O PERFIL E CONDICIÓNS LABORAIS DO XORNALISTA EN INTERNET CENTRAN A NOVA PUBLICACIÓN DO CCG

21/11/2002

Os avances tecnolóxicos dos últimos anos están a cambiar as formas de comunicación e facendo que xurdan novas canles que esixen dos xornalistas unha adaptación. O xornalismo en Internet, a súa situación laboral e as súas actitudes profesionais e, sobre todo, a definición das funcións do xornalista en Internet eran cuestións pendentes que o Consello da Cultura Galega, a través da súa Sección de Comunicación, decidiu abordar a través dun miúdo estudio que agora se presenta dentro da colección de Informes baixo o título "Xornalismo en Internet. Actitudes profesionais e condicións laborais dos periodistas en liña".

Esta nova publicación do CCG presentarase nun acto que terá lugar mañá, xoves 21 de novembro, ás 12h. A presentación terá lugar no Salón de Actos do Consello da Cultura Galega e contará coa presencia de José María Vázquez Portomeñe, ex director xeral de Relacións Laborais e impulsor do convenio entre a Consellería de Xustiza, o Colexio Oficial de Xornalistas de Galicia e o CCG, que fixo posible a elaboración deste informe; Pilar Cancela, actual directora xeral de Relacións Laborais da Consellería de Xustiza, Miguel Túñez, profesor da Facultade de Cc. de Comunicación, Xosé López, decano da mesma e coordinador da Sección de Comunicación e Xosé María Palmeiro, presidente do Colexio Oficial de Xornalistas de Galicia.

O perfil do usuario da rede en Galicia, o do xornalista electrónico, o uso que os medios tradicionais (prensa, radio e televisión) fan dos novos medios así como a situación laboral na que estes xornalistas desenvolven o seu traballo, son algúns dos estudios que agora se recollen neste Informe, imprescindible para comezar a comprender ó novo xornalista electrónico.

Esta publicación tamén poderá ser consultada a partir de mañá descargándoa da web oficial do CCG, www.consellodacultura.org