PRENSA

NOTICIA

----
  1. Inicio
  2. Prensa
  3. noticia

O Pleno do Consello da Cultura aprobou un presuposto de 2,5 millóns de euros para 2013 e un programa de actos no que destaca o congreso internacional “Rosalía no século XXI”

O Plenario do Consello da Cultura Galega aprobou onte a última hora do serán un presuposto de 2,5 millóns de euros para 2013, que supón unha diminución do 5´5 por cento con relación ao ano anterior. As cifras, integradas nos presupostos da Comunidade Autónoma, serán sometidas agora á consideración do Parlamento Galego. Á sesión asistiu por vez primeira Alberto Núñez Feijóo, presidente da Xunta, en calidade de presidente de honra da institución. O pleno aprobou tamén o programa de actividades para o 2013, no que destaca o congreso internacional “Rosalía no século XXI. Unha nova ollada” a celebrarse entre os meses de febreiro e xuño.
O Pleno do Consello da Cultura aprobou un presuposto de 2,5 millóns de euros para 2013 e un programa de actos no que destaca o congreso internacional “Rosalía no século XXI”

As actividades do Consello da Cultura Galega en 2013 estarán en boa medida marcadas polo congreso internacional que dedicará á figura e á obra de Rosalía de Castro (1837-1885) baixo o título “Rosalía no século XXI. Unha nova ollada”. Serán cinco xornadas que se desenvolverán entre os meses de febreiro e xuño coa participación dos máis destacados expertos nacionais e internacionais na obra rosaliana. En 2013 cumpriránse 150 aniversario da publicación en Vigo (1863-2013) de “Cantares Gallegos”, obra auroral e determinante para o Rexurdimento das letras galegas. O congreso, que se celebrará na sede da institución en Santiago de Compostela, terá unha parte presencial, cunha programación pechada de conferencias, mesas redondas e recital poético, e unha parte virtual aberta a comunicacións libres. O programa, que poderá seguirse vía streaming e terá tamén unha proxeción virtual, constará de once conferencias, cos seus correspondentes retrucantes, nove mesas redondas (un coordinador e, xeralmente, tres convidados), un recital poético e medio centenar de relatores e relatoras convidados expresamente. Ramón Villares lembrou o congreso rosaliano celebrado en 1985, no que tamén tiña participado a institución, e salientou a liña de continuidade.

Xunto co congreso rosaliano-2013 e as preceptivas funcións de alta asesoría en materia cultural, o plenario do Consello da Cultura Galega deu a súa aprobación a outras actividades, entre as que cómpre citar o simposio en homenaxe a Serafín Moralejo Álvarez, as xornadas sobre a situación dos museos e as artes escénicas de Galicia ou a repercusión da Lei da Memoria Histórica na Emigración.

Na sesión aprobouse asemade o borrador do informe “Recomendacións para o acceso ao patrimonio moble de Galicia”, cunha serie de directrices que teñen en conta as recomendacións da Unesco ao respecto. As medidas estrutúranse en catro liñas de acción: a elaboración de instrumentos para o público coñecemento do patrimonio, acceso, sensibilización e profesionalización da xestión do patrimonio. O texto foi elaborado por unha comisión técnica temporal, integrada por María del Mar García Miraz, Segundo Pérez López, Bieito Pérez Outeiriño, María Ánxeles Vidal Fraile e Alfredo Vigo Trasancos coa coordinación de Concha Varela Orol, membro do Plenario.