Oscar Iglesias Resúa

Nado na parroquia do Araño, en Rianxo, no ano 1998. A súa formación escolar comezou na Escola da Capela, unha unitaria pertencente ao CRA de Rianxo, continuou no CEP Xosé Mª Brea Segade e posteriormente no IES Félix Muriel, onde completou a etapa de ensino secundario e bacharelato. Durante este período de educación secundaria participou no Equipo de Normalización e Dinamización Lingüística do IES dende 3º da ESO ata 2º de bacharelato, así como noutros proxectos promovidos polo profesorado de Lingua Galega e Literatura, entre eles as tertulias nos recreos coñecidas como “Café, Bolo e Lingua”. En paralelo, tamén cursou estudos musicais na Escola de Música de Rianxo e posteriormente no Conservatorio Profesional de Música de Santiago de Compostela, especializándose en trompeta. Con todo, e para poder centrarse na súa verdadeira vocación profesional, a veterinaria, decidiu non rematar os estudos profesionais de música, pechando esta etapa que comezara aos 8 anos e que mantivo ata os 22. No ano 2016 trasladouse a Lugo para comezar o Grao en Veterinaria na Universidade de Santiago de Compostela, que rematou en 2022. Posteriormente cursou o Máster Universitario en Profesorado de Educación Secundaria, co obxectivo de poder combinar no futuro a actividade clínica coa docencia e a divulgación. Durante este período participou no Equipo de Normalización da Facultade de Veterinaria e colaborou con varias organizacións que desenvolven a súa actividade en Lugo e noutras comarcas de Galicia. A día de hoxe segue a participar nalgunha destas asociacións. No eido profesional, traballa dende hai máis dun ano como veterinario xeneralista na Clínica Veterinaria San Froilán en Lugo, cidade na que leva residindo xa nove anos. Con anterioridade, completou unha estadía na Clínica Felina Vigo, especializada en medicina felina, e unha rotación polo Hospital Veterinario Universitario Rof Codina, que lle permitiu formarse en distintos servizos. Tamén participou en proxectos de investigación no Grupo INVESAGA da USC e realizou prácticas en varios hospitais veterinarios de pequenos animais e exóticos. Ademais, procura manter unha formación continua mediante a asistencia a congresos e cursos de especialización. Finalmente, cómpre destacar que tanto durante a súa formación como na actualidade segue a procurar manter e normalizar o uso da lingua galega no seu día a día, tanto no ámbito profesional como persoal.