Noticias

Centro de Documentación en Igualdade e Feminismos (CCG). Rexistros1 a 30 de 70
08/04/2024

O Álbum de Galicia incorpora a entrada da fotógrafa María Cardarelly

María Cardarelly (Zaragoza, 1845 – ?, ca. 1915) foi unha fotógrafa pioneira ao erixirse como a primeira muller en ter un estudio propio en Galicia. Malia que só se dedicou tres anos á práctica fotográfica e que a obra que dela se coñece non supera a media ducia de orixinais, sobresaíu por capturar coa súa cámara “unha das personaxes máis relevantes da literatura e a sociedade do noso país como Rosalía de Castro”. Así o subliña Vítor Vaqueiro, o autor da súa entrada no Álbum de Galicia, a colección dixital de biografías que mantén o Consello da Cultura Galega.
20/03/2024

A entrada da actriz Cruz Comesaña incorpórase ao Álbum de Galicia

A actriz Cruz Comesaña (Vigo, 1960 – Madrid, 1989) iniciou unha prometedora traxectoria na escena teatral galega e estatal durante os anos 80, que se viu truncada polo seu prematuro falecemento. Ademais de actuar en varias montaxes, foi docente e desenvolveu labores de dirección teatral, un campo en que destacou por saber sacar o mellor de cada intérprete. O Álbum de Galicia, a colección dixital de biografías que mantén o Consello da Cultura Galega, suma hoxe a súa entrada da man de Ana Abad de Larriva. Así mesmo, actualízase a biografía que Antonio Reigosa escribiu sobre a tamén actriz de teatro Manuela Rey con novos documentos e materiais.
18/03/2024

Asinado un acordo coa Asociación Mulleres Cristiás Galegas Exeria para dixitalizar o seu arquivo

A presidenta do Consello da Cultura Galega (CCG), Rosario Álvarez, e María Luísa Vidal Collazo, representante da Asociación Mulleres Cristiás Galegas Exeria, asinaron un acordo para a dixitalización e difusión dos fondos documentais da agrupación. Os materiais cedidos, entre os que figuran diferentes publicacións, revistas, folletos e cadernos de formación, constitúen unha importante fonte de documentación para o estudo do movemento feminista en Galicia.
13/03/2024

O Álbum de Galicia suma a entrada de Pencha Santasmarinas

Pencha Santasmarinas (Santiago de Compostela, 1943–2019) dedicou a súa traxectoria vital e profesional ao servizo público. Foi unha activa militante a prol da defensa do territorio, do mar e dos dereitos das mulleres, un ámbito en que loitou por mellorar as condicións de vida de mariscadoras e redeiras. A súa entrada no Álbum de Galicia, a colección dixital de biografías que mantén o Consello da Cultura Galega (CCG), é da autoría de Encarna Otero.
07/03/2024

A entrada do Colectivo María Castaña incorpórase ao Álbum de Galicia

O Colectivo María Castaña estivo integrado por seis profesoras de ensino medio. Mantivo a súa actividade entre os anos 1991 e 2001, durante os cales a agrupación desenvolveu un importante labor a prol da visibilización das mulleres na historia. Foi “un traballo común, que supuxo unha importante contribución e un avance para o ensino”, mais tamén para a procura “dun mundo máis xusto, igualitario e crítico”, no que se eliminase “a visión androcéntrica e patriarcal da historia da humanidade e de todas as súas manifestacións”. Así o indica Guillermina Domínguez Touriño, integrante do colectivo e autora da entrada que se incorpora hoxe ao Álbum de Galicia, a colección dixital de biografías que mantén o Consello da Cultura Galega (CCG).
06/03/2024

Unha xornada analiza a representación da maternidade no cine e na literatura

No ronsel do 8 de marzo, Día Internacional da Muller, o Centro de Documentación en Igualdade e Feminismos (CDIF) do Consello da Cultura Galega (CCG) organiza a xornada Ficcións da maternidade: entre imaxes e palabras. A cita terá lugar este xoves 7 de marzo (ás 16:15 horas), na sede da institución e contará coas intervencións de Álvaro Gago e Jaione Camborda, cineastas, e de María do Cebreiro e Yolanda Castaño, escritoras. A actividade é presencial, pero poderá seguirse en directo a través do sitio web e as redes sociais corporativas.
05/03/2024

