornadas que procuran poñer en valor a figura das mulleres e reflexionar sobre a súa interacción co patrimonio e a sociedade.
• Promover a colaboración entre institucións portuguesas e galegas, reservándolle a cada unha delas un papel relevante no ciclo en termos de participación, acollemento, financiamento e condución dos diferentes eventos ou actividades.
