Casado (1949 - 2002) abordou a poesía, a narrativa, a traducción e o ensaio aínda que a penas chegou a publicar moitas obras. O seu pasamento deixa unha grande cantidade da súa obra inédita.

O recemente falecido Xoán Manuel Casado, avogado, escritor e un dos fundadores do PEN Clube de Galicia, será homenaxeado nun acto que acolle mañá o salón de actos do Consello da Cultura Galega, ás 20 h, organizado polo PEN Clube de Galicia, en colaboración co Consello da Cultura Galega e a Consellería de Cultura. Segundo os seus organizadores, o obxectivo do evento é manter viva a lembranza e a memoria deste escritor, falecido o mes de xaneiro pasado.

O ex presidente da RAG, Fernández del Riego, Alfredo Conde, o filólogo e secretario do Consello da Cultura Galega, Henrique Monteagudo, Margarita Ledo, Alonso Montero, Víctor F. Freixanes, García Bodaño, Basilio Losada, Arcadio López-Casanova ou Méndez Ferrín, son algúns dos persoeiros que asistirán a homenaxe.

Xoán Manuel Casado (Barcelona, 18/12/1949 - 19/01/2002), fillo do escritor galego Manuel Casado, mantivo desde sempre fondos lazos con Galicia, principalmente a través de Castro Caldelas (Ourense). Aínda que pertenecía ó Corpo de Letrados do Instituto Nacional da Seguridade Social, nos últimos anos pedira a excedencia para dedicarse á exercer a avogacía na súa Barcelona natal, unha tarefa que lle permitía ter tempo para a literatura, á que consideraba a súa principal actividade. Poesía, con Rexistro de menores espantos (1973), Os preludios (1980) ou Libro de Caldelas (1982, Premio da Crítica), narrativa, O inverno do lobo (1985, Premio Blanco Amor), traducción ou ensaio, foron algún dos xéneros que abordou Casado. O seu temprano pasamento déixanos, sen embargo, unha grande cantidade de obra inédita.