O Consello da Cultura Galega promove varias actividades para conmemorar o Día Internacional da Muller

Co gallo do 8 de marzo, Día Internacional da Muller, o Consello da Cultura Galega (CCG) programa actividades, conferencias e dixitalización de publicacións históricas ao redor das mulleres galegas. Ao igual que en anos anteriores, organízase coa Filmoteca de Galicia o ciclo Olladas de muller, no que se programan diferentes filmes e curtametraxes realizadas por directoras. Ademais, a hemeroteca feminista A Saia sobe varios exemplares da cabeceira Mulleres Cristiás Galegas, mentres que o Álbum de Galicia incorpora a entrada do Colectivo María Castaña. A estas accións engádese a nova sesión do ciclo Pensarmos, na que se abordará a cuestión do xénero no patrimonio, así como dúas xornadas sobre a representación da maternidade nos discursos artísticos e o legado cultural das intérpretes galegas na diáspora.
07/02/2024

Fernanda Tabarés e Joana Bonet falan de xornalismo e empoderamento feminino no ciclo EscriturAs

“Xornalismo con perspectiva” é o título da nova sesión do ciclo EscriturAs, organizado polo Centro de Documentación en Igualdade e Feminismos (CDIF) do Consello da Cultura Galega (CCG). Nesta ocasión, Fernanda Tabarés e Joana Bonet debaterán arredor de se o xornalismo é un ámbito propicio para a loita feminista. A cita terá lugar mañá, 8 de febreiro, ás 18:00 horas, na Casa das Campás (Pontevedra). A sesión, coordinada por Inmaculada López Silva e Rexina Rodríguez Vega, é presencial e non se poderá seguir en directo, pero será gravada e subida posteriormente á hemeroteca do CCG.
17/01/2024

Presentado o libro Cuerpos en rebeldía. Aproximaciones interdisciplinares

O Consello da Cultura Galega (CCG) acolleu esta mañá a presentación do libro Cuerpos en rebeldía. Aproximaciones interdisciplinares. O volume, editado por Eulalia Pérez Sedeño e publicado pola editorial Comares, reúne a autores e autoras de diferentes disciplinas para reflexionar sobre a construción da diferencia sexual en ámbitos como a biomedicina, a neurociencia, o dereito, o deporte ou as políticas públicas. A presidenta do CCG, Rosario Álvarez, destacou na presentación que a obra “partiu dunha actividade realizada polo Consello da Cultura Galega”, como foi a terceira edición da xornada Pensar con orgullo (2022). Xunto a ela, participaron no acto Enrique Latorre, autor dun dos capítulos do volume, e Carme Adán, coordinadora do Centro de Documentación en Igualdade e Feminismos (CDIF) do CCG e autora doutra das contribucións.
18/12/2023

Unha publicación xunta as biografías de corenta mulleres destacadas da cultura galega

A publicación Corenta mulleres tecendo xuntas recompila as biografías de figuras destacadas do país, como Constanza de Castro, a filla rebelde do mariscal Pardo de Cela; a modista e emprendedora Rosalía Mera; a cantante María Valverde, ou a futbolista Irene González Basanta. A presidenta do Consello da Cultura Galega (CCG), Rosario Álvarez; a deputada de Igualdade da Deputación da Coruña, Soledad Agra, e mais Carme Adán, coordinadora do libro xunto con Montse Fajardo, presentaron esta mañá a iniciativa. A obra, editada grazas a un convenio entre o CCG e a Deputación da Coruña, xa está dispoñible para a súa descarga.
15/12/2023

A nova entrega do proxecto Sextina difunde a Guia básica para mulleres

O Centro de Documentación en Igualdade e Feminismos (CDIF) do Consello da Cultura Galega (CCG) acaba de incorporar unha nova entrega do seu proxecto Sextina. Nesta ocasión, ponse na rede a Guia básica para mulleres, editada pola Asemblea da Muller de Galiza Nova no ano 1995. A guía foi publicada co patrocinio da Concellería da Muller do Concello de Santiago de Compostela e tiña como obxectivo principal informar as mulleres sobre cuestións relacionadas coa sexualidade, a xustiza e o emprego.
27/11/2023

