María del Carmen López Pérez

Responsable de I+D da empresa compostelá Balidea, que ten entre os seus proxectos o desenvolvemento de asistentes virtuais en contornas de saúde (proxectos NETA e GiDi). Directora I+D+i en Balidea. Vogal da xunta directiva do Clúster Saúde de Galicia (CSG). Directora industrial da tese de doutoramento Investigación avanzada en algoritmos de comprensión de fala («Speech Understanding»). Enxeñeira industrial pola Universidade de Vigo (enxeñaría superior na especialidade de Organización Industrial). Mestrado en Xestión da Innovación na Empresa pola Escola de Organización Industrial de Madrid. Comezou a súa traxectoria profesional como enxeñeira de procesos no sector das telecomunicacións (Comunitel Global, que logo pasou a formar parte de Tele2 e máis tarde de Vodafone). En 2007 pasou ao ámbito da I+D+i. Os primeiros anos o seu labor estivo orientado a axudar a empresas de distintos sectores a innovar creando follas de ruta, identificando oportunidades de financiamento e deseñando proxectos. Destaca o sector da pesca, o naval e a industria alimentaria. En 2011 ofrecéronlle a posibilidade de volver ao sector das TIC na área de I+D+i de Balidea. Dende que se incorporou en 2011, participou en máis de cen colaboracións con empresas, en máis de cincuenta con organismos de investigación públicos e privados e mais con fundacións/asociacións sen ánimo de lucro, e en máis de cincuenta consorcios a nivel galego, estatal e internacional. O seu papel é a dirección, xestión e coordinación nos distintos proxectos en que participa a área de I+D+i, co obxectivo de pór a tecnoloxía ao servizo das persoas. As tecnoloxías en que traballa son as tecnoloxías cognitivas, tecnoloxías da linguaxe, aprendizaxe automática ou visión artificial, Blockchain e ciberseguridade, e os seus ámbitos funcionais son a comunicación, a saúde dixital, a experiencia de usuario e a mobilidade. Na área de I+D+i de Balidea teñen un lema: #TecnoloxíaParaAsPersoas. Actualmente esta empresa aposta polo uso de tecnoloxías da fala que faciliten a interacción das persoas (con especial foco nos maiores) co mundo dixital tanto en galego como en castelán.