O 4 de decembro de 1977 tivo lugar en Vigo unha das maiores concentracións políticas daqueles anos. Foi un chamamento á mobilización contra o modelo autonómico proposto pola UCD cunha fonda repercusión. O cartel daquela mobilización é un dos materiais recollidos no Fondo Miguel Gutiérrez e que xa se poden consultar na rede. O Consello da Cultura Galega (CCG) acaba de dispoñibilizar unha parte do fondo galego que está a ser catalogado polo Grupo de Investigación HISPONA da Universidade de Santiago de Compostela (USC).
O Fondo Miguel Gutiérrez recolle propaganda e publicidade política datada entre o final do franquismo e a década dos 2000. O fondo inclúe panfletos, pósteres, carteis, adhesivos, pasquíns, chapas, publicacións, fanzines, vinilos, chaveiros e mercadotecnia variada relacionados coa política nacional e tamén internacional.
Este fondo foino escolmando Miguel Gutiérrez desde os trece anos e consta de milleiros de documentos. Agora o Consello da Cultura Galega e o grupo HISPONA presentan unha parte do fondo galego. Esta acción permite coñecer máis sobre un período que estivo cargado de arriscados proxectos e de incerteza. Algúns deses documentos son carteis, e nesta primeira selección pódense ver pósteres como os do Primeiro de Maio cos seus diferentes lemas; outro da campaña en contra da integración de España na OTAN; un cartel clandestino (1976) co retrato do vigués Xosé Humberto Baena, fusilado con 24 anos en 1975; outro dos homenaxeados ao fusilados en setembro de 1975, etc.
A posta na rede desde material anunciouse en febreiro deste mesmo ano, cando o CCG dedicou un dos seus Encontros Monográficos co Patrimonio Cultural (EMPC) a coñecer máis sobre o patrimonio cultural xerado durante o período histórico da Transición e a consolidación democrática. Naquel momento, o historiador Emilio Grandío fixo unha escolma comentada de cinco documentos dese fondo para dar conta da súa significación.
A dixitalización e posta na rede dese material intégrase dentro dunha liña de traballo prioritaria do CCG para este 2023 que busca afondar na memoria da Transición galega.