Diferentes expertas e investigadoras reflexionan sobre o acoso sexual nunha xornada

O acoso sexual é unha realidade que está presente en moitos ámbitos da vida das mulleres desde a súa infancia. Co fin de afondar na súa concepción e nas diversas formas en que este se manifesta, o Centro de Documentación en Igualdade e Feminismos (CDIF) do Consello da Cultura Galega (CCG), en colaboración coa Sección de Artes Escénicas, Musicais e Audiovisuais da institución, organiza mañá martes (28 de novembro, 10:00 horas) a xornada Que é “si”? Sobre o acoso sexual. Na inauguración intervirán a presidenta do Consello da Cultura Galega, Rosario Álvarez; a coordinadora do CDIF, Carme Adán, e a da Sección de Artes Escénicas, Musicais e Audiovisuais, Cristina Domínguez. A xornada é presencial, pero poderá seguirse en directo a través do sitio web e as redes sociais da institución.
17/11/2023

Comeza en Vilalba unha xornada sobre as mulleres das Irmandades da Fala

“Arredor das irmandiñas: mulleres para a historia de noso” é o título das xornadas que terán lugar ata mañá no salón de actos da Casa da Cultura de Vilalba. A actividade forma parte das xornadas anuais que o Consello da Cultura Galega (CCG) organiza co Instituto de Estudos Chairegos (IESCHA). Nesta edición, diferentes especialistas, como Carme Adán, directora do Centro de Documentación en Igualdade e Feminismos do CCG, reúnense para falar do papel que tiveron as mulleres no seo das Irmandades da Fala.
26/10/2023

Deportistas de alto nivel recoñecen o papel pioneiro da ximnasta Marta Bobo

“Desde Ana Peleteiro ata Sofía Toro pasando por Alicia Fernández Fraga, Julia Vaquero... todas as deportistas galegas lle deben moito a Marta Bobo, porque ela foi a primeira” afirmou Merce Barrientos, presidenta do MUDEGA (Mulleres Deportistas Galegas) no marco da xornada “Marta Bobo. Mulleres e deporte” . Cita coa que o Centro de Documentación en Igualdade e Feminismo (CDIF) do Consello da Cultura Galega (CCG) homenaxeaba a primeira olímpica galega e muller pioneira que abriu moitos teitos de cristal no mundo do deporte. “É unha homenaxe a todas as mulleres que estiveron neste campo, cos seus éxitos e dificultades” afirmou a presidenta do CCG, Rosario Álvarez, na inauguración. Sobre esa idea tamén incidiu Carme Adán, directora do CDIF e organizadora da cita xunto con Cristina López Villar, que afirmou “temos que ter presente a importancia do deporte para mudar todos os estereotipos”. Os vídeos da xornada están dispoñibles na canle de Youtube do CCG.
25/10/2023

O CDIF homenaxea a Marta Bobo cunha xornada sobre as mulleres e o deporte

O Centro de Documentación en Igualdade e Feminismos (CDIF) do Consello da Cultura Galega (CCG) organiza mañá, 26 de outubro, ás 9:30 horas, unha nova sesión do ciclo De pioneiras e andainas. Nesta ocasión, a protagonista será a ximnasta Marta Bobo. A súa traxectoria e os seus logros deportivos servirán como punto de partida para analizar a loita das mulleres por acadar recoñecemento no mundo do deporte. A presidenta do CCG, Rosario Álvarez, e Carme Adán, coordinadora da xornada xunto con Cristina López Villar, inaugurarán esta actividade. A cita é presencial, pero poderá seguirse en directo a través do sitio web e das redes sociais da institución.
17/10/2023

O sector empresarial amosa unha maior sensibilidade cara ao galego aínda que mingua o seu uso

