Documentación SocietariaCustodiar, preservar e difundir a memoria da emigración galega son as finalidades principais do Arquivo da Emigración Galega. Un dos feitos máis salientables da colectividade galega no exterior foi a fundación de asociacións de moi diversa tipoloxía (asistenciais, instrutivas, culturais, mutualistas, recreativas etc.) nas que os e as emigrantes ademais de atopar axuda e protección mutua na súa vida cotiá tamén conseguiron manter viva a cultura e os costumes da nosa terra nos países onde se asentaron, creando espazos de sociabilidade propios. A colectividade galega creou entidades para manter viva a lembranza do terruño e enviar remesas coas que contribuír ao desenvolvemento da nosa terra.
Neste proxecto o AEG pon a disposición das persoas interesadas os fondos xerados por estas institucións que ao longo dos anos se foron recompilando para a súa preservación e difusión. Libros de actas, regulamentos, correspondencia, memorias sociais, libros de contabilidade ... estarán na nosa web para a súa consulta.
Memoria documental das sociedades da emigración galega
Sociedad Hijos del Ayuntamiento de Oleiros
Bos Aires, 1918
Xoves, 24 de setembro de 2026 consellodacultura.gal
consellodacultura.gal
Esta asociación recreativa e de socorros mutuos foi creada o 1 de setembro de 1918 por un grupo de naturais do concello de Oleiros residentes na Arxentina. Entre os seus fundadores figuran Ramón Suárez, Antonio Portela, Juan Portela, José M. Souto, M. Sánchez, Francisco López, Joaquín Suárez, Jesús Suárez, Manuel Cajigal, José Portela, Francisco González, José Doldán, José Ares, José Breigo, Manuel Pita, Alejandro Ramón, Melchor Salinas, José Portos, Francisco Blanco, Juan Vázquez, Manuel Vázquez, Manuel Fuentes e José Fernández.
A entidade naceu cos seguintes propósitos: protexer e repatriar os asociados en caso de necesidade; fomentar o ensino no municipio de Oleiros mediante a creación de escolas; cultivar e difundir o espírito asociativo entre os conveciños residentes naquel país e manter unha relación estreita coas sociedades homólogas existentes en ambas as beiras do Atlántico.
Hoxe en día, baixo a denominación de ASOCIACIÓN DE OLEIROS MUTUAL, CULTURAL Y RECREATIVA, a entidade mantén unha traxectoria continuada de 108 anos de existencia ao servizo dos seus socios e socias. Na súa sede emblemática, sita no casco histórico de San Telmo (na rúa Piedras 848), celébranse diversas festividades como a de Santa María de Oleiros, o Fin de Ano ou o Día de Galicia; ensaian os membros do grupo tradicional de baile e organízanse actividades culturais abertas á comunidade residente no barrio. Do mesmo xeito, esta sociedade de emigrantes oleirenses segue a ofrecer un servizo de apoio mutuo aos seus socios e socias para atender as súas necesidades de atención integral.
