Estas xornadas pretenden ofrecer por vez primeira en Galicia unha visión ampla e desde diferentes perspectivas da arquitectura proxectada e realizada en Madrid. Con este obxectivo, foron convidados catorce destacados arquitectos, críticos e investigadores que reflexionarán e debaterán arredor do fenómeno arquitectónico nun centro referencial para a arquitectura da Península Ibérica, a capital española, un territorio cultural en constante transformación.

Coordinadas por Gabriel Ruiz Cabrero e Iago Seara Morales, as xornadas "A arquitectura desde Madrid" terán lugar no Consello da Cultura Galega os días 16 e 17 de decembro, en sesións de mañá e tarde, e permitirán dar a coñecer o traballo desenvolvido no espazo madrileño.

Na rolda de prensa de presentación mañá martes intervirán Alfonso Zulueta de Haz, presidente do Consello da Cultura Galega, e Iago Seara Morales, coordinador da Sección de Arquitectura do CCG.