Foro Pensar o mundo dende Galicia

Os límites planetarios: Unha ollada socioeconómica dende Galicia

Os límites planetarios

21 de setembro de 2023
Santiago de Compostela

Ciclo

Foro Pensar o mundo dende Galicia

Os límites planetarios: Unha ollada socioeconómica dende Galicia

Os límites planetarios

21 de setembro de 2023 Santiago de Compostela

Dende 1983 ata hoxe o Consello da Cultura Galega leva corenta anos promovendo o debate, a pescuda e a creación arredor de diversos eidos do saber, mais tamén sobre cuestións que atinxen aos problemas e inquedanzas da sociedade galega. Recollendo o legado do feito na súa historia, mais con proxección cara ao futuro, o Consello da Cultura Galega propón un foro de reflexión arredor de cuestións candentes no mundo actual, estruturado en oito xornadas -de marzo a novembro de 2023- nas que se abordarán temáticas moi presentes nas actividades da institución, como a posverdade na información, a economía da cultura, o humanismo e as novas tecnoloxías, a calidade da democracia, os retos do feminismo, o papel do galego nunha sociedade multicultural, a sustentabilidade da economía global e o papel do patrimonio e da paisaxe. Máis de corenta personalidades do mundo cultural, científico e académico galego, ibérico e mundial daranse cita en Santiago para reflexionar, debater e profundar na interpretación dos desafíos desta terceira década do século XXI, con vontade interdisciplinaria e dialogante. Dende Galicia, recollendo a tradición iniciada hai máis dun século pola Xeración Nós e polo Seminario de Estudos Galegos, aspiramos a repensar o mundo e a sermos unha célula de universalidade.

Os límites planetarios: unha ollada socioeconómica dende Galicia
O Centro de Resiliencia de Estocolmo desenvolveu no ano 2009 o concepto de ‘límites planetarios’ e identificou nove procesos claves para a estabilidade e habitabilidade da Terra, así como os límites que non poderían superarse. Os nove procesos identificados fan referencia a: Crise climática; Acidificación dos océanos; Buraco de ozono; Ciclo do nitróxeno e o fósforo; Uso da auga; Deforestación e outros cambios no uso do chan; Perda de biodiversidade; Contaminación de partículas na atmosfera; Contaminación química.
Dende entón, xerouse infinidade de traballo que trata de cuantificar e entender o estado deses límites. Polo de agora, as novas non son especialmente boas, pois cinco destes nove límites xa foron superados: a crise climática, a perda de biodiversidade, a alta contaminación, a deforestación e outros cambios no uso do chan, e o empeoramento do ciclo do nitróxeno e o fósforo.
Na primeira parte desta xornada analizaremos o impacto do cambio global na agricultura e nas posibles crises de alimentos, así como na biodiversidade e nos ecosistemas a escala global. Na sesión da tarde, profundaremos nalgúns dos cambios fundamentais sufridos polos ecosistemas galegos, que condicionan a calidade ambiental de Galicia e xeran múltiples consecuencias tanto para a sociedade como para a economía e a saúde da poboación. Falaremos tamén sobre algúns cambios sociais requiridos e sobre a necesidade de determinadas políticas de adaptación e mitigación.