A vicepresidenta do Consello da Cultura Galega Rosario Álvarez Blanco e a Coordinadora da Comisión de Igualdade desta institución María Xosé Agra Romero, presentan a xornada

Carmen Pérez Pais, profesora da UDC e parte da Comisión de Igualdade do CCG, presenta a María José Turrión García. Esta no seu relatorio achéganos aspectos da historia e da dinámica de traballo do Centro Documental de la Memoria Histórica de Salamanca sinalando algúns aspectos da documentación de e sobre mulleres do citado centro.

María Xosé Agra Romero, Coordinadora da Comisión de Igualdade do CCG, presenta a María José Sola Sarabia do Centro de Documentación de Mujeres “Maite Albiz” Amakumeen Dokumentazio Zentrua de Bilbao. Esta última nun repaso histórico sobre as bibliotecas de mulleres, destaca aquelas que desenvolven proxectos de recuperación e conservación da documentación de grupos e colectivos feministas. E, de xeito máis concreto explica o proceso de creación do Centro de Documentación “Maite Albiz”, destacando as formas de traballo que desenvolveron e desenvolven en relación a obtención e conservación dos fondos relacionados con organizacións e mulleres feministas con actividade no País Vasco

Mariam Mariño Costales, técnica da Comisión de Igualdade do CCG, presenta a Rosa María Andrieu Sanz, profesora da UPV e integrante de Bilgune Feminista. Esta no seu relatorio fai unha achega ao proceso activado dentro de Bilgune Feminista para a creación de Emagin. Centro de documentación e investigación feminista. Un arquivo necesario e que permite investigar e coñecer a dinamicidade de grupos e colectivos feministas en Euskal Herria desde 1974

Encarna Otero Cepeda presenta a Carmen Pérez Pais e Mariam Mariño Costales. Estas dúas, nas súas intervencións, fan un percorrido polo proceso de creación e vías de desenvolvemento da iniciativa que deu lugar á colección especial Recuperación da Documentación e Memoria do Movemento Feminista Organizado en Galicia. Trátase dun proceso de traballo activado no Consello da Cultura Galega pola Comisión de Igualdade desta institución

Debate aberto: 
María Xosé Agra Romero modera un debate centrado na avaliación dos arquivos do movemento feminista en Galicia e nas vías para o seu desenvolvemento e continuidade. O debate conta coa intervención do público asistente e das relatoras e presentadoras da xornada