Inma Seage Freire

Logo de rematar a licenciatura de Filoloxía Galega, colaborou como bolseira no Instituto da Lingua Galega no proxecto “Tesouro informatizado da Lingua Galega” e traballou como asesora lingüista na Televisión de Galicia e na Radio Galega. Foi docente dos cursos de lingua galega de iniciación, de perfeccionamento e para persoas estranxeiras. Relacionado coa formación, participou na creación de materiais didácticos para o Celga e foi colaboradora do “Proxecto para a Avaliación e Aprendizaxe do Galego” do Centro Ramón Piñeiro. No 2009 comezou a súa andaina no Concello de Rois como técnica de normalización lingüística e, logo da sinatura dun convenio co Concello de Dodro, no 2013 o Servizo pasou a ser compartido. Ao longo destes anos, como responsable do Servizo de Normalización Lingüística Rois-Dodro, participou en proxectos colaborativos como o Club de debate, o Apego ou Youtubeiras. Asemade formou parte do persoal técnico que traballou na posta en marcha da Asociación de Entidades Locais pola Lingua Galega, asociación da que Rois é vogal dende o seu inicio. Actualmente forma parte da directiva da Coordinadora de Traballadores/as pola Normalización da Lingua.