Doutora en Economía, profesora titular de Economía Aplicada da Universidade de Santiago de Compostela (USC). Especialista en Economía Pesqueira, directora do posgrao de Economía Pesqueira e do Máster de Economía Pesqueira da mesma universidade. Directora do Centro de Documentación Europea da USC. Cof...
Doutora en Economía, profesora titular de Economía Aplicada da Universidade de Santiago de Compostela (USC). Especialista en Economía Pesqueira, directora do posgrao de Economía Pesqueira e do Máster de Economía Pesqueira da mesma universidade. Directora do Centro de Documentación Europea da USC. Cofundadora do CIFEX (Centro Interdisciplinario de Investigacións Feministas e de Xénero) da USC, así como activa promotora das súas actividades investigadoras e docentes. Colaboradora doutras universidades e tamén de institucións públicas de interese científico-pesqueiro. Actualmente é profesora ad honorem da USC.
Autora de libros e artigos de economía de Galicia, economía pesqueira, artigos sobre economía aplicada (industrial, demografía económica…), economía de xénero e economía pesqueira en publicacións nacionais e internacionais. Relatora en congresos, simposios, xornadas da súa especialidade, así como docente convidada noutras universidades e centros de investigación. Directora de teses de doutoramento, investigadora principal e colaboradora en diversos proxectos de investigación galegos, españois e da Unión Europea. Membro asesor de comités científicos de fundacións/organizacións como ARVI, FREMSS, de interese pesqueiro ou de interese galego como a Fundación Galiza Sempre, Terra e Tempo ou a Comunitaria Coppieters Fundation, da que é advisory scientific council. Así mesmo asesorou en múltiples ocasións a organismos públicos de responsabilidade pesqueira e estatística.
