Documentación SocietariaCustodiar, preservar e difundir a memoria da emigración galega son as finalidades principais do Arquivo da Emigración Galega. Un dos feitos máis salientables da colectividade galega no exterior foi a fundación de asociacións de moi diversa tipoloxía (asistenciais, instrutivas, culturais, mutualistas, recreativas etc.) nas que os e as emigrantes ademais de atopar axuda e protección mutua na súa vida cotiá tamén conseguiron manter viva a cultura e os costumes da nosa terra nos países onde se asentaron, creando espazos de sociabilidade propios. A colectividade galega creou entidades para manter viva a lembranza do terruño e enviar remesas coas que contribuír ao desenvolvemento da nosa terra.
Neste proxecto o AEG pon a disposición das persoas interesadas os fondos xerados por estas institucións que ao longo dos anos se foron recompilando para a súa preservación e difusión. Libros de actas, regulamentos, correspondencia, memorias sociais, libros de contabilidade ... estarán na nosa web para a súa consulta.
Memoria documental das sociedades da emigración galega
Varios libros de actas, os estatutos iniciais e o proxecto de reforma dos mesmos, así como varias memorias... son algúns dos documentos da sociedadad Centro Benéfico e Social Hijos de la Estrada que este xoves se soben á rede no marco do proxecto Memoria documental das sociedades da emigración galega. Esta iniciativa do Arquivo da Emigración Galega, centro do Consello da Cultura Galega (CCG), permite visibilizar fondos documentais das entidades microterritoriais creadas na diáspora galega
A documentación que o Arquivo da Emigración Galega (AEG) vén de facer pública reflicte a historia dunha sociedade creada en Caracas en decembro de 1958 baixo o nome de Centro Benéfico Social Hijos de La Estrada. Un grupo de emigrantes orixinarios do partido xudicial da Estrada constituíron esta sociedade, tal e como recolle a primeira acta constitutiva, para “establecer un centro social-benéfico para proporcionar a sus miembros sanas distracciones, asistencia médica y ayuda material y moral”.
O pasado mes de xaneiro, no marco doutro dos proxectos do Arquivo da Emigración Galega, púxose en rede un número especial da publicación que editaba esta sociedade e co gallego do 22º aniversario da fundación da sociedade Centro Benéfico Social Hijos de la Estrada. Aquel número contiña 160 páxinas que realizaban unha descrición da historia do Centro desde a súa fundación e un percorrido pola xeografía, cultura e historia da Estrada e de Galicia en xeral. Incluía unha carta do presidente da sociedade, Luís Veiga Rodríguez, e outra do daquela presidente da Xunta de Galicia, Gerardo Fernández Albor, así como de Jesús Durán, Manuel Brea Porto e Jose Luis Jorge Caramés, naquel momento alcaldes dos concellos da Estrada, Forcarei e Cerdedo. Contaba tamén cunha serie de relatos, anécdotas e poesías. Inclúe tamén a partitura do pasodobre “Estrada-Caracas” que mestura ritmos de Venezuela e Galicia composta para ocasión por Eulogio López Masid, que fora director da Banda de Música Municipal de A Estrada durante 23 anos.
O proxecto Memoria documental das sociedades da emigración galega
O AEG puxo en marcha en 2024 o proxecto Memoria documental das sociedades da emigración galega. A iniciativa promove a divulgación dos fondos documentais que se custodian neste Arquivo do CCG sobre as diferentes asociacións microterritoriais creadas na diáspora galega. A divulgación desta selección dos fondos é de periodicidade mensual, en cada entrega cólganse na Rede os documentos xerados por estas institucións, nos cales constan libros de actas, regulamentos, correspondencia, memorias sociais, libros de contabilidade ou imaxes. A meta desta iniciativa é a de contribuír á súa preservación e facilitar a súa consulta.
Entre os últimos número subiuse documentación da sociedade “Calo y Biduido”, “Hijos del Ayuntamiento de Boiro”, “Casa de Galicia” ou a “Hermandad gallega de Venezuela”.
