Carlos López Sierra e Manuel Fernández Arrojo, secretario e directivo da Asociación Cultural “Val de Láncara”, organizadora do premio, e Xurxo Rodriguez Lozano, do C.P.I. Ramón Piñeiro de A Pobra de San Xiao, deron conta da decisión do xurado e salientaron, canda os importantes e recoñecidos méritos literarios de Agustín Fernández Paz, o feito de que a súa obra “en tempos de globalización permite a incorporación das novas xeracións ao coñecemento dos valores propios da cultura e a lingua galegas”. Subliñaron asemade o feito de que “a súa peripecia vital e profesional no ámbito educativo e a sinxeleza do seu carácter, sempre alleo a xestos e actitudes personalistas e de autocompracenza, fano merecedor de ser considerado un dos bos e xenerosos que co seulabor constante e calado andan a “facer país” e ensinan a facer país ás xereacións que recibirán en herdo unha Galicia anovada”.

O premio, organizado pola Asociación Cultural “Val de Láncara” foi creado para honrar a memoria do insigne galeguista Ramón Piñeiro López (Láncara-Lugo, 1915-Santiago de Compostela, 1990), primeiro presidente do Consello da Cultura Galega.

Nas dez anteriores edicións o premio foi outorgado a: Isaac Díaz Pardo, Luís Tosar, Milladoiro, Xosé Manuel Beiras, Xosé Neira Vilas, A Nosa Terra, Avelino Pousa Antelo, Luz Pozo Garza, Real Academia Galega e Mini&Mero.

Para esta edición a asociación convocante contou, entre outras, coas colaboracións de: Área de Cultura da Deputación Provincial de Lugo, Concello de Láncara, Caixa Rural Galega, Escola de Arte Superior de Deseño “Ramón Falcón”, Colexio Público “Ramón Piñeiro” de A Pobra de San Xiao e as entidades culturais xa mencionadas.