Esta mostra, comisariada por Manuel Rivas, presenta unha ollada da fotografía contemporánea que se realizaba en Galicia, nunha aposta pola narrativa, en palabras do comisario, para retratar a Galicia campesiña, pero “en lugar de fuxir da estampa campesiña, en lugar de refugar o costumismo, as cámaras déixanse ir sen complexos, ironizan cos tópicos, parrafean coa rusticidade, asómbranse coas augas ocultas da historia, con eses mundos soterrados que sobreviven tralas cortinas da urbe. E son cámaras que tamén amaron o corpo da terra, que leron os trazos da canción na súa pel. Este traballo, esteticamente atrevido, é sentimental, é dicir, ousadamente revolucionario para a mirada contemporánea”. A busca da alma de Galicia desde as miradas de Vari Caramés, José V. Caruncho, Xulio Correa, Xurxo Lobato, Xoán Piñón, Xosé Tejero e Tino Viz.