A ANIMACIÓN Á LECTURA, TEMA DA TERTULIA MENSUAL DO CONSELLO DA CULTURA GALEGA

16/12/2004

A tertulia mensual da Sección de Literatura e Industrias da Edición do Consello da Cultura Galega celebrarase mañá venres, día 17 de decembro, baixo o título "A animación á lectura". Pilar Sampedro, presidenta da Asociación Galega do Libro Infantil e Xuvenil (GALIX), presentará e conducirá o encontro, no que participarán Cristina Novoa, asesora de bibliotecas do Servizo de Formación do Profesorado; Magdalena de Rojas, escritora, mestra e bibliotecaria, e membros da sección organizadora.

Esta tertulia continúa o ciclo iniciado a principios de ano polo CCG e no que até o de momento participaron escritores como Suso de Toro, Xesús Alonso Montero, Urbano Tavares e Anxos Sumai e no que se abordaron temas como as novas narradoras, o libro galego ou o significado do Día das Letras Galegas. As tertulias son gravadas e posteriormente quedan a disposición do interesados en Lg3, o soportal de literatura de culturagalega.org, no enderezo http://www.culturagalega.org/lg3/

- Día: venres, 17 de decembro
- Hora: 17:00
- Lugar: biblioteca do Consello da Cultura Galega