Concerto - Nenas e nenos cantan aos trobadores. 3 de xuño de 2016
No bico un cantar

Nenas e nenos cantan aos trobadores

  1. Inicio
  2. No bico un cantar
  3. Concerto

No bico un cantar

Nenas e nenos cantan aos trobadores

No bico un cantar 2016

3 de xuño de 2016
Cangas do Morrazo
Concerto
No bico un cantar

Nenas e nenos cantan aos trobadores

No bico un cantar 2016

3 de xuño de 2016 Cangas do Morrazo
O trobador Johán de Cangas achéganos a estas ribeiras do mar dacabalo dos versos amargos na boca da amiga. O seu lamento esténdese polas mainas ondas da ría de Vigo para se abrazar ás cantigas de Martín Códax, Meendinho, Pero Viviaez e tantos outros compositores que converteron esta costa en escenario privilexiado das súas fermosas coitas poéticas. Por iso, o concerto No bico un cantar, na súa edición dedicada aos trobadores, non podía escoller mellor lugar ca este. Cangas acolle a festa da música e da palabra que reúne cincocentas nenas e nenos de toda Galicia, dirixidos pola batuta de Maximino Zumalave e acompañados dos metais de Hércules Brass. E van catro. Santiago de Compostela cantou a Rosalía de Castro, Celanova lembrou a Curros Enríquez e Cambados vibrou con Ramón Cabanillas. O recital é xa unha cita ineludible que xunta, todos os primeiros venres de xuño, as partituras e os poemas dos nosos creadores e creadoras máis senlleiras. Nesta ocasión, a iniciativa do Consello da Cultura Galega e da Consellería de Cultura, Educación e Ordenación Universitaria, coa colaboración do Concello de Cangas, quere honrar o herdo dos trobadores dos séculos XIII e XIV, a «gloriosa lírica gallega», tal e como foi cualificada por Antón Villar Ponte en Nuestra afirmación regional.

O escritor viveirense foi un dos grandes artífices das irmandades da Fala. Neste 2016 conmemoramos o centenario do nacemento daquel case medio cento de agrupacións locais que traballaron entusiastamente pola modernización e difusión da cultura galega. «interésanos máis un coro galego que un deputado en Cortes por Galicia» chegou a afirmar Antón Villar Ponte, e boa proba desta arela foi a creación nese tempo dos coros Cántigas da Terra (1916), Real Coro Toxos e Froles (1914), Coral de Ruada de Ourense (1918) e Cantigas e Agarimos (1921). Un século despois e seguindo a vontade divulgadora das irmandades, o concerto No bico un cantar tráenos as voces de rapazada de toda Galicia. Ao alumnado dos conservatorios profesionais das sete cidades súmanse desta volta nenas e nenos do CMUS e da ESMU de Cangas e da ESMU de Moaña para cantar os versos dos nosos trobadores medievais.

Para o repertorio do concerto, o profesor Henrique Monteagudo escolleu catro pezas que representan a produción poética da época, unha produción que ascende a máis de dous milleiros de cantigas profanas e relixiosas. Escoitaremos a Canção do marinheiro de Lourenço, Pois nosas madres van a San Simón de Pero Viviaez, Quantas sabedes amar. Ondas do mar de Vigo de
Martín Códax e Rosa das rosas de Afonso x. Dalgunhas destas cantigas herdamos tamén a música, caso das Cantigas de Santa María de Afonso x e dos versos de Martín Códax recollidos no famoso Pergamiño Vindel. O recoñecido compositor brasileiro Heitor Villa-Lobos creou a música da Canção do marinheiro de Lourenço. Estas composicións foron versionadas para coro e sexteto de metais polo compositor e membro da Sección de Música e Artes Escénicas Juan Durán.

Finalmente, Pois nosas madres van a San Simón, obra de encarga realizada por Rogelio Groba para o Consello da Cultura Galega e de estrea absoluta. O concerto concluirá, como xa é tradición, co poema Maio longo de Rosalía de Castro, musicado por José Baldomir. Rematou ese longo mes de maio e chegou por fin a luz do solsticio de xuño. Canda el, soa por riba das ondas, de san Mamede a Vigo, pasando por san Clemenço do mar e san Simón, a Canção do marinheiro do trobador Lourenço:

Unha moza namorada
dizia un cantar de amor,
e dise ela: “Nostro Señor,
hoje eu fose aventurada
que oíse o meu amigo
como eu este cantar digo”.

Máis de sete séculos despois da súa escrita, seremos nós as persoas afortunadas que sentiremos como unha polifonía de máis de cincocentas voces infantís o que estes cantares nos din.
Programa
Nenas e nenos cantan aos trobadores
Programa en PDF
Ligazóns
Ficha técnica 
Concerto
No bico un cantar
Nenas e nenos cantan aos trobadores
No bico un cantar 2016
Cando
3 de xuño de 2016
Onde
Cangas do Morrazo
Lugar

Cangas do Morrazo