Non mirar ao sol sen anteollos homologados, evitar desprazamentos innecesarios, planificar as viaxes e prever retencións ou organizar puntos de observación seguros e accesibles con servizos e control de aforo. Son algunhas das propostas do documento “Esperando a eclipse total de sol. Recomendacións para as administracións públicas e a cidadanía” que un grupo de expertos en astronomía, meteoroloxía, divulgación científica e saúde visual elaboraron para unha visualización segura da eclipse total de sol do vindeiro 12 de agosto. A presidenta do CCG, Rosario Álvarez, e o coordinador desa comisión de expertos que elaborou o documento, Jorge Mira, destacaron na presentación as medidas para “vivir con seguridade un fenómeno que traerá desprazamentos masivos xa que é unha oportunidade única”. Ademais, lembraron que o vindeiro 30 de abril o sol se situará nunha posición semellante á do día da eclipse, o que permitirá realizar probas e ensaios previos.
A eclipse total de sol terá lugar poucos minutos antes das 20:30 horas do vindeiro 12 de agosto. “Será a primeira visible en Europa no século XXI e atraerá un elevado número de persoas, tanto dentro como fóra de Galicia” asegurou Joge Mira. Neste contexto, o documento, apuntou a presidenta “pon o foco na necesidade de garantir unha experiencia segura, ordenada e ben planificada, co correspondente impacto en ámbitos como a mobilidade, a seguridade ou a organización de eventos, entre outros eidos”. O documento está dispoñible desde o web do CCG.
Recomendacións en diferentes ámbitos
A raíz do acontecido noutros territorios perante situación semellantes, os expertos asumen que os retos son, principalmente, de seguridade e de mobilidade. Neste ámbito, o texto lembra que “a zona sur-suroeste de Galicia, que quedará fóra da zona de totalidade da eclipse, ten a máxima densidade de poboación de Galicia e, ademais, en pleno mes de agosto, estará en máxima ocupación turística, cunha enorme poboación flotante” polo que se prevén desprazamentos numerosos.
O documento incide na protección da saúde —non mirar ao sol sen anteollos homologados—, na planificación da mobilidade —evitar desprazamentos innecesarios e prever retencións—, na organización de puntos de observación seguros e accesibles con servizos e control de aforo, no reforzo dos servizos públicos e de emerxencias, e na necesidade dunha comunicación clara e coordinada baseada en criterios científicos.
Con respecto á saúde ocular, o documento insiste en que non se debe mirar ao sol directamente sen protección homologada e que só son seguros os anteollos de eclipse certificados. Ademais, incide na importancia de transmitir á cidadanía unha mensaxe clara sobre o seu uso correcto (cando quiter e poner os anteollos) durante as distintas fases do fenómeno, así como na conveniencia de promover métodos de observación indirecta, especialmente entre a poboación infantil.
No que atende á mobilidade recomenda planificar as viaxes con antelación e extremar a precaución nas estradas, especialmente no regreso, cando se concentra un maior volume de tráfico.
No ámbito organizativo, o documento propón a identificación de puntos de observación seguros e accesibles, dotados de servizos básicos e dispositivos de emerxencia, así como a coordinación entre administracións para facer fronte ao incremento de visitantes. Tamén se advirte da posible saturación das redes de telefonía móbil e da necesidade de garantir o funcionamento dos servizos públicos.
Subliña a importancia de ofrecer información clara, rigorosa e coordinada, baseada en criterios científicos, co apoio dos medios e das canles institucionais, para garantir que a cidadanía coñeza como observar a eclipse con seguridade. Para iso propoñen o sitio web https://www.trioeclipses.es/ como punto de referencia fundamental.
Como parte da preparación, sinala que o vindeiro 30 de abril, arredor das 20:20 horas, poderá realizarse un ensaio das condicións nas que se producirá a eclipse, ao coincidir cunha posición solar semellante. Esta proba permitirá comprobar a idoneidade dos lugares de observación e anticipar posibles limitacións.
Un documento elaborado por especialistas en distintos ámbitos
Un grupo de expertos de diferentes ámbitos reuniuse o pasado 11 de marzo na sede do CCG para elaboración o documento que sirva de guía para unha observación segura. Estaba formado por Alexander Dubra Fernández, do Colexio Oficial de Ópticos Optometristas de Galicia; Ramón Iglesias Marzoa, do Clube Compostelán Vega de Astronomía; Óscar Blanco, da Agrupación Astronómica Coruñesa Ío; Begoña Nicolás, da área de astronomía e astrofísica do departamento de matemática aplicada da Universidade de Santiago; Marcos Pérez Maldonado, director dos Museos Científicos Coruñeses; Borja Tosar do Planetario da Coruña; Dositeo Veiga Alonso de Ceos Galegos e AstroVigo; e, a través de videoconferencia, Igor Piñeiro, da Asociación Astronómica Sirio; Juan Taboada, coordinador de Meteogalicia; e Ana Ulla, do departamento de física aplicada da Universidade de Vigo e Fundación Ciencia, Ceo e Cultura. Estivo tamén ao inicio da sesión Rafael Bachiller, director do Observatorio Astronómico Nacional.
Publicación
Esperando a eclipse total de sol.
Recomendacións para as administracións públicas e a cidadanía
Venres, 27 de marzo de 2026consellodacultura.gal
Publicación
Esperando a eclipse total de sol.
Recomendacións para as administracións públicas e a cidadanía
Venres, 27 de marzo de 2026consellodacultura.gal
Solicita a túa inscrición
Esperando a eclipse total de sol.
Recomendacións para as administracións públicas e a cidadanía
