Jorge Mira Pérez

Baio (A Coruña), 1968. Catedrático de Electromagnetismo no Departamento de Física Aplicada da Universidade de Santiago de Compostela (USC) desde 2011. En 2016 foi elixido académico correspondente da Real Academia Galega (polo seu traballo na modelización de dinámicas lingüísticas) e desde 2021 preside a Comisión Deontológica do Colegio Oficial de Físicos de España. É autor dunha ampla produción científica, entre a que se atopan traballos en coautoría co Premio Nobel John Goodenough. A súa investigación abarca as cinco grandes áreas de coñecemento: ciencias, enxeñaría, ciencias da saúde, humanidades e ciencias sociais e xurídicas, e por ela recibiu varios galardóns, como a Medalla Galicia de Investigación 2022 na área de física, matemática e ciencias da computación. Foi colaborador do Ministerio de Educación y Ciencia na creación do Laboratorio Ibérico Internacional de Nanotecnoloxía (INL) de Braga (2006-2007). Ademais, foi membro da comisión de expertos do Goberno de España para a reforma da hora oficial (2018-2019) e do grupo de expertos da Xunta de Galicia para o cálculo da expansión da covid-19 (2020). Comunicador científico desde finais dos anos noventa, o seu campo de actividade inclúe televisión, prensa, radio, libros, traducións (de obras de Stephen Hawking e Albert Einstein ao galego), a dirección da colección de divulgación científica do Servizo de Publicacións da USC, actividades de difusión da astronomía (con impacto en Galicia a nivel social, turístico e institucional), a coordinación da rede Nerd Nite en Santiago de Compostela e outras accións puntuais. É fundador de iniciativas de divulgación de gran formato, como o programa ConCiencia, artellado ao redor de visitas de Premios Nobel a Galicia e recoñecido co Premio da Crítica Galicia na modalidade de iniciativas culturais e científicas (2017) e co Premio da Cultura Galega na categoría de proxección exterior (2022). Recibiu múltiples recoñecementos pola súa traxectoria divulgativa, como o Premio da Confederación de Sociedades Científicas de España a la Difusión de la Ciencia 2023.