"O máis coherente para unha empresa que nace en Galicia, formada por galegos, con capital galego e cun Consello de Administración que fala galego é que a súa comunicación, as súas relacións internas e externas sexan nesta lingua", afirmou Pedro González, avogado e directivo de Leite Noso. Pero non todas as empresas teñen a mesma posición coa lingua, tal e como foron debullando responsables de diferentes empresas e entidades que participaron nos XXV Encontros para a Normalización Lingüística que organiza o Centro de Documentación Sociolingüística de Galicia (CDSG) do Consello da Cultura Galega (CCG). A presidenta da institución, Rosario Álvarez, e o secretario xeral de Política Lingüística, Valentín García, destacaron na inauguración a importancia deste foro, que este ano pon o foco no ámbito socioeconómico, un eido no que, pese as medidas adoptadas, se reduce o uso da lingua. Segundo as cifras achegadas polo investigador da Universidade de Santiago (USC) Miguel Guisantes entre 2003 e 2018 descendeu un 17% o número de persoas que falaban sempre en galego cos compañeiros e un 12,3% coa clientela.
06/09/2023

A fotógrafa Ruth Matilda Anderson entra no Álbum de Galicia

No ano 1921, a Hispanic Society encomendou á fotógrafa Ruth Matilda Anderson o labor de viaxar á Península Ibérica para desenvolver un traballo de documentación baseado, nomeadamente, no fotografado do traxe tradicional e outras manifestacións da cultura material galega. Desa encomenda saíron diferentes viaxes que construír a documentación máis completa que unha persoa estranxeira erguera nunca sobre o noso país. A historia da fotógrafa americana e o seu legado entra agora no Álbum de Galicia, a colección de biografías dixitais do Consello da Cultura Galega (CCG), nunha entrada asinada por Vitor Vaqueiro.
31/08/2023

A gordofobia, as crises alimentarias e o teatro galego, entre as vindeiras actividades

O Consello da Cultura Galega (CCG) recupera o ritmo de actividades despois do verán cunha serie de xornadas que abordan desde a discriminación que subxace trala gordofobia, ata as crises alimenticias pasando por unha revisión sobre o teatro galego. A primeira da actividades arrinca este venres, coa habitual colaboración que o CCG organiza coa Fundación Pondal para o Festiletras. O luns 4 de setembro ábrese a inscrición de todas as actividades.
06/07/2023

Nova entrega do proxecto Sextina

O proxecto Sextina, que inclúe rarezas e documentos pouco coñecidos do Centro de Documentación en Igualdade e Feminismos (CDIF), inclúe unha nova entrega. Desta volta consiste nun folleto de seis páxinas, publicado con motivo da convocatoria das eleccións xerais do 28 de outubro de 1982. Nel, as organizacións asinantes recollen unha listaxe de esixencias relacionadas co traballo, a educación, os coidados, a saúde, a sexualidade e o lesbianismo, o divorcio, as agresións e o aborto.
28/06/2023

Novos recursos no Día Internacional do Orgullo

Co gallo da conmemoración do Día Internacional do Orgullo LGTBIQ+, a hemeroteca feminista A Saia, proxecto dependente do Centro de Documentación en Igualdade e Feminismos (CDIF) do Consello da Cultura Galega (CCG), engade novas publicacións á súa colección. En concreto, póñense na rede o exemplar número 13 de S’homos e a totalidade dos números de Menlacex, dúas revistas de temática LGBTIQ+. Ao fío desta data, o CCG organizou tamén unha nova xornada do foro Pensar con Orgullo, na que se presentou o informe Análise, datos e recomendacións para o recoñecemento da diversidade en Galicia. Elaborado polo Foro Identidades e Disidencias Sexuais do CCG, o documento está dispoñible para a súa consulta no web institucional.
21/06/2023

O Foro Identidades e Disidencias Sexuais demanda maior formación e programas para as persoas LGBT+

O 65 % do alumnado de secundaria presenciou nas clases de Educación Física comportamentos homofóbicos entre estudantes. Entre o 86 % e o 92 % das agresións físicas non se denuncian. Estes son algúns datos que se recollen en Análise, datos e recomendacións para o recoñecemento da diversidade en Galicia, documento elaborado polo Foro Identidades e Disidencias Sexuais do Consello da Cultura Galega (CCG). “É un informe pioneiro no que por primeira vez se lles dá voz a todos os colectivos implicados para abordar as necesidades e preocupacións de todas as persoas LGBT+ e propoñer accións de mellora”, explicou Rosario Álvarez, presidenta do CCG, na súa presentación. “Con el rematamos un camiño de dezaoito meses que reuniu un centenar de persoas entre colectivos, profesionais, institucións e diferentes administracións e que abre outro para poder afrontar as necesidades deste colectivo tras un estudo sopesado”, apuntou Carme Adán, coordinadora do equipo de traballo que elaborou o documento. A presentación do informe, que xa se pode descargar desde o web do CCG, foi o peche da xornada Pensar con Orgullo IV.
19/06/2023

Preséntase o primeiro informe sobre disidencias en Galicia na xornada Pensar con Orgullo

O Consello da Cultura Galega (CCG) organiza o vindeiro mércores, 21 de xuño, a cuarta edición da xornada Pensar con Orgullo, unha cita que reflexiona sobre a situación do colectivo LGBTI+ coñecendo a situación doutros países e centrada nas políticas públicas. Nela presentaranse os resultados do Foro Identidades e Disidencias Sexuais, un espazo de reflexión e análise sobre a diversidade que supuxo 18 meses de traballo. As conclusións presentaranse nun informe pioneiro que aborda as necesidades e preocupacións das persoas do colectivo LGBT+. Como avance da xornada, na tarde do martes 20, haberá un obradoiro para mulleres a cargo de Gena Baamonde e A Panadaría Teatro.
26/05/2023

O Consello da Cultura Galega colabora na mostra Educación, xénero e lectura

A presidenta do Consello da Cultura Galega, Rosario Álvarez, participou esta mañá na inauguración de Educación, xénero e lectura, unha mostra que se achega á educación e á lectura cunha perspectiva de xénero. O proxecto expositivo, que se pode ver no Museo Pedagóxico de Galicia, conta en 16 mesas expositoras con libros e recursos escolares, obxectos significativos, fotografías históricas, cartelística e imaxes un proceso de discriminación e estereotipos, pero tamén de conquistas transformados. O CCG contribúe neste proxecto con materiais do noso Centro de Documentación en Igualdade e Feminismos (CDIF)
25/05/2023

Sen cancelas, a mostra sobre a historia da diversidade sexual en Galicia, completa un ano de itinerancias

A directora do Centro de Documentación en Igualdade e Feminismos (CDIF), Carme Adán, e mais África López Souto, directora do IES Urbano Lugrís, presentan este venres neste centro coruñés a unidade didáctica Sen cancelas, un documento elaborado polo Consello da Cultura Galega (CCG), co apoio da Secretaría Xeral da Igualdade, que complementa e explica a exposición homónima, que pecha as portas ese mesmo día no centro. O proxecto fai un percorrido polo pasado e presente en relación coas ideas e conceptos que deron forma á defensa dos dereitos e liberdades das persoas que non se axustaron á norma sexual e de xénero, así como aos estereotipos e valores sociais que os precederon. A exposición, que se puxo en marcha hai un ano, xa se puido ver en 17 centros educativos do país.
11/04/2023

As Sophias preséntanse na Semana Galega de Filosofía

“Filosofía e Arte“ é o lema da XXXIX Semana Galega de Filosofía que se desenvolve ata o venres en Pontevedra. Esta tarde (19:30 horas), no marco desta cita presentarase o proxecto Sophias, a serie web de ficción coa que o Consello da Cultura Galega (CCG) e a Consellería de Promoción do Emprego e Igualdade, contribúen a divulgar o pensamento de mulleres destacadas da historia. A presentación contará coa participación da responsable do proxecto, Carme Adán, xunto cunha das actrices, Marta Pérez, que darán a coñecer esta serie que achegan as ideas de figuras coma Simone Weil, Simone de Beauvoir, Hannah Arendt, Judith Butler ou María Xosé Agra.
30/03/2023

