A colección abrangue desde vídeos breves de divulgación ata conferencias completas impartidas por especialistas galegos do Instituto Galego de Física de Altas Enerxías (IGFAE) e doutras institucións. Entre as pezas destacadas atopamos O mapa da física, unha animación que sintetiza os dominios fundamentais da disciplina; A gaivota dixo quark, unha divertida entrega do Dicionario da Ciencia de GCiencia; e as producións de TED Que é o principio de incerteza de Heisenberg? e O gato de Schrödinger, traducidas ao galego expresamente para este especial. Tamén forma parte da escolma O día en que espiamos átomos mirando entre fendas, que explica o famoso experimento da dobre fenda, así como Os ordenadores cuánticos non son como cres: son mellores, unha charla de Hartmut Neven (Google Quantum AI) que amosa o potencial da computación cuántica. Ademais, inclúense tres conferencias divulgativas de investigadores do IGFAE —O plasma de quarks e gluóns, O universo do diminuto e A gravidade (cuántica) nun holograma— que introducen as liñas máis avanzadas da investigación galega neste eido. Completan a selección A natureza ondulatoria da luz, Partículas de longa vida e O estrambótico mundo cuántico, pezas que axudan a comprender a dualidade onda-partícula, o traballo experimental no CERN e a fascinante complexidade do microcosmos.

“Proxector”
“Proxector: audiovisuais en galego para a docencia” é un espazo web dedicado a recompilar, clasificar e difundir recursos audiovisuais que sirvan de apoio á docencia en lingua galega de diversas materias de bacharelato e de ensino universitario.

O proxecto orixinal foi deseñado polo Servizo de Normalización Lingüística da Universidade de Santiago de Compostela e botou a andar no ano 2015 no portal educativo Didactalia. En 2018 o CCG, a través do Centro de Documentación Sociolingüística de Galicia (CDSG), sumouse á iniciativa e comezou a participar de xeito activo tanto na súa coordinación como na edición de contidos. Cumprindo coas competencias que lle son propias no eido da preservación e difusión do idioma galego, o CCG acordou asumir tamén a custodia dos datos recompilados ao longo destes anos e que, a partir de agora, estarán ao dispor da cidadanía no sitio web institucional.
Os vídeos están clasificados segundo a súa temática, o idioma no que foron gravados ou subtitulados e o nivel de ensino no que se considera que poden ser empregados. A maiores, ofrécese unha ficha descritiva coa información básica de cada recurso. Pódese acceder aos contidos a través da busca libre ou dos diferentes despregables, que permiten filtrar os resultados segundo os criterios de clasificación antes citados.