A exposición A imaxe e o labirinto foi, en palabras do seu comisario X. Antón Castro, unha opción selectiva de 10 artistas cubanos que, entre o amplo repertorio de posibilidades narrativas que ofrece a illa, nos sitúa perante a arte cubana de máis interese dos anos 90. Foron seleccionadas as obras de Abel Barroso, Saidel Brito, Yamilys Brito, Carlos Estévez, Carlos Garaicoa, Luís Gómez, René Peña, Lázaro Saavedra, Esterio Segura e J. Ángel Vincench. Con motivo desta exposición realizouse un catálogo con obras de cada un dos artistas e un detallado currículo así como con extensos ensaios do comisario e dos especialistas Guadalupe Álvarez e Gerardo Mosquera.