Sen cancelas, a mostra sobre a historia da diversidade sexual en Galicia, chega á Coruña

O Instituto Eusebio da Guarda acolle desde hoxe e ata o día 18 de abril a mostra do Consello da Cultura Galega (CCG) Sen cancelas. Este proxecto expositivo está pensado para amosar á mocidade un percorrido polo pasado e polo presente en relación coas ideas e conceptos que deron forma á defensa dos dereitos e liberdades das persoas que non se axustaron á norma sexual e de xénero, así como aos estereotipos e valores sociais que os precederon. A exposición conta cunha unidade didáctica que a complementa e que se pode descargar desde o web do CCG.
10/03/2023

O proxecto Sophias chega este venres ao Vello Cárcere de Lugo

Sophias é a serie web de ficción coa que o Consello da Cultura Galega (CCG) e a Consellería de Promoción do Emprego e Igualdade, contribúen a divulgar o pensamento de mulleres destacadas da historia. A responsable do proxecto, Carme Adán, e Tareixa Ferreiro, da Deputación de Lugo, presentan no centro sociocultural “O vello cárcere” (venres 10, 19:30 horas) esta iniciativa que está formada por sete episodios que se achegan ás ideas de figuras coma Simone Weil, Simone de Beauvoir, Hannah Arendt, Judith Butler ou María Xosé Agra. Participarán no coloquio posterior á proxección as actrices Marta Pérez e María Roja; Manuel Torres e Cristina de la Torre.
06/03/2023

Marilar Aleixandre e Laura Fernández protagonizan a primeira sesión do ciclo EscriturAs

“Transgresoras e exitosas. De malas mulleres a señoras que non son Santa Claus” é o título da sesión coa que o Centro de Documentación en Igualdade e Feminismos (CDIF) do Consello da Cultura Galega (CCG) abre o ciclo EscriturAs. Esta iniciativa busca reflexionar, desde unha perspectiva feminina e feminista, sobre os cambios experimentados nos discursos artísticos, xornalísticos e intelectuais durante os últimos anos. A primeira sesión, que terá lugar mañá, 7 de marzo (18:00 horas), xunta a Marilar Aleixandre e a Laura Fernández para conversar arredor da posibilidade de lograr o éxito desde a disidencia. Modera este diálogo Inma López Silva, coordinadora da actividade xunto con Rexina Rodríguez Vega. A cita é presencial, pero poderá seguirse en directo a través do sitio web e as redes sociais da institución.
03/03/2023

O ciclo Olladas de muller amosa o audiovisual máis recente feito por mulleres

Atender á creación galega pero tamén a destacados traballos do cine español e internacional recente protagonizados e dirixidos por mulleres é o obxectivo do ciclo Olladas de muller, que organiza o Consello da Cultura Galega (CCG), a través do seu Centro de Documentación en Igualdade e Feminismos (CDIF), xunto coa Filmoteca de Galicia. A súa undécima edición comeza este venres, 3 de marzo, na Coruña. A presidenta do CCG, Rosario Álvarez e Jacobo Sutil, director de Agadic, xunto coa directora do CDIF, Carme Adán, e a coordinadora do proxecto, Encarna Otero son os encargados de inaugurar este ciclo, que arrinca co documental de Nina Menkes Brainwashed, o cal aborda o abuso e a discriminación dos corpos femininos no cinema.
10/02/2023

Dous dos capítulos das Sophias chegan a Allariz este sábado

“A filósofa do sacho” e “Cigarrón Butler” son dous dos capítulos do proxecto Sophias, co que o Consello da Cultura Galega (CCG) contribúe a divulgar o pensamento de mulleres destacadas da historia. Os dous proxectaranse este sábado en Allariz (Fundación Vicente Risco, 12:30 horas) nunha actividade na que participan Carme Adán, responsable do proxecto e directora do Centro de Documentación en Igualdade e Feminismos (CDIF), e Celia Pereira, presidenta da Fundación Risco e coordinadora da Sección de Pensamento do CCG. Tras a proxección haberá un coloquio co público.