----

O Consello da Cultura pon na rede a Hemeroteca Feminista Galega A Saia

A Saia, Andaina e Festa da Palabra Silenciada son algunhas das revistas publicadas nos oitenta que permiten coñecer a traxectoria dos feminismos e das feministas en Galicia. Estas tres publicacións son as que inauguran o proxecto “Hemeroteca Feminista Galega A Saia”. Unha iniciativa que xorde da colaboración do Consello da Cultura Galega, a través da Comisión de Igualdade, e o Centre Dona i Literatura da Universitat de Barcelona. Arredor desta presentación terá lugar a xornada “Xénero e Documentación III”, que se desenvolve nese mesmo serán no Consello da Cultura Galega. Ademais, unha pequena exposición na sede da institución permitirá ver os exemplares destas publicacións.
Conéctate co Consello da Cultura Galega en Facebook, Twitter ou comparte esta nova:

“As manifestacións a favor do aborto, a presenza das mulleres nos medios de comunicación, a alianza entre feminismo e pacificismo… son moitos os temas que se abordaron nestas publicacións e que serven, tanto para revisar a historia dos oitenta en Galicia como para ver que moitos dese debates teñen total vixencia”. Así explicou Helena González a relevancia da Hemeroteca Feminista Galega A Saia, un proxecto de edición dixital que pon na rede a colección completa de A Saia (1982-1983), a primeira época da revista Andaina e os oito primeiros números de Festa da Palabra Silenciada (1983-1991). Foi María Xosé Agra, coordinadora da Comisión de Igualdade quen situou a relevancia do traballo de documentación. “Era material que corría o risco de perderse porque algúns deles xa non se editan, pertencían a colectivos que xa non existen e cumpría poñelo a disposición de toda a cidadanía a través da rede” explicou.

O proxecto
A Hemeroteca Feminista Galega A Saia é un proxecto conxunto do Consello da Cultura Galega, a través da súa Comisión de Igualdade, e o Centre Dona i Literatura da Universitat de Barcelona que puxeron en marcha en 2012. Toma o nome da publicación A Saia, que é a primeira revista feita por un colectivo feminista independente en Galicia. O obxectivo último desta proposta pasar por poñer a disposición do público unha documentación de utilidade para todas as persoas interesadas nos feminismos e na historia recente de Galicia. Nestas publicacións pódense documentar con moito detalle os debates sobre o suxeito político do feminismo en Galicia, e as accións reivindicativas, ferramentas e estratexias de mulleres feministas.

O proxecto Hemeroteca Feminista Galega preséntase no marco dunha xornada que terá lugar esta tarde e que permitirá coñecer a cerna destes proxectos na boca das súas protagonistas.

A xornada Xénero e Documentación

Sabela Mouriz, activista feminista e profesora de ensino medio, foi promotora da revista A Saia. Boletín do Colectivo Feminista Independente Galego. Esta publicación tivo un papel fundamental no contexto galego ao ser a primeira revista feminista editada integramente en galego.

É a activista feminista e profesora de ensino medio Nanina Santos Castroviejo a que presentará a primeira xeira de Andaina. Conformada por 24 números e tres especiais, esta publicación deu conta da actividade dos diferentes grupos e colectivos que na década dos oitenta deron en conformar unha rede de relacións coñecida como Coordinadora Nacional de Organizacións Feministas.
Pecha a xornada a intervención de María Xosé Queizán, a que foi directora da revista Festa da Palabra Silenciada. Unha revista potenciada polas compoñentes de Feministas Independentes Galegas (FIGA) e que tiña como obxectivos promover o pensamento, a investigación, o debate e a crítica feminista nos ámbitos da teoría, das ciencias sociais, as artes e a política.

As xornadas Xénero e Documentación
Desde o ano 2007, a Comisión de Igualdade do Consello da Cultura Galega realiza periodicamente unhas xornadas baixo o título “Xénero e Documentación” co obxectivo de pór a disposición do público información arredor desta materia. Na primeira edición editouse unha publicación dixital en CD que fixo unha achega ao tratamento documental. En 2012, tivo lugar a segunda edición, que ampliou o seu foco de actuación ao resto de España para coñecer a documentación (recuperación, conservación, posta en valor e difusión) producida por organizacións de mulleres en agrupacións autónomas e mixtas identificadas co feminismo. Nesta cita presentouse a colección especial “Recuperación da documentación e memoria do movemento feminista organizado en Galicia” do Consello da Cultura Galega.

Accede á Hemeroteca Feminista Galega A Saia

Outras noticias que te poden interesar: