"A través da danza chégase en colectivo a lugares aos que non chegarías se estiveras sentado pensado. Hai que bailar para saber o que pode a danza".
Amiadoso (Allariz)

A Casa Vella é un espazo de creación artística, encontro, mediación e dinamización do contexto rural que está en Amiadoso, preto de Allariz, e que serviu esta fin de semana de espazo para a primeira visualización deste proxecto. É un dos primeiros lugares deste tipo que se poñen en marcha en Galicia e un dos oito proxectos que se contan na serie. Esta aposta pola formación e as residencias artísticas no rural desde a sostibilidade non busca só danza, senón tamén natureza, benestar social e desenvolvemento profesional.

"Se a danza é o teu desexo, pode. Se a danza é a túa vida, podes. Se cres na danza, tamén podes".
Santiago de Compostela.

Caterina Varela explica o caso de TRC Danza, que é a programación anual de danza do Teatro Rosalía de Castro. Esta experiencia urbana mestura diferentes estilos de danza cun traballo de mediación cultural para atraer os veciños e veciñas da Coruña, co fin de que desenvolvan o gusto pola danza e de acadar novos públicos.

"A danza pode facer que nos sintamos máis libres e que mesmo nos sintamos máis seguros. A danza pode construír afectos"
Ourense

Unha cidade, danza e unha colección de moda. SóLODOS conseguiu trasladar a colección de desfiles con Adolfo Domínguez. Xurdiu no verán de 2019, cando esta marca téxtil encargou a Maruxa Salas e Erick Jiménez a posta en escena dos desfiles na cidade de Ourense, na súa volta ás pasarelas. É dun proxecto creado pola firma de moda para as diferentes coreografías e posta en escena dos desfiles, para os que contan con diferentes bailaríns e artistas.

"Na miña vida a danza pode todo, porque arrasa con todo. Podes crebar muros que con outras linguaxes non se pode facer"
Teatro Rosalía de Castro. A Coruña

Entre 2008 e 2018 emigraron 47.105 persoas de entre vinte e trinta anos de idade na procura de contextos laborais máis favorables. Esta vaga migratoria, analizada desde o grupo ESOMI da Universidade da Coruña, é o que Kirenia Danza puxo en marcha en “Emigrantas”, outro dos proxectos que figuran nesta serie audiovisual. O resultado esta peza de danza sobre a última diáspora galega con perspectiva de xénero. Dúas intérpretes en escena vivencian unha experiencia central na súa xeración: a emigración e o retorno da derradeira diáspora, distintas das anteriores pero mantendo o pasado na memoria; en resumidas contas, unha peza para bailar datos, estatísticas, vivencias, intuicións e posibilidades, unha peza coa que tecer un ensaio bailado sobre a actual diáspora galega.

"Vacaburra xurdiu como unha forza en estado bruto e salvaxe. Gústanos poder coller de todas as nosas experiencias"

“O corpo, o feminismo… como algo transversal” é o que Gena Baamonde e Andrea Quintana puxeron en marcha en VACAburra. Na súa idea, que arrinca en 2019, buscan unha confluencia de linguaxes que permite recoller das súas experiencias previas para crear desde Galicia. É unha conexión entre o académico e a escena que permite transformar en movemento unha investigación.

"O colectivo RPM naceu como un colectivo de artistas coa vontade de traballar para o contexto, e para promover residencias en diferentes espazos escénicos e culturais"

Residencias Paraíso é un programa impulsado desde Colectivo RPM e pretende fomentar a aparición de novos proxectos de investigación e creación arredor das novas linguaxes contemporáneas, alimentando o campo de acción da comunidade artística galega e a súa conexión con outros territorios. Lanza cada ano unha convocatoria para acoller entre oito e dez artistas que conclúe nun encontro na illa de San Simón.

"Non hai unha única forma de achegarse á danza, hai moitas, e moitas desbordan a relación clásica entre artista, espectador, escenario e butaca"

“Cara a unha escena plural” é o proxecto que impulsa a circulación da danza e as artes vivas de carácter profesional no noso territorio. Busca procurar unha presenza estable e regular destas expresións nos espazos escénicos galegos. No vídeo explícase que funcionan a través do deseño de programas específicos para cada localidade, compostos por funcións escénicas e actividades paralelas acompañadas dun traballo de mediación.

"Todo o proxecto Sacra experience existe como un proxecto vital que reúne o que levo facendo moito tempo e que á vez crea un proxecto de formación estable durante todo o ano"
Pincelo (Chantada)

Sacra Experience é outra forma de gozar da Ribeira Sacra. Trátase dun proxecto vital amplo que busca a dinamización da zona, do que xorde un proxecto de formación estable de residencias artísticas e formación de artes para adultos, que busca que os creadores creen para un territorio e interactúen cos propios veciños e veciñas.